Ene virus fatal

Bourik pou reste so bourik. Mille ou maquille li mais so nature pas pou changé. Jamais li pou vine cheval. Insaan pou reste insaan. Créature pou reste so créature. Li capave pretanne être n’importe quoi. Mais jamais li pou vine Khuda. Fir’aun ti pé dire li même أَنَا رَبُّكُمُ الْأَعْلَىٰ « Mo même mo pli grand Rabb pou zotte». Mais nou tous conne résultat. Quand li trouve azaab (punition) pé vine lors li et li pé alle noyé, aster ki li accepté Allah. Mais trop tard. Ena dimoune capave dérapé et arrivé appelle kikene couma bon dieu ou bien ene ti bondié. Mais ça li ene flagrant égarement. Pena aukene tipti ou grand bondié. Ena ene seul Allah ki mérite l’adoration li tout seul. Pena so deuxième ni kit partenaire ou bien collaborateur à n’importe ki niveau.

Allah Ta’ala fine crée insaan avec ene constitution fragile et faible. Li entouré avec toute sorte problème et difficulté. Li ena ene quantité faiblesse. Li pas digne pou ça insaan-là ki li prend li pou grand ou extra ordinaire. Li bizin garde li dans rang ki Allah Ta’ala fine choisir pou li. Faudré pas li dépasse so limite et li pretanne être ceki li pas été. Li pou être jugé d’après ceki li été dans connaissance Allah Ta’ala. Non plus d’après ceki li pretanne être ou bien d’après ceki dimoune pense lors li. Mille ou capave dire ene zélève ki li ceci cela. Mais li pou être classé dans le rang ki examinateur situé li après l’examen.

Allah Ta’ala fine qualifié insaan de Abd ki signifié esclave ou serviteur. Li pas digne pou li ki li alle en dehors de ceki Allah Ta’ala fine tracé pou li. So travail c’est ki li bizin soumette li totalement à Allah Ta’ala avec toute sincérité et humilité. Li pou ena so valeur et so prestige tanque ki li reste dans le cadre ki Allah Ta’ala fine place li. Mais quand li déclare être ceki li pas été, bé là li commette ene grand gaffe ki faire li dépasse limite et sorti en dehors control. En faisant cela, ene dimoune li ranne li de plus en plus détestable. Et pourtant insaan so vrai prestige li trouve dans so humilité. Au lieu pretanne être ceki li pas été, humilité amène ene dimoune pou cachiette so banne mérites. Si ene dimoune li envi ki dimoune conne so banne mérites, ça li déjà ene mauvais l’état d’esprit. Astere si li faire zeffort et ene manière pou dimoune capave conne ça, alors ça li ene degré pli mauvais et pli faille ki le précédent. Ceki pli pire ki ça c’est ene dimoune ki envi gagne ene crédit de ceki li pas été ou bien de ceki li pas fine faire. Tout ça-là c’est différent degré de ene kitchose ki appelle ostentation, cote ene la li pli faille ki so camarade. Le désir pou être reconnu ou être apprécié c’est ene vice et ene maladie grave ki dimane être traité. Li pas ene qualité ki digne à ene musulman. C’est ene manière de ene ki hypocrite plitot. Li mette la sincérité de la personne en question ki pourtant li indispensable pou ene action accepté. Ene zeffort immense et énorme li capave vine sans doute ene zeffort dans vide si pas prend précaution avec ça virus ki li très fatal spirituellement ki appelle Riya.

[Extrait de Al Jamiat Vol.7 No.5]