Couma Faire Hadj

PREFACE

Tout louange pou Allah Ta’ala et salaat-o-salaam lors nou Habeeb Mouhammad (Sallallaahou A'laihi Wasallam). Depi assez longtemps, nou ti pé senti la necessité pou presente ene ti livret lors Hajj dans ene langage facile afin ki ça capave servi comme ene guide pou nou banne Hajis. Al-Hamdoulillah, Allah Soub-haanahou Wa Ta’ala fine realise ceki nou ti pé pensé pou faire depi longtemps par so grace et so faveur. Nou pas pre tanne ki ça l’ouvrage-là fine fini terminé. Ena boucou encore bizin faire. Peut-etre ça capave servi comme ene repere pou banne freres ki pou oulé poursuive ça travail ki nou fine commencé-là !

Ki Allah Ta’ala accepté nou tous pou servi so Deen dans la façon ki li content et li satisfait ! Ameen !

10, Shawwaal 1423 H

5 Dec 2002

17, Goomany Street

Port Louis

Hajj

Hajj signifié visite ou ziyaarat éne lieu vénéré et sacré.

Makkah li éne lieu sacré et Baitoullah Shareef ki trouve là-bas li mérite tout respect. Donc faire ziyaarat de Baitoullah dans banne jours précis en observant certaine principles et certaine pratiques avec l’amour de Baitoullah rempli dans le coeur - ça apelle Hajj. Si éne personne donne so presence dans Makkah sans ki li ena l’amour et respect pou Baitoullah, alors absolument li pas fine faire Hajj. Ça veut dire ki li pas suffi observe certaine principles pou faire éne bon Hajj. Le Haji bizin éprouve l’amour et montré respect pou ça lieu sacré-là aussi.

Comment pou montrer respect et l’amour pou Baitoullah?

Nous faire tawaaf et nous reste engagé dans banne ‘ibaadate couma dou’aa, zikr, istighfaar, tilaawat, etc... Tous ça-là c’est dans l’amour et par l’amour. Et dans respect de ça l’endroit sacré-là nous bizin presérve nous la langue, lizié et garde nous loin de toute sorte de péché. Faudré pas servi banne mots grossiers.

Pendant Ihraam faudré pas servi language érotique jusqu’a même avec ou madame ki halaal pou ou. Avec les autres madames li haraam partout. Dans ça l’endroit sacré-là li pli haraam - surtout dans l’état de Ihraam li encore pli haraam. Faudré pas discuter, quereller ou batailler.

Allah Ta’ala dire:

“... Et celui ki engage li dans Hajj là-dans (dans ça banne mois-là), alors pas bizin ena aukene parole grossier ni kit offense et ni dispute...” (S 2 V 197)

Respect de Baitoullah c’est le respect et la reconnaissance de la grandeur d’Allah Ta’ala

Nous content et nous ena respect pou Baitoullah acoze ki li la caze Allah Ta’ala. Content ça la caze-là c’est en fait content le maitre de la maison. Faudré ena l’amour Allah pou capave ena l’amour pou Baitoullah. Ça veut dire ki bizin ena l’amour Allah pou capave faire éne bon Hajj.

Allah Ta’ala dire:

“... pou le plaisir d’Allah, li obligatoire pou faire Hajj de Baitoullah lors banne dimoune ki ena moyen arrive là-bas...” (S 4 V 97)

Comment developpe l’amour d’Allah Ta’ala?

Allah Ta’ala dire Qour’aan-e-Kareem:

“Dire (O Mouhammad)! Si ou (prétende) content Allah, alors suive moi, Allah pou content ou…” (S 3 V 31)

Ça veut dire ki pou gagne l’amour et l’amitié Allah Ta’ala bizin suive les principles de Rasouloullah (Sallallaahou A'laihi Wasallam).

Ça montré ki éne personne pou capave faire éne bon Hajj, avec éne le coeur rempli de l’amour Allah et respect pou Baitoullah seulement quand li faire li en suivant les principles et les enseignements de Rasouloullah (Sallallaahou A'laihi Wasallam).

Ki Sanla pou montrér nous bannes enseignements de Rasouloullah (Sallallaahou A'laihi Wasallam)?

Sans ki ou conne éne kitchose ou pas capave enseigne li et montré les autres. Et de lot coté éne dimoune pas pou oser alle faire traitement so maladie avec éne personne ki pas trop conne la medecine. Si li pas guette bien li pou mette so la vie ou bien so la santé physique en danger.

Coumsa même, nous bizin contacté banne personalités ki bien versé dans matière de Deen pou nous pas mette nou la santé spirituelle en danger. Banne medecins en matière de Deen c’est banne Fouqahaa (Juristes), banne ki comprend les enseignements de Rasouloullah (Sallallaahou A'laihi Wasallam) pli bien.

Imam Tirmizi (rahmatoul-laahi ‘alayh) dire: “C’est banne Fouqahaa (Juristes) ki comprend pli bien l’interprétation banne hadices.”

Donc bizin comprend et applique banne principles Hajj selon l’interprétation banne ki ena éne bon connaissance de Deen couma banne Fouqahaa, au lieu servi nous propre l’esprit.

Astere pou évite confusion et pou pas tombe dans dilemne, banne savants fine trouvé li pli sage pou suive éne seul Faqih (juriste). Parce ki tous banne l’années nous tandé ki ena beaucoup probleme dans ‘Arafaate. Le jour de ‘Arafaate, chakene amène so l’opinion et so preuve. Or li pas éne l’occasion pou nou rentre dans banne discussions. Là-bas nous ti supposé donne nous maximum le temps dans faire dou’aa et cherche la grâce d’Allah Ta’ala et non pas trouve nous la peine et z’effort dans vide. Donc nous bizin évite toute sorte de discussion et concentré nous, corps et âme, dans la pensée d’Allah Ta’ala.

Acoze ça même nous demande tout banne frères et soeurs sincerement, ki faudré pas zotte ecoute tout dimoune. Dimane éne dimoune ki conné et ki ou ena confiance lors so connaissance et faire ou Hajj d’après so explication.

Ki Allah Ta’ala donne nous la comprehension et la bonne volonté!!!

Lors ki sanla hajj li obligatoire?

Hajj li ene pilier fondamental de l’Islam pareil couma namaz, roza, zakaat, zotte banne piliers fondamental de l’Islam. Li obligatoire lors ene personne ki majeur et ki ena le moyen.

Ki veut dire “ena le moyen”?

Ena le moyen veut dire:

ki li ena le moyen pou paye so transport pou alle Makkah, Mina, Arafaate et retourne so la caze. Dans nous contexte, ça veut dire ki li ena le moyen paye so billet d’avion aller-retour pou alle Makkah, paye so transport pou alle dans banne lieux couma Mina et Arafaate.
ki li ena le moyen ki permette li gagne so banne nécessités pendant so voyage, et pendant so séjour à Makkah, Mina et Arafaate juska ki li retourne chez li.
ki li ena suffisamment moyen pou accommode so madame, zenfants et tous banne ki zotte vine sous so responsabilité, pendant so l’absence juska ki li retourne so la caze.

Quand ene personne, apart so la caze ki li resté, apart so capital ki li bizin pou so business, apart so banne z’outil travail, apart so moyen transport, apart so dette, li possède ça quantité-là dans banne mois de hajj, alors hajj fini vine obligatoire lors li. Astere tanque capave, li bizin pas tardé pou faire so hajj.

Problème la santé et hajj

Si la personne ki ena le moyen, ena problème la santé ki empêche li alle faire hajj, alors li capave attane juska ki li gagne so la santé. Mais si problème la santé persisté et continué dans ene manière ki ça rende li incapable pou accomplir so hajj, alors li bizin faire kikene faire hajj de so coté. Si li pas fine réussi envoye kikene pou faire hajj dans so vivant, alors li bien nécessaire fini faire ene testament pou ki so banne z’héritiers faire kikene faire hajj de so coté après so la mort.

