Dou'aa

Il tout à fait normal ki au moment de ene difficulté ou détresse, nou pense kikene ki capave tire nou depi dans ça difficulté-là. Dans ça moment-là ene quantité moyens vine dans nou l'esprit. Nou pense ene quantité dimoune et ene quantité moyens. Pas tout dimoune nou croire ki capave aide nou. Ena ki capave aide nou mais pas pou envi aidé. Couma ena ki envi aidé mais ki ena banne l'empêchement. Et la plupart tombe dans catégorie banne ki pratiquement pena même capacité pou aidé. Aster quand nou guette bien, ça banne ki soi disant capave aidé-là aussi zotte capacité li limité. Li arrête quelque part. Zotte pas capave aidé à tout niveau ni pou tous problèmes et ni pou tout le temps. Dans ça l'heure- là ene dimoune li arrivé trouvé ki ena ene seul ki capave aide li à tout niveau et ki pena aukene l'empêchement parceki li ena capacité lors tout kitchose. Tout kitchose li totalement dans so contrôle. Et ça ene seul-là c'est Allah Ta'ala. Ça demande ki nou faire avec Allah Ta'ala pou gagne ene kitchose ou bien pou gagne protection de ene kitchose nuisible ou bien pou tire nou depi dans difficulté appelle faire dua. Dans faire dua li important ki ene dimoune li reconnaite au fond de li so incapacité complète et li reconnaite ki Allah Ta'ala li tout seul li ena capacité. C'est par rapport à ça l'état d'esprit-là même ki Rassouloullah ‎(Sallallaahou A'laihi Wasallam)‎ fine qualifié dua de 'Mukh- khul Ibaadah' ou bine l'essence de ibaadat parceki le fond ou l'esprit de ibaadat c'est ki ene dimoune li humilié li totalement divant grandeur Allah Ta'ala. Ça l'état d'esprit-là li manifesté pli bien dans moment ki ene dimoune li dimane dua. Ça l'état d'esprit-là li manifesté pli bien dans ça moment ki ene dimoune li supplié Allah Ta'ala pou gagne so aide.

Ena plusieurs formules ki Nabi ‎(Sallallaahou A'laihi Wasallam)‎ fine recommane pou récité quand pé dimane dua ki selon Nabi ‎(Sallallaahou A'laihi Wasallam)‎ li contenir Al-Ismul 'Azam. Nabi ‎(Sallallaahou A'laihi Wasallam)‎ fine dire ki Al-Ismul 'Azam c'est ene nom Allah Ta'ala ki faire dua accepté. Li difficile pou dire exactement ki ça nom-là été. Chakene fine essaye identifié ça nom-là. Pli facile nou récite tous ça banne formules-là quand nou dimane dua.

En sus de ça ceki important c'est nou l'état d'esprit. Nou tire nou confiance depi dans tout kitchose et nou place tout nou confiance lors Allah Ta'ala seulement. Ena ene l'effet extra ordinaire dans ene dua ki faire avec ene l'état d'esprit pareil. Ene kitchose bien efficace pou dua accepté c'est faire daroud shariff dans commencement, au milieu et avant termine dua.

[Extrait de Al Jamiat Vol.7 No.3]