Dua

Si nou trouvé ki nou pas pé gagne ceki nou pé dimandé, alors faudré pas nou arrête dimandé. Parceki dua li non seulement ene ibaadat mais l’essence et la crème même de ibaadat. Malgré nou trouvé ki nou pas pé gagne ceki nou pé faire dua pou gagné, nou pé gagne récompense de faire dua. Si nou trouvé ki pas pé gagné, ça c’est ceki nou pé guetté. Sinon dua ki nou dimandé, li accepté dans plizir formes.

Dimane pardon avec Allah Ta'ala li ene très grand ibaadat. Li ene pratique ki Allah Ta'ala bien apprécié. C'est ene action ki vine apartir regret et remords ki ene dimoune gagné quand li senti li coupable. C'est ene ibaadat ki rempli de humilité. Humilité li ene kitchose ki Allah Ta'ala bien content. Donc dimane pardon li nettoye ene dimoune et rapproche li avec Allah Ta'ala à la fois.

Control de tout kitchose li trouve uniquement dans la main Allah Ta’ala. Allah Ta’ala contrôle tout. Personne pena aukene contrôle lors aukene kitchose. La santé, maladie, richesse, pauvreté, bonheur, malheur, l’honneur, déshonneur, tout trouve dans la main Allah Ta’ala. Solution de tout problème li trouve dans so la main même. Li tendé quand nou cause avec li. Li repone quand nou invoque li. Li conné quand nou pense li. Li présent quand nou bizin li. Li donné quand nou dimane li. Mais bizin compose numéro ki bizin.

Il tout à fait normal ki au moment de ene difficulté ou détresse, nou pense kikene ki capave tire nou depi dans ça difficulté-là. Dans ça moment-là ene quantité moyens vine dans nou l'esprit. Nou pense ene quantité dimoune et ene quantité moyens. Pas tout dimoune nou croire ki capave aide nou. Ena ki capave aide nou mais pas pou envi aidé. Couma ena ki envi aidé mais ki ena banne l'empêchement. Et la plupart tombe dans catégorie banne ki pratiquement pena même capacité pou aidé.