Ça testament ki ça personne-là fine faire, so banne z’héritiers bizin exécuté depi dans ene tiers de so du bien ki li fine quitté après so la mort. Si le dépense pou faire kikene faire hajj li dépasse plis ki ene tiers de so du bien, alors banne z’héritiers, soit zotte ajoute le surplus volontairement ou bien zotte faire kikene alle faire hajj depi dans ene l’endroit ki ça pou sufi depi là-bas.

Vieux dimounes et hajj

Le même principe li appliqué pou banne vieux dimounes ki pas capave alle faire hajj acoze la vieillesse. Alors zotte bizin faire kikene faire hajj dans zotte vivant même ou bien faire testament à cet effet ki pou être exécuté après zotte la mort par zotte banne z’héritiers.

Banne dimounes infirmes et hajj

Banne dimounes infirmes ki ena banne défauts physique couma perna la main, perna li pied ou perna lizié etc., aussi bizin faire pareil couma banne vieux dimounes. C’est à dire zotte bizin faire kikene alle faire hajj dans zotte vivant même ou bien faire ene testament à cet effet ki pou être exécuté après zotte la mort par banne z’héritiers.

Ene personne ki ena responsabilité et hajj

Ene personne ki ena kikene sous so charge ki li pas capave quitté et alle faire hajj, couma banne tipti zenfants, maman, papa ki vieux ou bien ene dimoune malade, alors li gagne droit postpone so hajj pou plutard juska ki li vine libre. Mais si toute longue la vie, banne obstacle pareil persisté, alors ça qualité dimoune-là aussi bizin faire kikene faire hajj de so coté dans so vivant même ou bien li faire testament pou ki so banne z’héritiers exécute ça après so la mort.

Ene madame ki perna mahram et hajj

Ene madame li pas gagne droit alle faire hajj li tout seule. Li bizin ena ene zomme ki accompagne li. Ça z’homme-là li bizin soit so missié ou bien ene l’autre z’homme ki li pas gagne droit marié avec li jamais, couma so papa, dada, nana, mamou, chacha, frère, neveu etc. Ou capave habitué avec ene z’homme combien ou content. Ou capave estime li et li aussi li estime ou couma so soeur, kala, maman, tifi etc. mais si li pas ou mahram d’après shariah, alors l’amitié ou estime ki chakene ena pou so camarade, pas capave faire li vine ou mahram.

Ene madame ki li ena le moyen mais ki perna ene mahram pou accompagne li, pas gagne droit sorti depi dans so la caze pou alle faire hajj. Si malgré ça li alle faire hajj, li pou sorti dans désobéissance et dans la colère Allah Ta’ala. Li pas ene hajj Maqboul. Li pas ene hajj ki Allah Ta’ala pou accepté. Li vraiment ene gaspillage pou faire autant z’effort et finalement trouve ou hajj pas fine accepté. Nou bizin faire Allah Ta’ala so Ibaadat d’après le principe ki nou Nabi ‎(Sallallaahou A'laihi Wasallam)‎‎‎‎ fine enseigne nou. Concernant ça, Rasouloullah ‎(Sallallaahou A'laihi Wasallam)‎‎‎‎ fine dire:

“Faudré pas ene madame faire hajj sans ki li ena ene mahram avec li .........." (Darqoutni/ Al- Bazzaar)

Voyage tout seul pou ene madame

"لا تسافر المرأة ثلاثة ايام الا مع ذى محرم" (البخارى)

Traduction:

“Ene madame faudré pas li voyage (ene distance) trois jours sans ki li ensemble avec ene mahram.” (Saheeh Boukhari)

Explication:

Ene distance trois jours veut dire ene distance ki ene voyageur capave couvert dans trois jours. Dans l'époque longtemps dimoune ti pé voyage lors chameau. Donc ene distance trois jours signifié ene distance ki ene dimoune capave couvert dans trois jours par chameau. Couma nou conné ki zotte pas ti pé voyage 24 lors 24, c'est necque ene parti dans ça 24 hrs là ki zotte ti pé voyagé. Dans ça ene parti voyage-là, zotte ti pé couvert 16 miles par jours. Donc ene distance de trois jours c'est 48 miles. Zordi jour nou ena banne moyen transport bien bien rapide. Ça distance ki zotte ti pé prend 3 jours pou couvert li longtemps, zordi avec facilité ki nou ena, nou capave faire li dans trois minutes aussi. Ceki important là-dans c'est ça distance-là, pas ça trois jours-là. Donc ene madame pas gagne droit voyage ça distance-là sans être accompagné par ene mahram, quand même li faire li dans pli tigite le temps ki ça 3 jours-là.

Ki veut dire mahram ?

Ene mahram pou ene madame c'est ene zomme ki ça madame-là pas gagne droit marié avec li jamais couma madame-là so papa, so garçon, so banne ti zenfants, so frère, so neveu, banne zenfants so neveu ou bien banne zenfants so nièce, so nana, so dada, so mamou, so chacha. Ça li appliqué pou tous madame en general. Quant à ene madame marié, alors soit li accompagné de so missié ou bien ene dans ça banne-là. A noté ki beau-frère, poupa, kalou, cousin, cousine ou bien zenfants cousin cousine zotte pas mahram. Coumsa même banne grand dimoune ki ou appelle zotte nana, dada, mamou, chacha ou bien frère par l’amitié ou par respect, zotte continué reste étranger. Zotte pas vine ou mahram. Couma ene zomme li vine mahram pou ene madame par relation du sang, coumsa même li capave vine mahram par relation du lait aussi. C'est-à-dire quand ene ti baba boire du lait avec ene madame, alors ça missié-là vine ça ti baba-là so papa du lait. Ça madame-là vine mama du lait. Madame-là so banne zenfants et banne lezot zenfants ki li fine faire boire du lait vine ça ti baba-là so banne frère sœur du lait. Coumsa même madame-là so frère vine ça ti baba-là so mamou du lait. Donc couma ene madame li gagne droit voyagé avec so propre garçon du sang, coumsa même li gagne droit voyage avec so garçon du lait. Mais dans tout ça-là li important ki ça ti baba-là fine boire du lait quand li pas ti encore gagne deux ans. Si jamais li boire du lait avec ene madame dans l’age après deux ans, alors ça boire du lait-là pas pou faire li vine garçon du lait ça madame-là. Ene mahram couma li bizin ene personne ki majeur, coumsa même li important ki li sain d’esprit. C'est-à-dire ene garçon mineur pas capave servi comme ene mahram dans voyage pou ene madame. Coumsa même ene personne ki pas sain d’esprit pas servi comme ene mahram.

Dans ça hadice-là, Rassouloullah ‎(Sallallaahou A'laihi Wasallam)‎‎‎‎ pas fine spécifié aukene sorte de voyage. Donc ça li applique pou tout qualité voyage ki ene dimoune faire dans ene façon délibérée. Par exemple voyage de promenade, voyage de commerce et voyage de l’étude. Ça la loi-là li applique en général pou tout voyage. A moins si ena kit nécessité réelle. A ce moment-là li pou permette et li pou exempté de ça règle général-là. Par exemple ene madame ki ena pou alle à l’extérieur pou faire soigne li ou bien pou ene traitement médical ki perna cotte li dans so pays. Alors si li perna mahram, dans ça cas-là, exceptionnellement li gagne droit voyagé li tout seul.

