Direction opposée

Ou occupe ene poste assez important. Ou ena ene quantité dimoune travail enba ou. Et ou capave prend banne mesures et sanctions contre banne ki pas suive ou banne directives. Acoze ça, banne dimoune ki travail enbas ou, zotte peur ou et zotte exécute ou banne l’ordre. Zotte pas envi gagne problème avec ou. Ena des fois ou capave explosé de colère aussi si zotte faire banne gaffes. Malgré tout ceki ou capave faire, eski ou fine déjà ranne ou compte ki ou capacité li limité ? Ena plis ki ça ceki ou pas pou capave faire malgré ou pou envi faire li. Donc ou incapable à plusieurs niveau et ou capacité li bien restreint et limité. Malgré tout, ou banne travailleurs peur ou. Et ça même arrivé dans tous banne secteurs et tous banne départements.

Eski ou fine déjà calculé ki couma ou ene patron pou ou banne employés, coumsa même ou aussi ou ena ene patron. Pas necque ou patron mais patron de tous banne ministres, premier ministres, présidents, le roi, la reine et patron de tout ceki existé ? C’est le vrai patron et c’est Allah Ta’ala. Si nou croire ki nou ena droit en colère et prend sanction contre nou banne employés en cas si zotte pas suive nou directives, alors Allah Ta’ala aussi li en colère quand nou pas obéir li et li capave sanctionne nou. Et li pli ena ça droit-là ki nou, nou ena lors nou banne employés. Parceki li nou Créateur et li même ki fourni nou tout ceki nou bizin. Nou doit li reconnaissance pou tout ceki nou été et pou ceki nou ena. Et sans blié ki Allah Ta’ala ena capacité lors tout kitchose. Alors li capave prend sanction ki li envi et quand li envi. Pena narien ki capave arrête li ou empêche li. Si nou pas obéir li bé coumaniere nou oulé ki nou madame zenfants obéir nou ? Coumaniere nou oulé ki tout kitchose reste dans l’ordre ? Coumaniere nou oulé ki tout travail vine bon ? Selon ene hadice, Allah Ta’ala même ki organise travail ene dimoune ki vive pou aakhirat. Et vive pou aakhirat li vine par vive dans l’obéissance Allah Ta’ala. Donc solution-là li trouve dans ene seul kitchose. C’est vive dans l’obéissance Allah Ta’ala.

Pou inculqué la volonté vive dans l’obéissance Allah Ta’ala, li sufi pou mette bien dans nou la tète ki le but ki nou envi atteine par casse l’ordre Allah Ta’ala, nou capave atteine li pli facilement et pli efficacement par respecté banne l’ordre Allah Ta’ala. D’ailleurs ceki nou gagné par casse l’ordre Allah Ta’ala li dénué de bénédiction et barakat. Si ou fine rente dans transaction l’intérêt pou faire ene la chambre climatisé, ça pas veut dire ki ou fine gagne ou confort et ou tranquillité. Tranquilité li ene kitchose apart ki pas trouve aukene part. Li pas trouve dans banne zeffets matériel. C’est ene kitchose ki Allah Ta’ala fine garde ça dans so l’obéissance. Dans cherche li par casse l’ordre Allah Ta’ala, nou pé bouge dans ene direction opposée à nou destination.

[Extrait de Al Jamiat Vol.7 No.8]