Prisonnier

Ena banne dimoune ki trouve derrière barreau dans prison ki nou reconnaite zotte comme banne prisonniers. Ena ene l’autre catégorie ki circule librement en dehors avec tout dignité et l’honneur. Mais pas acoze ça, zotte banne dimounes libre. Zotte aussi zotte enchainé dans ene certaine façon. Zotte banne prisonniers de zotte vices et de zotte passions. Ça genre de prisonniers-là zotte boucou plis ki banne derrière barreau. Couma ou croire, ene dimoune capave considère li libre si li pas libre de par so l’intérieure et so conscience ? Ene personne vraiment libre c’est ene personne ki ena la volonté pou résisté conte so banne passions et so banne désirs. Et ça li pas réalisable tanque li pas soumette li totalement à l’obéissance divine.

Faudré pas ene dimoune croire ki au nom de la liberté li capave permette li faire ceki li envi. En réalité ça genre de notion-là li fini par ranne la personne ene dernier prisonnier. Li vine ene prisonnier ki prive li de so bien être dans dounia et dans aakhirat. Par contre ene personne ki agir comme ene prisonnier sans être ene prisonnier par résisté contre so banne vices et contre la bassesse de immoralité et de l’indécence, li jouir la vrai liberté.

[Extrait de Al Jamiat Vol.7 No.11]