Riya

 (عن محمد بن لبيد رضى الله عنه ان النبي صلى الله عليه وسلم قال الخوف ما اخاف عليكم السرك الاصغر قالوا يا رسول الله وما الشرك الاصغر قال الرياء ... (مسند احمد)

« Kitchose ki mo pli peur pou zotte c’est shirk asghar. (Banne Sahaba-e-Kiraam) fine demandé ki veut dire shirk asghar O Allah so Rasool? Nabi ‎(Sallallaahou A'laihi Wasallam)‎ fine repone: c’est Riya. » (Mousnad Ahmad)

D’après ça hadice-là ena ene kitchose ki appelle shirk asghar ki Rassouloullah ‎(Sallallaahou A'laihi Wasallam)‎ fine décrire li par Riya. Riya veut dire faire ene kitchose pou lizié dimoune. Ça genre de pensée-là quand ene dimoune ena li quand li pé faire ene ibaadat, alors li contamine ça ibaadat-là. Allah Ta’ala li pas accepté aukene ibaadat ki fine infecté ou contaminé par virus de Riya. Ene dimoune li bizin ena toujours l’intention pou faire Allah Ta’ala plaisir quand li pé faire n’importe ki ibaadat. Quand li faire ene travail pou so nom marché ou bien pou li gagne valeur dans lizié dimoune, alors li fine mélange ene l’autre kitchose dans so ibaadat ki ti bizin faire uniquement pou le plaisir Allah Ta’ala. Acoze ki li fine associé ene l’autre kitchose avec le plaisir Allah, Rassouloullah ‎(Sallallaahou A'laihi Wasallam)‎ fine qualifié li de shirk asghar. C'est-à-dire shirk mineur. C’est ene genre de shirk ki pas ranne ene musulman mushrik mais li ene kitchose bien détestable et dégoutant. Ene dimoune pareil, li pas gagne aukene récompense pou so banne ibaadat ki li fine faire. Au contraire, d’après ene hadice ki trouve dans Muslim Shareef, Allah Ta’ala pou traine li pas so figure et pou jette li dans l’enfer.

Riya li vine apartir ene kitchose ki appelle Hubbul-Jaah. Et ça signifié content grandeur. C’est ene maladie bien grave. Parmi banne dégâts ki li faire dans ene dimoune, li développe ça vilain manière de riya-là. Et riya à son tour li invalide et annule ene bonne action ki pourtant fine capave faire li avec boucou sacrifice. Et travail-là aussi li capave ene grand travail. Mais li ene virus ki narien pas capave résisté conte ça. Donc ena ene grande nécessité pou combatte ça.

Ça manière content grandeur-là même ki déclenche tous ça-là. Acoze ça d’abord bizin traite ça manière-là même. Par traite ça maladie-là nou pou capave protège nou de ene quantité défaillance à plusieurs niveau y compris riya.

[Extrait de Al Jamiat Vol.7 No.4,7]