Besoin et l’envie

Ene dimoune li soif. Li bizin quelque chose pou boire pou passe so la soif. Li capave faire li par boire ene verre de l’eau ki peut être pas coute li narien. Couma li capave faire li avec ene la boisson comma ene jus de fruit ou bien ene la boisson gazeuse ki normalement li bizin acheté. Mais ça dimoune-là li pas envi contente li avec de l’eau. A ce stade nou ena 2 kitchose : ene besoin et l’autre c’est l’envie. Besoin-là capave satisfaire li sans dépensé mais pou l’envie-là bizin mette la main dans poche. A partir de là nou capave comprend ki souvent le besoin li facile à satisfaire. C’est necque l’envie ki dimane zeffort et la peine.

Donc ene dimoune li capave vive bien si li supprime so banne l’envie ou bien limite li à ceki so moyen permette li avec facilité. Mais problème vini quand li galoupe derrière so l’envie. Pou cela li bizin faire dépense additionnelle ki nécessite zeffort supplémentaire. Li bizin le temps aussi pou réalise ça. Et si li pas capave faire li dans ene façon juste et convenable, alors li pou ena tendance adopté banne moyen indigne et condamnable. Li pas pou hésité cause menti, embête dimoune ou rente banne transaction ki pas permette dans Deen. Li déjà bien grave si li pé faire tout ça-là pou satisfaire so banne l’envie ki permette. Mais si banne l’envie là zotte condamnable, illégal et détestable, alors problème-là li vine encore pli pire.

Ene musulman bizin toujours contente li par satisfaire so banne besoin. Li ena droit aussi satisfaire so banne l’envie si so moyen permette li mais jamais à jamais au détriment de so Deen.

Dimoune ki galoupe derrière so banne plaisir et désir li ene dimoune ki pou toujours dans bouleversement. Li pou permette li commette ene série de dégâts ki pou nuire so prochain et sans doute li pou nuire li aussi. Acoze ça shariah mette boucou l’emphase lors être satisfait lors ceki ou ena. Dans ene hadice rapporté dans sounan At-Tirmizi, Rasouloullah ‎(Sallallaahou A'laihi Wasallam)‎ fine dire :

من اصبح منكم آمنا فى سربه معافى فى جسده وعنده قوة يومه فكانما حيزت له الدنيا بمحذافيرها

« N’importe kikene parmi ou ki zoine le matin dans ene l’état ki li senti li sain et sauf à l’intérieur de li, en bonne santé et li ena so nourriture pou ça jour-là, alors couma dire dounia même fine vine cote li. »

C'est-à-dire ene dimoune ki senti li bien physiquement et moralement et ki ena so nécessité, alors li fini gagne tout ceki ene dimoune bizin depi dans ça grand le monde-là. Ene doua ki recommandé pou dimandé tout le temps afin ki ene dimoune satisfait avec ça tigite ki li ena :

اللهم قنعنى بما رزقتنى

« O Allah ! Faire moi satisfait avec ceki to fine accorde moi. »

[Extrait de Al Jamiat Vol.7 No.4]