Salaf-e-Saliheen et Khatmul Qur’aan

Selon Hakim Abou Abdullah, Imam Bukhari (R) ti p récite 20 versets dans chaque rakaat de taraweeh ki li ti pé faire avec jamaat.

Li ti ena l’habitude lire 1/3 à ½ Qur’aan-e-Kareem dans l’heure sehri. Dans ça façon-là li ti pé termine ene Qur’aan dans chaque 3 jours dans l’heure sehri. Apart ça li ti pé faire ene khatmul Qur’aan dans la journée ki li ti pé termine dans l’heure iftaar. (Muqaddamah Fathul-Baari)

Ena différent nombre de khatmul-Qur’aan ki Salaf-e-Saliheen ti ena l’habitude faire tout les jours. Pli boucou ceki fine être rapporté c’est 8 khatmul-Qur’aan par jour. C'est-à-dire 4 dans la journée et 4 pendant la nuit. Ena ki ti pé faire 4 couma ena ki ti pé faire 3 ou 2 khatmul-Qur’aan par jour. Mais la plupart banne Sahaba-e-Kiraam zotte ti pé faire Khatmul-Qur’aan dans 7 jours.

Hazrat Mansoor Bin Zaazaan ti ene célèbre tabei. Li ti ena l’habitude faire ene khatmul-Quraan entre Zohar et Assar. Et ene l’autre khatmul-Qur’aan entre Maghrib et Esha. Pendant le mois de Ramadhan Shareef, li ti pé faire 2 khatmul-Qur’aan et ene tigite encore entre Maghrib et Esha. A noté ki dans le mois de Ramadhan zotte ti pé retarde l’heure namaz Esha ziska ¼ la nuit. Selon Allamah An-Nawawi (R), Ibn Abou Dawood (R) fine rapporté avec ene chaine de narration authentique ki Hazrat Moujahid (R) ti pé faire ene khatmul-Qur’aan entre Maghrib et Esha pendant le mois de Ramadhan.

Quant à banne ki fine récite entier Qur’aan dans ene seul rakaat, nou ena Hazrat Usmaan ‎(Radiyallahou anhou‎)‎‎, Hazrat Tameem Daari ‎(Radiyallahou anhou‎)‎‎, Hazrat Saeed Bin Joubair ‎(Radiyallahou anhou‎)‎‎ etc.

Faire ene quantité travail dans ene bien tigite le temps li vine par barakat ki Allah Ta’ala mette dans le temps. Li pas trop longtemps quand dimoune ti pé trouve le temps passe bien lente. Ti pé prend assez le temps pou ene jour, ene semaine ou ene mois traversé. Par contre zordi jour, couma batte lizié ou retrouve ou dans mois décembre. D’ailleurs ena dans hadice ki ene l’époque pou arrivé avant qiyaamat quand ene banané pou passe couma ene mois, ene mois couma ene semaine et ene semaine pou passe couma ene jour. Et ene jour couma ene heure temps.

Donc li tout à fait possible si banne Salaf-e-Saliheen fine capave faire plusieurs khatmul-Qur’aan ziska 8 khatmul-Qur’aan aussi dans ene seul jour ou bien fine capave faire ene khatmul-Quraan dans ene ti l’intervalle entre Assar et Maghrib ou entre Maghrib et Esha. Ça li arrive par karaamat (miracle) ki Allah Ta’ala li accorde so banne serviteurs privilégiés. Narien pas impossible ni difficile pou Allah Ta’ala.

[Extrait de Al Jamiat Vol.7 No.11]