Eski ‘oumrah ou bien hajj li ene nécessité ki autorise ene madame voyagé li tout seul sans mahram ? Le fait ki Rassouloullah ‎(Sallallaahou A'laihi Wasallam)‎‎‎‎ pas fine spécifié aukene sorte de voyage et li fine laisse li vague, alors de par so sens general li bizin applique pou ene voyage de ‘oumrah et de hajj également. Parceki perna aukene blâme lors ene madame si li pas fine réussi faire ‘oumrah ou bien hajj acoze ki li perna mahram. A noté ki tanque li perna ene mahram ki accompagne li, hajj pas vine obligatoire lors li pou accomplir. Si li pas réussi faire li dans so vivant, li bizin toujours fini faire ene testament pou ki so banne z’héritiers capave envoye kikene faire hajj de so coté après so la mort. Tout ça-là montré ki ‘oumrah et hajj li pas ene nécessité dans cas ene madame ki perna mahram. Alors ça hadice-là pou applique pou voyage ‘oumrah et hajj aussi, surtout quand d’après banne juristes couma Hassan Al-Basri, Ibrahim An-Nakhi-ï, Imaam Abou Hanifah, Imaam Ahmad, Ishaaq et Abou Thaur, hajj li pas vine obligatoire lors ene madame ki perna mahram.

Nou ena ene hadice dans Saheeh Boukhari rapporté par Hazrat Abdullah Bin Abbaas ‎(Radiyallahou anhou‎)‎ ki confirme dans ene façon assez clair ki ene madame bizin être accompagné par ene mahram pou le voyage de hajj aussi. Selon ça hadice-là, Rassouloullah ‎(Sallallaahou A'laihi Wasallam)‎‎‎‎ fine dire dans ene certaine l’occasion :

لا تسافر المرأة الا مع ذى محرم ولا يدخل عليها رجل الا ومعها محرم

Ene madame faudré pas li voyagé sans ki ena ene mahram avec li. Ene zomme faudré pas li rente cote ene madame sans ki li (madame-là) ena ene mahram avec li.

Ene Sahabi ki ti là-bas fine demandé :

يا رسول الله انى اريد ان اخرج فى جيش كذا وكذا وامرأتى تريد الحج

O Allah so Rasoul ‎(Sallallaahou A'laihi Wasallam)‎‎‎‎ mo ti ena l’intention pou sorti dans tel ou tel l’armée. Et mo madame pé faire l’intention hajj ?

En réponse Rassouloullah ‎(Sallallaahou A'laihi Wasallam)‎‎‎‎ fine dire li :

اخرج معها

Alle ensemble avec li.

Explication :

Ça montré ki li bien important ki ene madame bizin être accompagné par ene mahram. Li pas gagne droit voyage li tout seul. Ça li tellement important ki Rassouloullah ‎(Sallallaahou A'laihi Wasallam)‎‎‎‎ fine ordonne le Sahabi pou abandonne l’intention sorti dans jihaad ki li ti déjà fini inscrire so nom, ziste pou li capave accompagne so madame dans hajj. Selon la version سعيد بن منصور, le Sahabi concerné ti faire نذر (vœux) pou li alle dans ça certaine jihaad-là. Par ordonne li pou accompagne so madame dans hajj, Rassouloullah ‎(Sallallaahou A'laihi Wasallam)‎‎‎‎ fine autorise le Sahabi concerné pou casse so promesse ki li ti faire pou sorti dans jihaad. Qour’aan et hadice fine mette boucou l’emphase lors la nécessité respecté ene promesse. Si malgré ça Rassouloullah ‎(Sallallaahou A'laihi Wasallam)‎‎‎‎ fine ordonne li pou abandonne ziska ça aussi, alors ça montré ki quantité li pli important ki ene madame pas alle hajj li tout seul sans être accompagné par ene mahram. Ça hadice-là montré ki l’ordre pou pas voyage sans mahram li applique pou voyage hajj aussi parceki ça sahabi-là fine comprend ça même et Rassouloullah ‎(Sallallaahou A'laihi Wasallam)‎‎‎‎ par so réponse fine confirme ceki le Sahabi fine comprend. Le hadice de Hazrat Abdullah Bin Abbaas ‎(Radiyallahou anhou‎)‎ li dans Mousnad Al-Bazzaar aussi avec ene certaine différence :

عن ابن عباس ‎(Radiyallahou anhou‎)‎ ان رسول الله صلى الله عليه وسلم قال: لا تحج الرأة الا ومعها محرم فقال رجل يا نبى الله انى اكتتيت فى غزوة كذا وامرأتى حاجة؟ فقال ارجع فحج معها (البزار)

Hazrat Abdullah Bin Abbaas ‎(Radiyallahou anhou‎)‎ fine rapporté ki Rassouloullah ‎(Sallallaahou A'laihi Wasallam)‎‎‎‎ fine dire :

Ene madame faudré pas li faire hajj sans ki li ena ene mahram avec li. Alors ene personne fine dire : “O Allah so Nabi ‎(Sallallaahou A'laihi Wasallam)‎‎‎‎ : Mo fine faire inscrire mo nom dans tel jihaad et mo madame pé alle faire hajj ? (Lors ça) Li (Rassouloullah ‎(Sallallaahou A'laihi Wasallam)‎‎‎‎) fine dire : Retourné et alle faire hajj ensemble avec li.” (Al-Bazzaar)

Selon la version ki trouve dans (سنن الدارقطنى) avec ene sanad authentique, Rassouloullah ‎(Sallallaahou A'laihi Wasallam)‎‎‎‎ fine dire :

لا تحجن امرأة الا ومعها ذو محرم (سنن الدارقطنى)

“Ene madame pas bizin faire hajj sans ki li ena ene mahram avec li.” (Darqutni)

Hadice Hazrat Abou Umaamah ‎(Radiyallahou anhou‎)‎

عن ابى امامة قال سمعت رسول الله صلى الله عليه وسلم يقول: لا تسافر امرأة سفرا ثلاثة ايام او تحج الا ومعها زوجها (سنن الدارقطنى)

Hazrat Abou Umaamah ‎(Radiyallahou anhou‎)‎ dire : Mo fine tanne Rassouloullah ‎(Sallallaahou A'laihi Wasallam)‎‎‎‎ dire : “Ene madame bizin pas faire ene voyage (ki duré) pendant trois jours ni li faire hajj sans ki li ena so missié ensemble avec li. ” (Darqutni)

Position hadice :

Li bon signalé ki ena ene rawi nommé جابر الجعفى (Jabir Al-Jou’fi) dans so sanad. Très souvent so présence dans ene sanad li servi comme ene prétexte par certain pou disqualifié le hadice. Mais en réalité li ene rawi ki so position li controversé. C'est-à-dire li correct d’après certains savants de hadice couma li faible d’après ene l’autre groupe. Ene rawi de ene tel position li ene rawi ki so hadice capave être considéré. Le moins ki nou capave dire c’est ki so hadice li pou ene hadice Hassan ki capave servi comme ene argument.

Deuxieme Hadice Hazrat Abou Umaamah ‎(Radiyallahou anhou‎)‎

لا يحل لامرأة مسلمة ان تحج الا مع زوج او ذى محرم (الطبرانى)

“Li pas permette pou ene madame musulmane ki li faire hajj excepté avec (so) missié ou bien avec ene mahram.” (Tabraani)

Position hadice :

Ena ene rawi nommé ابان بن ابى عياش (Abaan Bin Abou Ayyaash) ki trouve dans sanad ça hadice-là. Selon banne savants de hadice, li ti pé faire erreur dans rapporte hadice acoze so mémoire ti bien faible. Mais ceki li fine rapporté li confirme ceki جابر الجعفى fine rapporté. Apart ça, ena hadice Hazrat Abdullah Bin Abbaas ‎(Radiyallahou anhou‎)‎ aussi ki approuve ceki li fine rapporté. Ça prouvé ki malgré so mémoire faible, li fine bien rapporte ça hadice-là. Donc ene dans l’autre ça hadice-là li vine ene hadice Hassan pareil couma hadice de جابر الجعفى.

