La bonne direction

Si ou dans la bonne direction, alors ou capave arrive lors ou destination par ene seul pas aussi. Mais entier la vie aussi pas pou sufi pou amène ou lors ou destination si ou fine mal prend direction. En parlant de Shariat et de Deen, Rassouloullah ‎(Sallallaahou A'laihi Wasallam)‎ so sounnat c’est la bonne direction pou faire ene dimoune arrive sain et sauf lors so destination avec facilité.

Quant à bid’ah, ki li en direction opposé avec sounnat, li pas contribué narien apart éloigne ene dimoune de so destination. Chaque pas li servi li ene moyen pou éloigne li de so destination. Non seulement la personne li fatigue li dans vide mais li prive li de shafaa’at de Nabi ‎(Sallallaahou A'laihi Wasallam)‎ par alle à l’encontre de so sounnat. Donc li très important pou accomplir banne ibaadat en observant le Moubaarak tareeqah de Nabi ‎(Sallallaahou A'laihi Wasallam)‎. Faudré pas nou servi nou logique pou suggère ene façon pou faire ibaadat.

Ene pratique si li ene ibaadat, alors li bizin ena ene façon sounnat aussi pou faire li. Nou bizin trouve li dans l’enseignement de banne Sahaba-e-Kiraam et banne Tabeines. Nou gagne ça banne kitchose-là avec boucou facilité dans recherche ki banne fouqaha (juristes) ki conne pli bien le degré de chaque pratique et la façon pli approprié de chaque pratique. Donc c’est zotte même ki mérite suive zotte.

Le Noor-e-Baseerat (noor interne) ki Allah Ta’ala fine accorde zotte, permette zotte analyse ene pratique minutieusement au fond et de tous so banne l’angles. Non seulement zotte guette ene pratique dans so contexte actuel mais zotte prend en considération couma ça pratique-là pou évolué et pou développé et ki forme ki li capave prend dans l’avenir. Donc parfois nou capave trouve zotte empêche ene pratique bonheur même malgré ki li capave paraite efficace et intéressante. Zotte agir vite afin ki li pas trop tard quand li fini faire so racine et fini prend grand l’ampleur.

Banne fouqaha couma Hazrat Imam Abou Hanifah (R), Hazrat Imam Malik (R), Hazrat Imam Shafi (R) et Hazrat Imam Ahmad Bin Hambal c’était banne ki fine préserve frontière de Deen contre tous banne perverses, déviationnistes et banne innovateurs. Zotte fine toujours agir comme ene forteresse contre tous banne ki fine essaye ajouté ou retiré dans Deen. Zotte fine présente Deen dans so forme réelle et originale. L’interprétation et implémentation correcte de Deen li trouve dans zotte l’enseignement.

De l’autre coté banne Mashaa’ikh et banne guide spirituel fine concentré dans faire reformation par débarrasse l’âme de so banne maladies couma l’arrogance, l’orgueil, la jalousie, l’égoïsme, la vanité etc. Si nou guette bien, ça branche-là li pli essentiel ki tous et malheureusement ça même branche ki pli négligé. Ziska banne ki conne so l’importance et indispensabilité couma banne ‘Oulama aussi pas fine donne li l’importance ki li bizin. Li important et indispensable ki ça li développe la volonté pou applique correctement ceki ene dimoune conné. Parfois ene dimoune conne ene kitchose mais soit li applique li ou bien li applique li d’après so l’intérêt personnel. Ça branche-là li corrige ça banne anomalies-là et faire ene dimoune applique shariah pou le plaisir d’Allah Ta’ala avec la sincérité. Ena des fois ene certaine pratique capave paraite désavantageux mais à jamais ça pas pou vine ene obstacle pou applique li pou ene dimoune ki fine faire traite li de so banne maladies.

Ene dimoune ki fine traite li, jamais li pou hésité pou rétracté si li arrivé trouve so erreur. Li pou trouve so l’honneur dans rétracté et déshonneur dans persisté. Li conte ikhlaas et la sincérité ki ene dimoune li insisté et persisté lors so erreur malgré ki li conné ki li dans l’erreur. Apres ene bon traitement sous supervision ene guide spirituel compétent, ça genre de dérapage-là li diminué à ene degré tres considérable.

Voilà c’est ça même la bonne direction. Sans ça li difficile ou même impossible pou tini l’équilibre. Or siraat-ul-moustaqeem trouve dans ça l’équilibre-là même. Ça l’équilibre-là li trouve dans suive strictement banne fouqaha et banne mashaa-ikh.

[Extrait de Al Jamiat Vol.7 No.11]