Taqwa et le succès

Taqwa veut dire l’obéissance Allah Ta’ala. L’obéissance Allah Ta’ala li réalisé par implémente commandements Allah Ta’ala en suivant le tareeqah et principe de nou bien aimé Nabi ‎(Sallallaahou A'laihi Wasallam)‎. Et dans ene langage simple, ça même ki nou appelle suive Deen.

Suive Deen ki Nabi ‎(Sallallaahou A'laihi Wasallam)‎ fine amené de coté Allah Ta’ala li garanti nou bien être dans dounia et dans aakhirat. C’est ene moyen pou resoude tous nou banne problèmes et ki tire nou de toute sorte difficulté. Li ene moyen pou faire nou gagne tous nou banne nécessités dans ene façon ki nou pas attane. Qour’aan-e-Kareem et hadice de Nabi ‎(Sallallaahou A'laihi Wasallam)‎ rempli de banne l’exemples cote Allah Ta’ala fine toujours accorde so aide dans banne situation bien difficile à banne ki fine sincère envers Li. Mais ki pas capave arrivé si Allah Ta’ala oulé ! Allah Ta’ala capave faire difé pas brulé. Allah Ta’ala capave empêche de l’eau pas noyé. Allah Ta’ala capave faire banne zanimau féroce couma lion vine docile et inagressif pou banne ki ena taqwa. Tous ça-là fine déjà arrivé et ki capave arrivé zordi jour aussi et ça possibilité-là pou continué existé tous le temps. Li pas ene kitchose du passé ou archaïque. N’importe ki sanla ki ena ça genre de taqwa-là pou bénéficié ça privilège-là.

Taqwa et la noblesse

La vrai noblesse li trouve dans taqwa. Dimoune pli noble c’est dimoune ki pli obéissant et pli deendaar. Pli ene dimoune li néglige Deen, pli li disqualifié li même d’être noble. L’honneur sans Deen c’est ene illusion, ene mirage ou ene maquillage. Combien kitchose ena ki brillé mais ki pas l’or. Tout l’honneur li pas l’honneur. Li capave ene ressemblance ou ene imitation. Ene le roi li ene le roi quand même li dans ene simple l’habillement mais ene mendiant pas pou vine le roi quand même ena ene couronne ki pé brillé lors so la tète. L‘or pou reste l’or quand même li couvert avec la terre et la poussière. Et bourrique pou reste bourrique même quand même fine mette fourreau cheval lors li. Banne ki dévoué à Allah Ta’ala, c’est zotte ki banne le roi sans couronne malgré zotte l’apparence avarié, abimé et zotte linge casse cassé laisse zotte passe inaperçu de regard du public.

Taqwa - pli grand ibaadat

Quand nou cause ibaadat, toute suite namaz roza, tilawat ki vine dans nou l’esprit. Et quand nou dire ibaadat guzaar ou parhezgaar ou bien pieux, alors toute suite nou pense ene dimoune ki observe namaz, roza, tilawat en abondance. Pena doute, ça banne pratique-là zotte ena zotte valeur ki nou tous conné. Pas capave dire narien lors-là. Mais ena ene l’autre niveau de ibaadat ki dépasse ça niveau de ibaadat-là. Dans ene hadice Nabi ‎(Sallallaahou A'laihi Wasallam)‎ fine dire :

"اتق المحارم تكن اعبد الناس"

« Abstenir de banne mahaarim (pratiques interdites dans shariah), to pou vine ene celui ki pli ena ibaadat parmi banne dimounes … »

C'est-à-dire pas casse la loi Allah Ta’ala et pas faire péché li faire ene dimoune qualifié de pli grand ibaadat guzaar. Parceki ene dimoune ki pas casse l’ordre Allah Ta’ala pou exécute banne commandements et pou abstenir de tous banne kitchoses ki empêché. Sans doute li pou pli bon ki ene dimoune ki faire ene quantité ibaadat mais ki pas évite banne péchés. Ene dimoune li accomplir so faraz, wajib et sounnat et li pas engagé dans aukene péché, ça dimoune-là li boucou pli bon ki ene ki faire ene quantité ibaadat mais ki continué faire so banne péchés. Vaut mieux évite ene péché dans dimension ene atome ki faire ene tas ibaadat couma ene montagne. Donc pli grand ibaadat c’est pas faire péché. Et c’est ça même le niveau pli élevé de taqwa.

Couma gagne taqwa ?

