Dimane pardon

Dimane pardon avec Allah Ta'ala li ene très grand ibaadat. Li ene pratique ki Allah Ta'ala bien apprécié. C'est ene action ki vine apartir regret et remords ki ene dimoune gagné quand li senti li coupable. C'est ene ibaadat ki rempli de humilité. Humilité li ene kitchose ki Allah Ta'ala bien content. Donc dimane pardon li nettoye ene dimoune et rapproche li avec Allah Ta'ala à la fois.

Nou banne grand ti pé faire zotte maximum zeffort pou pas faire péché mais zotte ti pé dimane pardon avec Allah Ta'ala après avoir passe la nuit blanche dans ibaadat. Zotte ti conscient ki zotte pas fine assez faire ibaadat alors zotte ti pé dimane pardon pou le manquement ki fine capave ena dans quantité et dans qualité.

Zordi nou noyé dans péché mais nou pas trouve la nécessité pou dimane pardon. Cela acoze ki nou le cœur fine rouillé avec péché. Si nou pas dimane pardon, li très probable ki ça pou aggravé à tel point cotte nou capave perdi le taufeeq et la volonté.

[Extrait de Al Jamiat Vol.7 No.12]