Dégradant

Nou bizin assez honnête pou pas déclare conné ceki nou pas conné. Nou bizin ena la décence réfère li à ene ki conné si nou pas conné. Faudré pas nou trouve ça ene déshonneur parceki en vérité déshonneur trouve dans faire grimace. Déclare conné ceki nou pas conné c’est ene grimace. Et nou conne très bien ki sanla ki faire grimace. En tout cas li pas manière ene dimoune ki sérieux.

C’est ene malhonnêteté quand déclare conné ceki nou pas conné. Si nou ena ça dans la médecine c’est nou jaan (la vie) ki vine en danger. Ceki pli grave c’est quand ça vilain manière-là li concerne Deen. Alors c’est nou imaan ki vine en danger. Ça vilain manière-là li vine apartir ene maladie ki appelle Hubbul-Jaah ki veut dire content grandeur. Ene matérialiste ou douniadaar li capave pas conte ça et li digère ça. Mais en parlant de Deen, c’est ene vilain manière ki bien dégradant et dégoutant. Ena des fois li tellement fort dans dimoune ki li dessane à ene niveau cote insaniyyat fini. Pharaon fine déclare conné et capable de ceki li pas ti été. Ziska ki li déclare li même « Rabb ». C’est ene degré très avancé de jahaalat et ignorance même ki amène ene dimoune dans ene situation semblable cote dimoune-là li dégrade li dans cherche grandeur et l’honneur. Et sans conné ki li fine tombe dans la bassesse par déclare superbe et grand divant ene Allah ki incomparable et inégal.

Jaah ou bien grandeur li appartenir à Allah Ta’ala. Celui ki envi gagne ça li couma dire ene ki pé rivalise li avec  Allah Ta’ala. La rivalité li ranne ene dimoune détestable à tel point ki ça capave coute li so destruction totale ou même so la vie aussi. Ki position ene dimoune ki faire ça avec Allah Ta’ala ki ena pouvoir et capacité lors tout kitchose ?

Conséquence ça dimoune-là li boucou pli grave et sérieux ki ceki ene personne capave attane de la part de so rival dans dounia. Quant à dans akhirat, selon ene hadice ki trouve dans Sahih Mouslim, Allah Ta’ala pou jette li dans difé l’enfer. Et selon ene hadice de Tirmizi, li pou présente divant Allah Ta’ala dans dimension ene fourmi jour Qiyaamah. Et li pou gagne dipus banne jahannami pou boire. Ene particule narien ditout de ça manière-là pou suffit pou empêche li rente dans jannat.

[Extrait de Al Jamiat Vol.7 No.7]