Explication :

Hadice Hazrat Abdullah Bin Abbaas ‎(Radiyallahou anhou‎)‎ et Hazrat Abou Umaamah ‎(Radiyallahou anhou‎)‎ montré ki ene madame pas gagne droit faire hajj li tout seul. Ça li appliqué quand Makkah li trouve lors 48 miles × 2000 yrds depi so l’endroit ki li resté. Quand même so missié donne li permission, là aussi li pas pou permette. Si hajj fine vine faraz lors li et li ena so mahram aussi ki pou accompagne li, alors gagne droit alle faire hajj, même si so missié pas autorise li. Dans ce cas li pas bizin obéir so missié. Si distance depi so l’endroit ziska Makkah li moins ki ça, alors pou ene hajj ki faraz, li gagne droit allé sans mahram. Mais pou ene hajj ki pas faraz, li bizin permission so missié pou li capave allé.

Mise au point :

Ena encore deux points ki dimane explication :

D’abord ena ene hadice ki faire mention de deux jours couma ena ene l’autre ki mentionne ene jour aussi. Banne hadices semblable zotte applique selon banne contextes et circonstances. C'est-à-dire cote ena sécurité et perna aukene danger, alors ene madame gagne droit voyage tout seul si li ene voyage de moins ki trois jours. Cote perna sécurité, alors li bizin être accompagné par ene mahram même si li ene ti distance aussi. Mais pou ene voyage de trois jours ou plis ki trois jours, de toute façon li bizin être accompagné par ene mahram, même si li paraite ki perna aukene danger ou l’insécurité aussi.
Deuxièmement d’après ene hadice dans Saheeh Boukhari, banne madames de nou Nabi ‎(Sallallaahou A'laihi Wasallam)‎‎‎‎ ti accompagné par Hazrat Usmaan ‎(Radiyallahou anhou‎)‎ et Hazrat Abdurrahmaan Bin Awf ‎(Radiyallahou anhou‎)‎ dans hajj. Ça c’était par l’ordre Hazrat ‘Oumar ‎(Radiyallahou anhou‎)‎. En réalité ça li pas en contradiction ça hadice cote Rassouloullah ‎(Sallallaahou A'laihi Wasallam)‎‎‎‎ fine empêche ene madame sorti dans voyage sans être accompagné par ene mahram. C’est parceki banne madame Rassouloullah ‎(Sallallaahou A'laihi Wasallam)‎‎‎‎ fine déclaré comme mama de tous banne musulmans par Allah Ta’ala.

"النبى اولى بالمومنين من انفسهم وازواجه امهتهم ... (آية ٦/سورة الاحزاب)

“Nabi ‎(Sallallaahou A'laihi Wasallam)‎‎‎‎ li ena relation pli proche avec banne musulmans ki zotte ena avec zotte même et so banne madames c’est zotte mamans …” (S33/V6)

Alors banne musulmans, zotte banne mahram de banne madames Rassouloullah ‎(Sallallaahou A'laihi Wasallam)‎‎‎‎. Dans ce sens li correct pou dire ki pendant zotte voyage de hajj, zotte ti accompagné de zotte banne mahram. Li pas ti ene voyage sans mahram. Et si malgré ça, zotte fine gagne l'ordre pou observe pardah, c'est par respect et dignité ki Allah Ta'ala fine accorde zotte.

Ene madame dans Iddat et hajj

Ene madame ki so missié fine mort, bizin attane ene morceau jour avant ki li re-décide pou marié. Ça attane-là appelle reste dans Iddat. Iddat pou ene madame ki so missié fine mort, c’est 4 mois 10 jours. A moins si li enceinte, alors li bizin attane juska l’accouchement.

Coumsa même ene madame ki so missié fine donne li ene ou deux ou trois talaaq, bizin reste dans Iddat pendant so trois périodes. A moins si li enceinte, alors li bizin attane juska l’accouchement. Ene madame ki pas gagne période ou bien ki fine arrête gagne so période, bizin attane 3 mois en cas si so missié donne li talaaq, pou so iddat fini

Ene madame ki dans Iddat pou la mort so missié ou bien pou talaaq ki li fine gagné, pas gagne droit alle faire hajj tanque ki so Iddat pas terminé.

Types de Hajj

Ena trois qualités Hajj:

Hajj Ifraad,
Hajj Tamat-tou’
Hajj Qiraan

1. Hajj Ifraad

Hajj Ifraad c’est ène Hajj ki péna ‘Oumrah avant li.

2. Hajj Tamat-tou’

Hajj Tamat-tou’ c’est ène Hajj ki éna ‘Oumrah avant li - c’est à dire là-dans, le Haaji li attache Ihraam d’abord pou accomplir ‘Oumrah. Après ‘Oumrah, li rétire Ihraam et sorti en dehors Ihraam. Quand banne jours Hajj vini, li remette so Ihraam pou accomplir Hajj.

3. Hajj Qiraan

Hajj Qiraan aussi li ène Hajj ki éna ‘Oumrah avant li mais ici ou pas rétire Ihraam après ‘Oumrah. Ou éna pou tini Ihraam et reste dans l’état de Ihraam juska ki ou accomplir ou Hajj. Ça veut dire ki Hajj Tamat-tou’ et Hajj Qiraan tout les deux zotte précédé par ène ‘Oumrah, mais dans Hajj Qiraan ou pas sorti en dehors Ihraam apres ‘Oumrah et dans Hajj Tamat-tou’ ou sorti en dehors Ihraam apres ‘Oumrah.

Pli bon qualité Hajj

Nous pou remarqué ki dans Hajj Qiraan éna pli beaucoup sacrifice parce ki bizin tini Ihraam après ‘Oumrah juska ki ou accomplir Hajj. Donc pou éna pli beaucoup recompense là-dans. Et dans Hajj Tamat-tou’ éna facilité pou rétire Ihraam après avoir accompli ‘Oumrah. Péna pou tini Ihraam pou ène longue periode. Donc li pli facile pou respecté banne réglements Ihraam là-dans; même si éna ène manque à gagner comparé à Hajj Qiraan. Vaut mieux accepté ène manque à gagner ki perdi dans poche. Acoze ça, vu négligence et manque de courage et volonté de nos jours, li pli bon et pli recommendé faire Hajj Tamat-tou’. Et c’est ça même ki la majorité dimoune zotte faire.

‘OUMRAH EK HAJJ EN BREF

‘Oumrah en bref

Ghoussal ou bien wazou (Sounnat).
Mette linge ki pas fine coude lors forme le corps (Wajib).
Ensuite faire deux rakaats dans ene l’heure ki li pas makrouh faire namaz nafil (Sounnat).
Lire Talbiyah (Labbaik Allahoumma labbaik...) avec l’intention pou rente dans l’état lhraam (indispensable, nécessaire et faraz).
Tawaaf Ka’aba (Faraz et obligatoire).
Deux rakaats namaz de préférence à cote Maqaam lbrahim ou ene l’autre l’endroit selon facilité dans ene l’heure ki faire namaz nafil pas makrouh (Wajib).
Sa’ee entre Safa et Marwa sept le tours (Wajib).
Raser ou bien tailler ou bien diminuer cheveu longueur ene boute doigt (Wajib).
‘Oumrah terminé !

Hajj en bref

8eme Zulhijjah:

Faire roussal de préférence ou wazou (Sounnat).
Mette linge ki pas fine coude lors forme le corps ki appelle linge lhraam (Wajib).
Faire deux rakaats dans ene l’heure ki pas Makrouh faire namaz nafil (Sounnat).
Faire talbiyah avec l’intention pou vine dans l’état lhraam (Indispensable et faraz).
Alle Mina et arrive là-bas en sorte ki capave gagne 5 namaz là-bas, c’est-à-dire Zohar, Assar, Maghrib, Esha et Fajar le lendemain (Sounnat).

