L’ennemi

Ene l’ennemi jamais li pou content ou bonheur. Tout le temps li pou oulé à tout prix faire ou ditort. Et ou aussi quand ou conne kikene ki li ou l’ennemi, alors ou pou prend ou précaution. Ou pou toujours ena méfiance pou li. So banne bon cozé aussi pas pou attire ou. Ou pou considère ça comme ene piège.

Ene dimoune li ena ene quantité l’ennemi dans so la vie. Et li ena raison ki li bizin reste toujours lors so garde. Si ça li vrai et plausible, alors pena narien pli plausible ki ça ki nou bizin méfié shaitaan parceki c’est Allah Ta’ala ki faire nou conné ki li nou l’ennemi. Ene l’ennemi ki pena doute. Allah Ta’ala donne nou l’ordre pou nou prend li pou nou l’ennemi. Shaitaan jamais li ti content nou. Ene seul kitchose ki li extra content. Li content nou destruction et nou malheur. Li fine faire serment pou détruire nou. Li pas pou satisfait tanque li pas faire nou rente dans l’enfer.

Mais insaan li prend so semblable pou l’ennemi. De l’autre coté li faire camarade avec so pli grand l’ennemi ki sans doute li so l’ennemi. Li faire camarade avec shaitaan. Banne travail couma boire l’alcool, joué dans casino, joué le course, coquin, coze menti, mange l’intérêt, faire transaction l’intérêt, zina etc. c’est banne travail shaitaan. Shaitaan attire dimoune pou faire ça banne travail haraam-là. Li embellir ça dans lizié dimoune. Et dimoune-là gagne embêté et li tombe dans so piège. Voila couma shaitaan faire nou ditort. Li prive nou de nou bien être dans dounia pou faire nou tombe dans ene quantité vice. Et ene quantité fine fini condamné pou souffert pou tout le temps. Li pé encore faire so zeffort pou nuire nou la vie. Si nou pas prend précaution, li capave faire nou souffert pou tout le temps.

Qui Allah Ta’ala protège nou de ene calamité pareil ki pas pou ena aukene solution. Précaution-là nou prend par attrape Deen. Parceki c’est necque Deen même ki garanti insaan so bien être dans dounia et dans aakhirat. Ene bien être ki pou duré pou tout le temps.

[Extrait de Al Jamiat Vol.7 No.8]