D’après ene hadice, ene dimoune ena tendance copié so camarade ki pli intime. Acoze ça Nabi ‎(Sallallaahou A'laihi Wasallam)‎ conseille nou pou guette bien avant faire camarade avec kikene parceki ene dimoune li gagne manière ene camarade ki li fréquenté. Donc fréquentation c’est ene moyen ki faire ene dimoune gagne bon ou mauvais manière. Alors si nou fréquente ene bon dimoune, nou pou apprane bon manière et nou pou développe bon caractère. Coumsa même fréquente ene personne ki ena taqwa, li développe taqwa. C’est ça même façon pli efficace ki ena pou développe taqwa depi tout le temps. Dimoune ki ou choisir pou reste dans so compagnie, li bizin ene dimoune ki ena ene quantité connaissance ki permette li pratique so Deen convenablement et li bizin ene kikene ki so comportement li irréprochable. Pou cela li bizin ene personne ki banne ‘Oulama dans so alentour accepté li et approuve li dans so connaissance et so façon. Zotte reconnaite li comme ene personne sérieux dans Deen. Faudré pas faire erreur galoupe derrière ene kikene ki le public accepté li mais ki malvu par banne ‘Oulama.

Faveur Allah Ta’ala lors banne Mouttaqui

Ena banne faveurs et privilèges ki ene dimoune pieux gagne de coté Allah Ta’ala ki lezot pas gagné. Parceki Allah Ta’ala li vine pou celui ki vine pou Allah Ta’ala. Couma vine pou Allah Ta’ala ? Ene dimoune li vine pou Allah Ta’ala quand li vive pou le plaisir Allah Ta’ala. Li necque faire ceki Allah Ta’ala content. Li capave extra content ene kitchose et li senti li attiré vers ça mais jamais li pou satisfaire so désir si ça li déplaire Allah Ta’ala. Dans ça stage-là Allah Ta’ala vine le bien-aimé réel pou li. Alors la personne li sacrifié li même, so dibien et tout pou faire Allah Ta’ala plaisir. Concernant ça genre de personne-là Allah Ta’ala déclaré :

"... وان سئلنى لاعطينه ولئن استعاذنى لاعيذنّه ..."

« … Si li dimandé, sans doute Mo pou accorde li et so li dimane moi protection, sans doute mo pou protège li … ».

C'est-à-dire Allah Ta’ala li accorde li so requête et donne li protection ki li dimandé. Dimoune li gagne so bien-être quand so la vie, so l’honneur, so du bien et so la famille li protégé. Donc ene dimoune li gagne ça bien-être là par être obéissant et sincère à Allah Ta’ala. Ceki ene dimoune pas capave gagné par zeffort immense, ene dimoune bien dans Deen capave gagne li facilement dans ene façon miracle. Nou trouve ça banne faveurs-là dans la vie banne Sahaba-e-Kiraam, banne Tabeines, Taba-Tabeines et banne personnages pieux en général. Pena aukene l’époque ki manque banne l’exemple pareil.

Allah Ta’ala fine protège Hazrat Ibraheem ‎(Alaihis Salaam)‎‎ de ene grand difé ki so peuple ti jette li là-dans. Hazrat Yunus ‎(Alaihis Salaam)‎‎ fine être protégé dans ventre poisson. Hazrat Yusuf ‎(Alaihis Salaam)‎‎ fine reste sain et sauf dans puit ki so banne frères ti jette li là-dans. Allah Ta’ala fine ouvert chemin pou Hazrat Moussa ‎(Alaihis Salaam)‎‎ dans la rivière et fine noye so l’ennemi Pharaon dans ça la rivière là même. Hazrat Mariam ‎(Alaihis Salaam)‎‎ ti pé gagne banne fruits contre saison et pourtant li ti renfermé dans ene l’endroit cote personne pas ti ena aukene l’accès apart so mamou Hazrat Zakariyyah ‎(Alaihis Salaam)‎‎.

Hazrat Khubaib (R) ti emprisonné cote banne mousrik de Makkah. Banla ti enchaine li. Mais li ti pé gagne gros gros grappe raisin ki li ti pé mangé sans kikene rente cot li. Pourtant pas ti ena raisin dans Makkah. Banne kaafir fine mette Hazrat Abou Muslim Al-Khawlaani (R) dans difé mais par l’ordre Allah difé pas fine faire li narien. Au contraire zotte fine trouve li pé dibouté dans difé pé faire namaz. Donc tout kitchose trouve dans la main Allah Ta’ala. Celui ki vine pou Allah Ta’ala, alors Allah Ta’ala faire défavorable vine favorable pou li. Tout banne problèmes resoude et tout vine dans l’ordre.

[Extrait de Al Jamiat Vol.7 No.9]