9eme Zulhijjah:

Départ depi Mina ene tigite après soleil levé pou alle Arafaate.
Passe ene faction le temps entre zawaal et soubh swadiq le lendemain dans Arafaate (Faraz et indispensable pou hajj compté).
Reste dans Arafaate depi après zawaal juska soleil couché (Wajib).
Sorti depi Arafaate après soleil couché pou alle Mouzdalifah sans faire Maghrib.(Wajib).

10eme Zulhijjah :

Passe ene fraction le temps dans Mouzdalifah entre soubh swadiq et soleil levé le 10eme Zulhijjah (Wajib).
Sortie depi Mouzdalifah ene ti peu avant soleil levé pou retourne Mina (Sounnat).
Arrive Mina, batte shaytaan (Wajib).
Faire Qourbaani (Wajib).
Tire cheveux (Wajib).
Capave tire lhraam et tout kitchose vine permette excepté alle dans ménage.
Tawaaf Ziyaarat (Faraz).
Deux rakaats Tawaaf dans ene l’heure ki namaz nafil pas makrouh (Wajib).
Sa’ee entre Safa et Marwa (Wajib).
Retourne Mina pou passe la nuit là-bas (Sounnat).

11eme Zulhijjah :

Batte tous les trois shaytaan le 11eme Zulhijjah après zawaal (Wajib).

12eme Zulhijjah :

Batte tous les trois shaytaan le 12eme Zulhijjah après zawaal (waajib).
Astere capave retourne Makkah.
Avant quitte Makkah, faire Tawaaf Wada (Wajib).

N.B: Ça tawaaf-là li waajib pou tout dimoune excepté pou ene madame ki pas fine gagne le temps pou faire li acoze ki li dans so période et so groupe pé quitte Makkah.

Explication lors Hajj Tamat-tou’

Dans Hajj Tamat-tou’, bizin faire ‘Oumrah d’abord. C’est à dire, d’abord bizin attache Ihraam pou faire ‘Oumrah. Quand ‘Oumrah terminé, ou rétire Ihraam et astère tout kitchose ki ti empéché acoze Ihraam revine permissible. Veut dire ki ou vine dans l’état normal. Ou capave taille z’ongle, coupe cheveux, servi parfum, alle dans menage etc… juska ki banne jours Hajj vini et ou re-attache Ihraam ène deuxième fois pou acomplir Hajj. Alors d’abord ou bizin conné couma faire ‘Oumrah.

‘Oumrah

‘Oumrah li composé de:

Ihraam,
Tawaaf,
Sa’eee entre Safaa et Marwah
Halq (rase la tête) ou Taqseer (diminuer cheveux lors la tête longueur ène boute le doigt).

Detail lors ‘Oumrah

Ihraam

La personne ki décide faire ‘Oumrah bizin attache Ihraam. Ihraam pou ‘Oumrah et Hajj li pareil couma takbir tahreemah eté pou namaz. Sans takbir tahreemah ou pas capave commence namaz. Sans Ihraam ou pas capave faire ‘Oumrah et Hajj.

La toile ki ène Haji metté pou Ihraam li composé de deux portions normalement. Ene portion li attache li enbas dans place pantalon ki appelle izaar. Izaar bizin couvert enbas nombril juska genoux inclus. Ene deuxième portion ki li mette lors so le dos dans place chemise ki appelle Ridaa. Avant mette Ihraam, li recommendé tire banne cheveux indésirable couma cheveux en bas le bras, en bas nombril, taille z’ongle et corrige moustache. Après ça de preference faire roussal. Ça roussal-là li sounnat mouakkadah. Si pas capave faire roussal, alors faire wazou. Mais li pas pou gagne même quantité recompense ki li ti pou gagné dans faire roussal. Ça roussal-là li pas ène roussal de tahaarat - li ène roussal de netoyage et de l’hygiène. Donc ça li recommendé pou ène madame ki dans l’état de haiz et nifaas aussi.

Après roussal li mette so linge Ihraam lors li. Li moustahab ki li frotte ène ti parfum lors so le corps mais pas lors linge. Après ça li faire deux rakaat nafil si li dans ène l’heure ki namaz nafil pas makrouh. Au moment ki li pé faire namaz, li couvert so le corps bien et li couvert so la tête aussi parceki li pas encore rentre dans l’état Ihraam.

Ça deux rakaat-là li recommendé et sounnat, li pas obligatoire. Alors si ène personne pas fine capave faire li pou ène raison ou d’autre, alors so Ihraam pou compté.

Banne l’heure ki pas gagne droit faire namaz nafil

Quand l’heure namaz fajar rentré, pas gagne droit faire aukene sounnat ou bien nafil apart les deux sounnat namaz fajar. Ça pas gagne droit-là li resté tanque ki soleil pas fini levé bien et namaz Ishraaq so l’heure pas fini rentré. Quand namaz Ishraaq so l’heure fine rentré, astere capave faire namaz nafil. Coumsa meme pas gagne droit faire aukene namaz nafil quand fini faire namaz Assar tanque ki soleil pas fini couché. Quand soleil pres pou couché aussi, pas gagne droit faire aukene namaz nafil. Coumsa meme l’heure ki soleil li lors coco ki appelle l’heure de zenith et ki d’ordinairement dimoune conne li par l’heure zawaal, pas gagne droit faire aukene nafil. Dans ça banne l’heure-là pas gagne droit faire les deux rakaat ki ena avant Ihraam ni gagne droit faire les deux rakaat ki ena apres tawaaf.

Quand ène personne vine dans l’état Ihraam?

Li important pou nou conné ki ni linge Ihraam, ni lire labbaik et ni l’intention de Ihraam faire ène personne vine dans l’état Ihraam.

Alors quand li vine dans l’état Ihraam?

C’est necque quand ou récite labbaik ensemble avec l’intention de Ihraam ki ou vine ène mouhrim (ène personne dans l’état Ihraam). Donc après avoir accomplir deux rakaat, li découvert so la tête et avec l’intention de Ihraam, li lire talbiyah.

Talbiyah c’est :

لَبَّيْكَ اَللّهُمَّ لَبَّيْكَ لَبَّيْكَ لَا شَرِيْكَ لَكَ لَبَّيْكَ

اِنَّ الْحَمْدَ وَالنِّعْمَةَ لَكَ وَالْمُلْكَ لَا شَرِيْكَ لَكَ

Lab-baik Al-laahoum-ma Lab-baik

Lab-baik laa shareeka laka Lab-baik

In-nal hamda wan–ni’mata laka wal moulk laa sharika lak

C’est necque astere-là ki li vine ène mouhrim. Là, li bizin respecté et observe banne principes et règlements de Ihraam.

Banne kitchoses ki interdits dans Ihraam

Banne conversations obscènes, érotiques et banne paroles ki éna trait au sexe; même avec so madame aussi.
Faire péché li haraam partout. En état Ihraam li pli haraam.
Dispute et querelle.
la chasse - Par contre la pêche li autorisé.
Montrer, indiquer, guider ou donne l’information à propos kit gibier.
Touille ene gibier ou donne kikène pou touiller ou bien mette li dans de l’eau ou dans soleil pou li mort.
Servi parfum.
Servi savonnette ki ena parfum.
Taille z’ongle.
Couvert figure.
Couvert la tête.
Tire cheveux.
Mette ène linge ki fine coude lors forme le corps couma pantalon, kourta, chemise, etc.…
Mette souliers ou chaussette ki couvert cheville et ça bosse li pied ki nou appelle coude li pied - Donc bizin mette plutôt ène savate ki laisse cheville et ça bosse-là reste découvert.
Mette les gants.

Exception pou banne madames

Les n^os 10, 11, 13, 14 et 15 pas appliqué pou ène madame. C’est à dire ène madame pas seulement li capave mais li bizin couvert so figure. Li bizin pas découvert so figure divant banne z’hommes étrangers. Astere soit li servi ène l’espèce l’éventail pou cachiette so figure ou soit li mette couma ène casquette lors so la tête et li jette so voile dépi lors ça casquette-là lors so figure en sorte ki li cachiette so figure sans touche so figure.

