Hijrah

Hijrah li réfère à ça déplacement ki banne Sahaba-e-Kiraam ti faire depi Makkah à Madinah pou sauve zotte Imaan et zotte Deen. A l’époque, ça ti ene kitchose très essentiel. Ti pé considère ça comme ene ligne de démarcation entre sincère et non sincère. Ene ki pas ti disposé pou déplacé sans aukene raison valable pas ti pé être considéré comme ene musulman sincère.

« … Et banne ki fine amène imaan mais pas fine faire hijrah, alors ou pena aukene responsabilité envers zotte acoze le lien familial tanque ki zotte pas faire hijrah … » (V72/S8)

Ça déplacement-là pas ti facile. Ene dimoune ki ti oulé faire li, ti bizin disposé quitte so la famille, so dibien et tout dans Makkah et necque prend so le corps li sorti et ça aussi clandestinement. Donc li ti bien difficile. Mais chakene so visé li différent. Banne Sahaba-e-Kiraam zotte visé principal et zotte but primordial c’était aakhirat. Donc zotte fine accepté subir tout pou atteine li pareil couma nou accepté subir tout pou gagne dounia. Par ça déplacement-là zotte fine réussi établir dans ene façon tangible et matérielle ki zotte content Allah Ta’ala et so Rasoul ‎(Sallallaahou A'laihi Wasallam)‎ plis ki tout kitchose. Si ti ena kitchose ki ti capave sacrifié chaque goutte di sang de zotte le corps pou li, c’était Allah Ta’ala et so Rasoul ‎(Sallallaahou A'laihi Wasallam)‎. Et hijrah ti ene indication visible pou ça l’état d’esprit ki ti encré au fond de zotte. Banne ki fine faire ça déplacement-là fine appelle zotte Mouhajir et ça l’événement-là fine amène ene grand tournure dans l’histoire de l’Islam. Et c’est apartir là même ki le calendrier Islamique fine commencé. Ça mois de Mouharram-là c’est le commencement de 1437 Hijri. Ça signifié fine ena 1437 banané depi ki ça déplacement de Makkah à Madinah fine ena lieu.

Apres la conquête de Makkah, ça déplacement-là ti nepli ene obligation. C'est-à-dire quitte Makkah pou alle établi dans Madina ti nepli obligatoire parceki Makkah aussi ti fini vine sous bannière de l’Islam cote dimoune ti libre pou pratique so Deen avec liberté et tranquillité. Mais ça principe-là li pou toujours en vigueur cote ene dimoune nepli senti li libre pou pratique so Deen. Alors d’après so capacité, li pou obligé bougé alle dans ene l’endroit cote li gagne ça liberté-là.

Ena ene l’autre kitchose pli essentiel et extrêmement important ki trouve au fond de ça déplacement-là. C’est le déplacement de l’emprise de shaitaan pou vine sous soumission totale de Allah Ta’ala. Ça c’est l’esprit même de hijrah et c’est ça même le véritable hijrah. Dans ene hadice, Nabi ‎(Sallallaahou A'laihi Wasallam)‎ fine dire :

"... والمهاجر من هجر ما نهى الله عنه"

« … Le véritable mouhajir c’est ene kikene ki fine quitte tout ceki Allah Ta’ala fine interdit. »

C’est ene façon pou levé comme mouhajir jour qiyaamah sans subir difficulté déplacé de Makkah à Madina dans banne conditions pénible et atroce.

Le mois de Mouharram li bizin servi pou faire nou rappel ça message de soumission-là. Et li ene l’occasion pou chaque musulman renouvelé so l’engagement avec so Créateur pou vive dans so l’obéissance et so soumission.

[Extrait de Al Jamiat Vol.7 No.8]