Ene seul talaaq

Nou pas marié pou ene jour deux jours. Quand marié, nou marié pou la vie la mort. Acoze ça, en principe li ene erreur pou pense pou donne talaaq. Mais parfois bizin faire ça ‘erreur’ là pou corrige ene l’autre erreur ki pli grave. Et ça nou faire li par donne talaaq. Acoze ki en principe c’est ene kitchose inappréciable, bizin servi li le minimum ki capave. Le minimum c’est ene seul talaaq. Ça ene seul talaaq-là li sufi pou sépare ene couple quand même les deux parti pena aukene l’intention pou retourné plitard. Ça ene seul talaaq-là li sufi pou permette madame-là faire so l’avenir après ki so iddat fine traversé. Dimoune croire ki bizin absolument donne trois talaaq même pou séparé. Mais li ene erreur. Combien dimoune ena ki fine faire ça erreur irréparable donne trois talaaq-là. Ça même dire ki pas écoute tout ceki dimoune dire. Chaque domaine ena so dimoune ki capave donne renseignement approprié. Bizin apprane Deen avec banne ki fine apprane Deen dans ene façon professionnelle avec banne professionnel dans Deen. Sinon ou pou séparé cote capave réparé ou bien ou pou rode réparé cote bizin séparé. Donc comme principe pas pense pou donne talaaq. Mais si ena nécessité même pou donné, alors donne ene seul talaaq. Et ça aussi donne li dans ene période de propreté ki ou pencore alle dans ménage avec li. Quand ou fine donne li ene talaaq, alors ou madame pou bizin observe iddat pendant trois période. Dans ça façon donne talaaq-là ou pou ena droit reprend li dans ou nikah sans renouvelé nikah avant ça trois période-là traversé. Mais si jamais ça trois période-là fine traversé sans ou fine reprend li dans ou nikah, alors ou madame pou sorti en dehors nikah. Aster si les deux parti envi retourné, alors zotte capave retourné mais zotte bizin renouvelé nikah. Guette ki quantité facilité shariat fine donne nou. Mais nou alle mette nou même dans grand difficulté par donne tous les trois talaaq ene seul coup et nou alle ferme la porte pou tous le temps. Après ça ou galoupe ici laba pou trouve ene solution cote pena solution. Finalement kikene vine dire ou ki trois-là li compte ene seul. Ou conne très bien ki ça kitchose-là pas bon mais ou déclare pas conné. Ou tourne le dos avec la vérité et ou alle choisir pou vive dans calamité pou tous le temps. Ki Allah Ta’ala protège nou tous.

Vaut mieux reste sans ena mangé ki ou pas capave mangé malgré ou ena mangé.

[Extrait de Al Jamiat Vol.7 No.10]