Contrairement à ene z’homme, ene madame bizin couvert so la tête. Similairement ene madame li autorisé mette linge ki fine coude. Et coumsa même li autorisé mette souliers, chaussette et les gants. Après avoir attache Ihraam, le mouhrim pou faire Tawaaf.

Kitchose ki pas interdit dans Ihraam

1. Prend bain li permette pendant Ihraam mais faudré pas frotte le corps dans ene façon ki cheveux cassé ou bien kit poil déraciné. Bizin frotter légèrement.

2. Assize dans l’ombrage sans ki ça touche figure ou la tête.

3. Attache sacoche dans le rein.

4. Porte bague, montre, bijoux, lunette etc...

5. Mette sourma ki pena parfum.

6. Prise de sang.

7. Arrache le dent.

8. Mette bandage ou bien plaque dans cas oblige.

9. Ene Mouhrim li capave gratte so le corps mais li bizin faire li légèrement pou kit cheveux ou poil pas tombé.

Ki veut dire Tawaaf?

Normalement tawaaf veut dire tourner autour de quelque chose. Ici quand nou dire tawaaf, ça veut dire tourner autour de Ka’bah Shareef.

N.B :- POU PLIS DETAIL CONCERNANT TAWAAF, REFERE OU AU CHAPITRE « DETAIL EN PLIS LORS TAWAAF, IZTIBAA’, SAEE, RAMI ET PASSE LA NUIT DANS MINAA »

Couma faire Tawaaf Ka’bah Shareef?

Avant nou gagne explication lors la façon faire Tawaaf Ka’bah Shareef, li bon ki nou conné ki veut dire IZTIBAA’ et RAMAL. Parceki ena pou observe li dans Tawaaf.

Iztibaa’ veut dire passe Ihraam en bas le bras droite et jette li lors z’épaule gauche, en sorte ki z’épaule droite reste découvert.

Ramal veut dire faire ene ti galop avec tipti tipti pas et bouge tout les deux z’épaules.

Iztibaa’ li sounnat dans tous les sept tours de Tawaaf. Par contre ramal li sounnat dans seulement trois premiers tours.

N.B : Iztibaa’ et Ramal les deux appliqué seulement pou banne zommes. Banne madames zotte exempté de ça.

Couma commence faire Tawaaf

Avant vine en face avec Hajar Aswad, d’abord bizin fini faire iztibaa’ et niyyat pou tawaaf. Après ça le mouhrim li vine en face avec Hajar Aswad et li lève so deux la mains absolument couma li lève so deux la mains dans namaz en récitant :

بِسْمِ اللهِ وَاللهُ اَكْبَرُ وَلِلّهِ الْحَمْدُ وَالصَّلاَةُ وَالسَّلاَمُ عَلى رَسُوْلِ اللهِ

Bismil-laah Wal-laahou Akbar Walil-laahil Hamd

Was-swalaatou was-salaamou ‘alaa Rasoulil-laah

Et ensuite li largue so la main en bas. Après ça li faire Istilaam de Hajar Aswad.

Ki veut dire Istilaam et couma faire Istilaam?

Pose tous les deux plat la main lors Hajar Aswad et pose la bouche au milieu deux plat la main. Si capave faire li dans ça façon-là sans donne kikène difficulté et sans faire kikène du tort, tant mieux - mais si li pas possible, alors necque touche Hajar Aswad avec deux la main et embrasse deux la main. Si pas capave faire li avec deux la main, alors touche li avec ène seule la main, mais de préférence avec la main droite. Mais si ça aussi li difficile, alors servi ène objet, par exemple ène bâton pou touche Hajar Aswad et embrasse bâton-là. Finalement si ça aussi li cause difficulté, alors necque faire signe avec deux plat la main depi loin même et embrasse li.

Veut dire ki d’abord lève deux la main pareille couma li levé pou takbir tahreemah en lisant Bismil-laah Wal-laahou Akbar… et li largue so la main. Après ça li faire Istilaam couma fine expliqué et dans la façon ki li possible et li commence faire Tawaaf Ka’bah Shareef dépi so coté droite avec ramal dans seulement trois premiers tours et avec Iztibaa’ dans tous les sept tours. A chaque fois ki li passe cote Rukn Yamaani li touche li. Mais li pas sounnat pou embrasse li ni li éna pou touche li avec ène objet ni li ena pou faire signe en cas si li pas capave touche li avec so la main.

Coumsa même à chaque fois ki li traverse cote Hajar Aswad li faire istilaam pareille couma ti faire dans commencement, sauf li péna pou lève so la main juska cote z’oreille. Donc li termine les sept tours de Tawaaf par istilaam de Hajar Aswad.

Vine à cote Multazam

Après ça li vine cote Moultazam ki trouve entre la porte Ka’bah et Hajar Aswad. Li attrape Moultazam fort et li colle so l’estomac, et plaque so ventre et so la joue droite. Li étale so deux la main, droite en direction verticale lors muraille la haut so la tête.

Deux rakaat Après Tawaaf

Après ça li faire deux rakaat pou Tawaaf dans l’heure ki namaz nafil pas makhrouh. Li alle boire de l’eau Zamzam et li alle faire Sa’ee entre Safaa et Marwah après ça.

Li bon conné ki alle cote Multazam et alle cote puit zamzam pou boire de l’eau zamzam li ene kitchose ki recommandé. Mais si ça li mette la personne dans difficulté dans la foule, alors li capave pas faire li aussi parceki li pas ça important-là. Sans ça aussi so Tawaaf et so ‘Oumrah pou compté.

Sa’ee entre Safaa et Marwa

Après Tawaaf éna pou faire sept tour entre Safaa et Marwah ki appelle Sa’ee entre Safaa et Marwah. Sorte Safaa alle Marwah faire ène tour, et re-retourne Safaa faire deux tours. Veut dire ki le 7^ème tour pou termine lors Marwah.

Façon faire Sa’ee

D’abord li monte lors Safaa et faire face avec Ka’bah, li lève la main pou faire dou’aa. Après li dessane et alle vers Marwah. En allant vers Marwah, éna ène boute trajet appelle Milayne Akhdarayne à cote li recommandé traverse li avec ène ti galop au lieu marché. Ça galop-là li recommandé faire li quand arrive lors ça boute ki appelle Milayne Akhdarayne dans chaque tour dans allé-retour, tout les deux. Ça ti galop-là li appliqué pou banne zommes seulement. Banne madames perna pou faire li.

Deux rakaat Après Sa’ee

Après les sept tours entre Safaa et Marwah li recommandé faire deux rakaat namaz. A noter ki ça deux rakaat-là aussi bizin faire li dans ène l’heure ki namaz nafil pas makhrouh. Et ça aussi li bon conné ki si pas faire li, perna narien de mauvais là-dans.

Raser ou bien diminuer cheveux

Après ça necque fine reste pou rase la tête ki appelle Halq ou bien diminuer cheveux ki appelle Taqseer. En ceki concerne Taqseer bizin diminuer longueur ène boute le doigt de ¼ la tête au minimum. Si kikène so cheveux li pli courte ki ène boute le doigt, alors diminuer cheveux li pas suffit, li bizin absolument rasé même.

Quant à ène madame, li bizin absolument faire Taqseer - c’est à dire diminué longueur ène boute le doigt.

Quand fini raser ou diminuer cheveux ‘Oumrah fine terminé. Astere la personne népli dans l’état Ihraam. Tout kitchose ki ti empêché acoze Ihraam, astere li permette faire li. Veut dire ki li tire so linge Ihraam et li vine dans l’état normal. Astere li reste dans Makkah. Quand banne jours de Hajj vini, alors li re-attache so Ihraam pou accomplir Hajj.

