Nisaab de qurbaani

Le montant de nisaab de qurbaani et zakaat li pareil. C'est-à-dire la quantité ki ene dimoune bizin possédé pou zakaat vine obligatoire lors li, ça même quantité li bizin possédé pou qurbaani appliqué lors li. Mais ena ene ti différence entre les deux. Ena kitchose ki pas considéré dans calcule nisaab de zakaat mais li considéré dans qurbaani. En ceki concerne zakaat, ene dimoune bizin possède la valeur et le montant en forme la monnaie liquide, l’or, l’argent et marchandise de commerce. Apart ça li capave pé possède deux trois la caze, deux trois l’auto ou banne l’emplacement ou banne terrain mais malgré tout ça-là, pas pou ena zakaat lors la tanque ki ça banne kitchose-là pas fine acheté avec l’intention pou revendé.

Mais en ceki concerne qurbaani, bizin guette valeur tout ceki ene dimoune ena dans so possession ki dépasse so nécessité. Par exemple si li ena ene la caze cote li resté et ene l’autre ki reste fermé, alors bizin évalué ça la caze fermé-là. Automatiquement valeur ene la caze pou bizin atteine la valeur de nisaab. Donc li pou bizin faire qurbaani. Coumsa même nou bizin guette tout banne objets ki enplis dans la caze. Si zotte valeur li atteine la valeur nisaab, alors pou bizin faire qurbaani.

[Extrait de Al Jamiat Vol.7 No.7]