La volonté

Ene kitchose ki normalement paraite difficile, li capave être réalisé avec facilité si ena la volonté. La volonté li vine apartir l’intérêt ki nou ena pou ene kitchose. Si pena l’intérêt veut dire ki pas pou ena volonté aussi et conséquemment facile aussi pou vine difficile.

Nou pou remarqué kitchose ki nou capave faire pou dounia nou pas pé capave faire ça pou nou Deen. Nou accepté pou faire sacrifice pou dounia. Nou accepté pou leve bonheur et marche ene long boute pou prend bus pou alle travail mais nou trouve ça bien lourd et boucou dur pou vine masjid et pourtant masjid li trouve à coté nou la caze. Si nou analyse ça deux-là en terme facilité nou pou trouvé ki bien pli facile pou vine masjid ki alle travail. Mais nou faire li acoze nou trouve nou l’intérêt là-dans. Et vine masjid li bien facile mais nou pas casse la tète avec ça parceki nou pas conne so l’importance. Dans ene hadice Nabi ‎(Sallallaahou A'laihi Wasallam)‎ fine dire ki banne hypocrites si zotte ti conné ki bénéfice ena dans faire namaz Esha et Fajar dans masjid alors sans doute zotte pou donne zotte présence quand même zotte ti bizin rampé pou faire li.

Donc l’essentiel dans tous ça-là c’est développe l’amour pou Allah Ta’ala ki pou crée l’intérêt de Deen et aakhirat dans nou et ça à son tour pou amène la volonté voulue pou pratique Dee. Après ça nou pas pou trouve narien difficile ou ridicule ou bien illogique dans Deen. Nou pou considère ça façon de vive-là ene façon préconisé et apprécié par nou bien aimé réel Allah Ta’ala.

Le développent de l’amour pou Allah Ta’ala li pas vine ene seul coup. Bizin faire ene façon pou gagne li. Nou gagne li à travers nou l’engagement avec certaine pratique de Deen. Nou faire zeffort pou faire nou 5 fois namaz. Nou tire ene ti le temps pou faire zikrullah en forme banne tasbeehaat, Daroud shareef et istighfaar. Nou faire ene manière faire li tous les jours. Nou bizin tire ene le temps pou faire titaawat-ul-Qour’aan. Ene de banne kitchose bien efficace c’est fréquente banne Deendaar. Reste en compagnie banne Deendaar c’est le moyen le plus efficace pou gagne l’amour Allah Ta’ala. Après ene certaine temps ça banne pratique-là pou rente dans nou système ki nou pas pou senti nou à l’aise tanque pas faire li. C’est le point cotte nou capave dire ki nou le cœur fine commence connecté avec Allah Ta’ala.

[Extrait de Al Jamiat Vol.7 No.4]