Récapitulation

‘Oumrah

§ Ihraam + 2 Rakaat
§ Tawaaf Ka’bah + 2 Rakaat
§ Sa’ee entre Safaa et Marwah + 2 Rakaat
§ Raser ou bien diminuer cheveux et retire linge Ihraam.

Alhamdoulil-laah ‘Oumrah fine terminé!!!

N.B :- POU PLI BOUCOU DETAIL LORS ‘OUMRAH, REFERE OU AU CHAPITRE « DETAIL EN PLIS LORS ‘OUMRAH »

COUMA FAIRE HAJ

Alle Mina

Le 8^ème Zil Hij-jah :

Attache Ihraam pareille couma ti faire pou attache Ihraam pou ‘Oumrah et alle Mina.
§ Dans Mina ena pou resté juska namaz Fajar le lendemain.

Alle Arafaate

Le 9^ème Zil Hij-jah :

Nou faire namaz fajar dans Mina. Quand soleil fini levé, nou sorti pou alle ‘Arafaate. Et nou reste là-bas juska coucher du soleil. Dans ça l’intervalle-là nou faire ibaadat tanque ki nou capave par faire tilaawat Qour’aan-e-Kareem, zikroullah, douah etc. Parceki ça même moment ki pli important dans hajj.
Départ pou Mouzdalifah
Quand soleil fini couché, nou sorti pou alle Mouzdalifah sans faire namaz Maghrib dans Arafaate. Arrivé à Mouzdalifah, nou faire namaz Maghrib et Esha ensemble.
Nou passe la nuit dans Mouzdalifah. Nou pou reste la-bas juska ene ti peu avant soleil levé. Li important pou reste attane dans Mouzdalifah dans l’intervalle entre soubh swadiq juska ene ti peu avant soleil levé.

DEPART DEPI MOUZDALIFAH POU RETOURNE MINA

Le 10^ème Zul Hijjah:

Dans Mouzdalifah nou faire namaz fajar dans so premier l’heure, c'est-à-dire ene ti peu pli bonheur ki normalement nou habitué faire li. Et quand fine reste ene ti peu le temps pou soleil levé, nou sorti pou alle Mina.
Arrivé à Mina, nou faire Rami ki nou appelle ‘batte shaitaan’. Ena ène seule place pou batter zordi c’est le grand shaitaan.
Apres Rami nou faire Qourbaani et après ça nou faire Halq ou Taqseer. Là nou fini sorti en dehors Ihraam. Astere tout kitchose ki ti empeché acoze Ihraam, li nepli reste empeché excepté pas pou gagne droit alle dans ménage tanque ki pas fini faire Tawaaf-e-Ziyaarat. Astere nou reste pou faire Tawaaf-e-Ziyaarat et Sa’ee apres ça.

TAWAAF-E-ZIYAARAH

Pou Tawaaf-e-Ziyaarat et Sa’ee apres ça, nou ena le temps faire li juska avant couché du soleil le 12^ème Zul Hijjah. Nou ena droit choisir nou le temps ki pli approprié pou faire ça dans ça l’intervalle-là. Mais faudré pas nou blié ki tanque ki nou na pas faire li, nou pas pou gagne droit alle dans menage.

Le 11^ème et 12^ème Zul Hijjah

§ Nou faire Rami le 11^èmejour de Zul Hijjah le 12^ème jour de Zul Hijjah après Zawaal. C’est à dire nou batte tous les trois shaitaan apartir ki l’heure namaz zohar fini rentré. Quand fini batte shaitaan le 12^ème Zul Hijjah, astere capave retourne Makkah. Al-hamdoulillah, nou hajj fine terminé. Astere nou pou attane dans Makkah juska ki arrive l’heure pou alle Madinah. Ena ene Tawaaf pou faire avant quitte Makkah. Ça Tawaaf-là appelle Tawaaf Wadaa.

TAWAAF WADAA

Avant quitte Makkah, nou faire ene Tawaaf ki appelle Tawaaf Sadar ou Tawaaf Wadaa.

EXCEPTION:

TAWAAF WADAA POU ENE MADAME KI DANS SO PERIODE

Si ène madame fini gagne so période et li na pas encore faire Tawaaf Wadaa et so groupe pé voyager, alors dans ce cas-là li gagne droit quitte Makkah sans faire ça Tawaaf-là. Mais li necessaire faire Tawaaf Ziyaarat. Sans ça li pas gage droit quitte Makkah.

Masla concernat banne madames ki fine gagne zotte haiz

1. Si ène madame gagne so haiz avant même ki li complete so ‘Oumrah, ki li bizin faire?

Coumsa même si ène madame fine gagne so haiz avant ki li faire Tawaaf pou ‘Oumrah, alors li bizin tini so Ihraam. C’est à dire li bizin respecté tout banne principe de Ihraam. Quand li vine propre, li faire roussal et li accomplir ‘Oumrah. Mais si li pas encore vine propre et jour de Hajj fine fini vini, alors li annule so ‘Oumrah et li attache Ihraam pou Hajj.

Pou ça Hajj là Qourbaani pas waajib. Mais li bizin faire ène Qourbaani acoze ki li fine annule so ‘Oumrah. Et li bizin alle masjid ‘Aishah et attache Ihraam depi la bas et li remplace ça ‘Oumrah ki li fine annulé.

Si ene madame gagne so haiz avant ki li attache Ihraam, alors faudré pas li traverse Meeqaat sans attache Ihraam. Li attache Ihraam dans l’état ki li été et li tini so Ihraam juska ki li vine propre. Quand li vine propre, li faire roussal, mette so linge Ihraam et li faire so ‘Oumrah. Ici aussi si jamais li pas réussi vine propre et jour de Hajj fine fini vini, alors li annule so ‘Oumrah et li attache Ihraam pou Hajj.

Pou ça Hajj-là Qourbaani pas waajib. Mais li bizin faire ène Qourbaani acoze ki li fine annule so ‘Oumrah. Et li bizin alle masjid ‘Aishah et attache Ihraam depi là-bas et li remplace ça ‘Oumrah ki li fine annulé.

1. Ene madame fine gagne so haiz avant ki li faire Tawaaf Ziyaarat. Ki li bizin faire?

Ça madame-là bizin attane juska ki li vine propre. Li faire so roussal et li faire so Tawaaf. Quant à Qourbaani, diminué cheveux et batte shaitaan li pas empeché dans l’état de haiz.

2. Ene madame fini gagne so haiz et li pas encore faire Tawaaf Wadaa et de l’autre coté so groupe pé quitte Makkah. ki li bizin faire?

Ça madame-là dans ça cas-là, li autorisé quitte Makkah sans li faire ça Tawaaf-là.

PRINCIPE KI BIZIN SUIVRE CONCERNANT NAMAAZ DANS MINA, ARAFAATE ET MOUZDALIFAH

Normalement dans ‘Arafaate éna éne principe ki nou mette en pratique ki appelle Jama’ Taqdeem. C’est à dire faire namaz Zohr et Asr tous les deux dans l’heure Zohr même. Ça pratique-là li autorisé avec certaine conditions. Malheureusement de nos jours, éna banne conditions ki pas respecté. Etant donné ki namaz li éne ‘ibaadat très important, li pli bon ki nou faire li dans la façon ki nou habitué faire. C'est à dire faire namaz Zohr dans l’heure Zohr et faire namaz ‘Asr dans l’heure ‘Asr.

Astere combien rakaat pou faire ? Deux rakaat ou bien quatre rakaat? Ça li depanne si ou ene mousafir ou bien ene mouqeem. Si ou ene Mouqeem, ou bizin faire li complète partout dans Mina, ‘Arafaate et Mouzdalifah. Si ou ene Mousafir ou réduire banne namaz de 4 rakaats à 2 rakaats.

KI VEUT DIRE MOUQEEM ET MOUSAFIR?

