Eski li Moubaah ?

Moubaah c’est ene degré de l’autorisation. Ene pratique li reste Moubaah (autorisé) tanque li pas nécessite néglige ene principe de Deen. Coumsa même li pou reste Moubaah tanque li pas vine ene moyen pou tombe dans ceki pas permette. Si nou faire khutbah dans ene l’autre langue, bé sans doute li pou nécessite pas faire li en arabe. Donc à ce stade nou bizin conne l’importance faire khutbah en arabe. Nou tous conné ki Nabi ‎(Sallallaahou A'laihi Wasallam)‎ so banne khutbah ti en arabe. Jamais Nabi ‎(Sallallaahou A'laihi Wasallam)‎ fine faire li dans ene l’autre langue. Après Nabi ‎(Sallallaahou A'laihi Wasallam)‎, banne Khulafa-e-Rashideen et banne Sahaba-e-Kiraam en général et banne Tabeines et Taba Tabeines zotte tous fine toujours faire khutbah en arabe. Pena narien ki dire le contraire.

Pena aukene hadice ki dire gagne droit faire li dans ene l’autre langue. Coumsa même pena aukene hadice ki dire ki pas gagne droit faire li dans ene l’autre langue. Mais banne ‘Oulama fine déduire ki ça pas gagne droit apartir la pratique de Rassouloullah ‎(Sallallaahou A'laihi Wasallam)‎, banne Sahaba-e-Kiraam et banne Tabeines. Par exemple tout le temps zotte fine trouve Nabi ‎(Sallallaahou A'laihi Wasallam)‎ faire khutbah en posture diboute. Coumsa même zotte fine trouve Nabi ‎(Sallallaahou A'laihi Wasallam)‎ faire 2 khutbah. Similairement zotte fine trouve Nabi ‎(Sallallaahou A'laihi Wasallam)‎ faire ene pause par assise entre les deux khutbah. Tous ça-là fine amène zotte pou comprend ki c’est banne principes ki bizin observé et ki faudré pas négligé dans ene façon délibéré. Si ça li vrai et tout à fait normal pou prouve ça banne pratiques-là, alors li bizin pareil pou la pratique faire khutbah en arabe aussi. Le fait ki khutbah fine toujours faire en arabe depi tout le temps, li ene indication ki bizin faire li dans ça même façon. Ça fine continué en arabe de tout le temps malgré ti ena banne circonstances ki ti dimane faire li dans ene l’autre langue. Mais jamais kikene fine faire li dans ene l’autre langue apart langue arabe. Alors ça fine amène banne ‘Oulama pou comprend ki khutbah bizin faire en arabe. Essaye pou faire li dans ene l’autre langue apart arabe afin pou ki banne dimoune comprend, li pas narien plis ki ene prétexte. Pas capave donne ça prétexte-là priorité au détriment de la langue arabe. Donc faire li dans ene l’autre langue apart arabe, li nepli reste Moubaah parceki li nécessite néglige ene sounnat de Nabi ‎(Sallallaahou A'laihi Wasallam)‎ ki fine être pratiqué de génération en génération. Donc c’est ene pratique strictement indésirable.

[Extrait de Al Jamiat Vol.7 No.10]