Connection avec Allah Ta’ala

Connection avec ene ki ou content li vraiment ene source de la joie extra ordinaire. Tout dimoune même envie réalise ene connection semblable. Sans hésitation li capave faire banne dépenses énormes afin pou atteigne ça but-là. Souvent ou capave lire lors journal banne annonces publicitaires ki propose ou pou trouve ou banne vedettes divant ou en chair et en os ou bien diboute avec zotte lors même plateforme. Sans doute ça offre-là li pas ene offre gratuite. Li ene offre payant ki trouve dans la fourchette de Rs 10000/- à Rs 25000/- par personne. Ene somme assez élevé et conséquente. Mais pas pou cela ki dimoune-là pas allé. Dimoune-là li payé sans hésitation à tel points ki billets épuisé mais demande continué ena. Et après avoir débourse ene somme aussi élevé, li pena aukene regret. Au contraire li considère ça spectacle-là ene l’occasion en or ki pou faire li zoine so banne bien aimés. Tout ceki attire so admiration ki trouve dans so banne bien aimés c’est ceki Allah même fine crée dans zotte. Nou capave être n’importe ki de par nou performance, nou talent et nou personnalité mais nou bizin pas blié ki dans tout ceki nou été, nou ene dernier mendiant divant Allah Ta’ala. Nou pé vive entièrement à la merci et générosité de Allah ki li Rabbul-Aalameen. Si ça mendiant-là li capave pé attire et envallir le cœur et l’esprit des milliers de milliers alors ça capave donne nou ene l’idé de ceki capave arrive ene dimoune ki gagne ene ti appreçu de grandeur Allah Ta’ala !!! Allah Ta’ala même c’est la source de tout ceki pé capave émerveille nou en forme beauté, richesse, talent etc. Allah Ta’ala li même ki quantité émerveillant li été !!!

Nou conne beauté ene kitchose par guette li avec nou lizié ki trouve dans nou la tète. Et ça appelle بصارة (baswaarah). Ça tout dimoune ena ça ki permette li admire ene joli kitchose. Acoze ça tout dimoune même ena tendance ébloui et émerveillé par ene simple beauté. Mais la plupart parmi nou manque ça kitchose ki appelle بصيرة (basweerah) c'est-à-dire ça lizié ki trouve dans le cœur. Apprécié beauté, valeur et bienfait de banne pratique de Deen li dépanne lors ça lizié le cœur-là même ki nou appelle li بصيرة. C’est ça même بصيرة ki permette nou senti grandeur Allah Ta’ala. Etant donné ki nou aveugle de par ça rapport-là, acoze ça nou galoupe derrière tout kitchose ki attirant sans prend compte grandeur Allah Ta’ala. Conséquemment li vine difficile pou connecté avec Allah Ta’ala.

Donc li très essentiel ou bien indispensable même pou développe nou ‘Basweerah’ ki trouve à l’intérieur de nou. Et ça li développé, en principe, par reste en compagnie de ene shaikh kaamil.

Ki ene dimoune capave ressenti coumsa dans gagne connection avec Allah Ta’ala ???

Le sens du bien être et ça satisfaction ki ene dimoune senti quand li reste en compagnie de ene ki li extra content, capave finalement donne ene l’idée de ceki capave ressenti dans établir connection avec Allah Ta’ala. C’est zisse ene l’idée sinon en principe ça connection-là li incomparable et inégale ki bizin vive li même pou gagne comprend. Si tout beauté et talents concentré dans ene seul objet, là aussi ça pas pou représente narien divant Allah Ta’ala. Et connection avec Allah Ta’ala li pou dépasse tout ceki capave contenir dans ça objet-là.

[Extrait de Al Jamiat Vol.7 No.4]