Ni trône ni couronne

L’honneur li pas ceki dimoune pensé lors ou parceki dimoune capave flatte ou pou ene kitchose ki pas bon même ditout. Par exemple ou capave gagne applaudissement du public en général acoze ou conne chanté ou dansé. Ou bien ou capave être qualifié de reine de beauté ou quelque chose coumsa dans ene concours de beauté. Mais nou tous conné comme ene musulman ki ça banne kitchose-là jamais li ti bon. Ene applaudissement lors ene kitchose ki pas bon pas capave être ene kitchose de l’honneur. Li couma dire ou appelle le titre « pli grand voleur » comme l’honneur acoze ki ou fine dépasse ou banne camarades dans ça domaine-là. Ou capave considère ça comme ene flatterie mais en réalité li ene délit bien détestable. Souvent ou capave tanne ene jeune flatte li même avec ene fierté démesuré pou avoir conne ene quantité copines dans so la vie ki so banne camarade pas fine expériencé. C’est ene stage ki nou capave dire cotte sa le cœur-là même fine fini mort ki dimane être re-animé avec Noor de Imaan. Li ene situation vraiment catastrophique quand vice vine vertu et vis versa. C’est ene situation ki nou pé vive li zordi. Dimoune-là trouve li joli dans faire ene tas grimace lors so la tète, lors so figure et entier le corps. Pena aukene considération pou Deen. Influencé par lezot, nou l’esprit dire nou ki nou pou bizin néglige Deen quelque part pou nou capave paraite pli joli. Et pourtant beauté réelle li trouve uniquement dans la façon préconisé et approuvé par Deen. Grand-grand l’idée et thèmes pé être élaboré et pé débatte dans banne conférences, réunions et banne forum cote dimoune cause grand-grand cozé et cote pé prend banne résolutions. Mais couma dire l’éléphant dans lizié pas pé trouvé. Si fine trouvé c’est fourmi lors montagne !

Dimoune-là fine développe banne théories et banne l’idée mais li fine échoué comprend ki li ena ene Rabb ki li bizin conne vive d’après ceki Li oulé. Li fine échoué pou comprend ki le model parfait c’est nou Nabi ‎(Sallallaahou A'laihi Wasallam)‎. La façon infaillible et le principe dans sur c’est le sounnat de Nabi ‎(Sallallaahou A'laihi Wasallam)‎.  Véritable l’honneur, dignité et prestige si existé quelque part, alors li trouve uniquement dans sounnah de Nabi ‎(Sallallaahou A'laihi Wasallam)‎. Ene fois couronné, jamais ou détrôné parceki ou dignité pas dépanne lors zepaule faible du public ki change-change couleur et tendance. Li ene cadeau de la part Allah Ta’ala. Ki sanla capave teigne ene la lampe ki fine allumé par Allah Ta’ala !

Allah Ta’ala li donne izzat (l’honneur). Li donne izzat à banne ki fidele à li. La fidélité envers Allah li trouve dans amène la vie d’après so banne commandements. Comment ene dimoune capave pretanne être fidele à Allah Ta’ala et so Rasoul ‎(Sallallaahou A'laihi Wasallam)‎ quand tout indique le contraire ! Ki manière ou capave pretanne content kikene quand ou ena ene l’autre dans ou le bras ?

Ki manière ou capave sincère envers Allah Ta’ala quand ou ena ene l’autre dans ou le cœur ? Nou pas pou capave prouve nou sincérité, nou l’amitié et fidélité pou Allah Ta’ala tanque nou pas vine pou li de par nou le corps physique et par nou le cœur. Et ça kitchose-là li réalisable dans ene seul façon. Suive commandements Allah Ta’ala en suivant le noble principe et sounnat de Nabi ‎(Sallallaahou A'laihi Wasallam)‎. C’est là-dans ki ena vrai dignité. Et dans ça façon-là même ki ene dimoune vine vraiment digne et l’honorable.  C’est ene prestige ki pas bizin trône ni couronne.

[Extrait de Al Jamiat Vol.7 No.6]