Dans ce contexte, Mouqeem veut dire éne personne ki fine reste 15 jours ou plus ki 15 jours dans Makkah avant ki li déplacé pou alle Mina. Et Mousafir c’est ene kikene ki fine reste moins ki 15 jours avant li déplacé pou alle Mina.

N.B: Ene kitchose important ki nou bizin conné: Faudré pas faire namaz derriere ene Imaam ki Mouqeem mais ki apé faire namaaz couma Mousafir ou bien ene Imaam ki Mousafir et ki pé faire namaz couma Mouqeem.

N.B: POU PLIS DETAIL CONCERNANT FAIRE NAMAZ DANS MINAA ET ARAFAATE, REFERE OU A CHAPITRE ‘NAMAZ DANS ARAFAATE’.

Details lors banne principes et pratiques de hajj

Banne kitchose ki obligatoire et faraz dans Hajj

Ena 5 faraz dans Hajj:

Ihraam,
Wouqouf ‘Arafaate,
Majeur parti de Tawaaf Ziyaarat,
Niyyat de Tawaaf
Tarteeb, c’est à dire respecté l’ordre entre banne pratique ki faraz. Ça veut dire ki d’abord bizin mette Ihraam, ensuite faire Wouqouf et apres ça accomplir Tawaaf dans la fin. Li aussi obligatoire pou accomplir chaque faraz dans so l’heure et dans so place ki fine fixé. Par exemple Wouqouf de ‘Arafaate li bizin entre apres zawaal le 9^ème Zul Hijjah juska le Soubh Swadiq de 10^ème Zul Hijjah.

Explication en détails lors banne kitchose ki faraz dans Hajj

1. Ihraam

Ihraam veut dire prononce talbiyah (Labbaik, Allahoumma Labbaik…) avec ène la voix ki au moins ene dimoune pres capave tendé et avec l’intention de Ihraam. Bizin ena les deux pou ène personne rentre dans Ihraam - cest à dire necque avec talbiyah ou soit seulement avec l’intention, Ihraam pas commencé - bizin ena talbiyah accompagné de l’intention pou Ihraam commencé.

2. Wouqouf ‘Arafaate

Wouqouf ‘‘Arafaate c’est passe ène fraction le temps dans la plaine ‘Arafaate entre Zawaal de 9^ème Zul Hijjah juska ène ti peu avant Soubh Swadiq de 10^ème Zul Hijjah. Dans l’intervalle entre Zawaal de 9^ème Zul Hijjah juska le Soubh Swadiq de 10^ème Zul Hijjah, bizin passe ène fraction le temps dans la plaine ‘Arafaate. Ça quantité-là li obligatoire et ça meme couma dire colonne vertebrale de Hajj. Si pas fine reussi gagne li, veut dire ki ou fine ratte ou Hajj. Ou bizin refaire li l’année ensuite ou soit quand l’occasion presenté. Mais de toute façon, ou pou doit ene hajj.

Ene personne ki pas fine reussi alle ‘Arafaate, ki li bizin faire ?:

Donne présence dans la plaine Arafaate pou ene fraction le temps dans l’espace entre zawaal de 9eme Zul Hijjah et juska avant ki Soubh Swadiq paraite le l0eme Zul Hijjah, li faraz (obligatoire) dans Hajj. Si kikene fine fini mette Ihraam pou faire Hajj mais pas fine réussi donne so présence pou ene ti peu le temps aussi dans ça l’intervalle-là alors li fine perdi so Hajj. Dans ce cas, li bizin faire Tawaaf et Sa’ee et ensuite tire cheveux pou sorti en dehors lhraam. Li perna aukene dam à payer. Mais li bizin remplace ça Hajj-là l’année ensuite ou plutard.

Si la personne ti mette lhraam pou faire Hajj-ul-Qiraan, alors dans ce cas li pou bizin d’abord faire Tawaaf et Sa’ee pou ‘Oumrah et ensuite faire ene l’autre Tawaaf et Sa’ee pou Hajj. Apres ça li tire cheveux pou vine en dehors l’état Ihraam. Dans ce cas li na perna pou faire Qourbaani pou Hajj-ul-Qiraan. Mais de toute façon li bizin remplace ça hajj-là plutard. Li pas necessaire remplace li par Hajj-ul-Qiraan. Pou le besoin de ‘qadha’ (remplacé), Hajj-ul-Ifraad aussi li suffit.

3. Tawaaf Ziyaarat

Ça Tawaaf-là li faraz et obligatoire. Ça li reste obligatoire juska toute longue la vie. Ça veut dire ki si ène personne pas fine reussi faire li, li pas gagne droit approche so madame tanque ki li na pas faire li. Dans Tawaaf Ziyaarat, c’est seulement les premiers quatre tours ki faraz. Le reste trois tours li waajib.

4. Tarteeb entre banne kitchose ki obligatoire

C’est à dire bizin respecté l’ordre entre banne kitchose ki obligatoire. D’abord mette Ihraam. Et Wouqouf pou vine aprés Ihraam et finalement Tawaaf li vine aprés Wouqouf.

Banne kitchose ki waajib dans Hajj

1. Wouqouf Mouzdalifah

Wouqouf dans Mouzdalifah li commencé à partir Soubh Swadiq de 10^ème Zul Hijjah juska soleil levé. Commence faire Wouqouf depi Soubh Swadiq et continué attane juska ki li faire bien clair li sounnat. Mais passe ène fraction le temps dans l’intervalle aprés Soubh Swadiq et lever du soleil li waajib. Si kikène faire Wouqouf avant Soubh Swadiq ou bien aprés lever du soleil, alors ça Wouqouf-là pas compté. Ça veut dire ki li fine quitte ène waajib.

2. Sa’ee entre Safaa et Marwah

Sa’ee entre Safaa et Marwa li waajib. Pou ça compté, faudré fine faire li aprés ène Tawaaf valable. Si fine faire li avant faire Tawaaf ou soit aprés ène Tawaaf ki pas valable, alors Sa’ee pas pou compté.

3. Rami Jimaar

Le Rami Jimaar ou soit ceki nous dire batte shaitaan, li continué pendant 4 jours - le 10, 11, 12 et 13 de Zul Hijjah. Ceki waajib là-dans c’est trois jours - le 10^ème, 11^ème et 12^ème de Zul Hijjah. Quant à Rami de 13^ème Zul Hijjah, li permette pas faire li et retourne Makka quand fine fini faire le Rami du 12^ème. Mais faudré ki li fini retourné depi Mina avant soleil couché le 12^ème Zul Hijjah. sinon li bizin attane pou faire Rami le 13^ème Zul Hijjah aussi.

Le 10^ème jour ena ène seul Rami pou faire. C’est le Jamra ‘Aqaba ou Jamra Koubra ou soit troisieme Jamra ki trouve en premiere position lors frontiere Mina depi Makka. Normalement, l’heure Rami de Jamra ‘Aqaba le 10^ème jour li commencé apartir Soubh Swadiq de Yaumoun Nahr (10^ème Zul Hijjah) et li resté juska Soubh Swadiq le lendemain, c’est à dire le 11^ème Zul Hijjah. Mais là-dans ena l’heure ki sounnat couma ena l’heure ki permettre ou bien couma ena l’heure ki makrouh (indesirable). L’heure sounnat li trouve entre lever du soleil juska Zawaal. L’heure makrouh li trouve avant lever du soleil et aprés coucher du soleil. L’heure permette li trouve entre Zawaal juska coucher du soleil. Si fine faire Rami dans l’heure makrouh, c’est à dire avant lever du soleil ou bien aprés coucher du soleil pou ène raison valable, alors dans ça cas-là li pas vine makrouh. Pou évite la foule, banne vieux dimounes et banne madames capave faire li dans ça deux l’heure-là. Et ça li pas pou makrouh pou zotte.

Le Rami de 11^ème Zul Hijjah li commencé à partir Zawaal et li resté juska Soubh Swadiq. Avant zawaal li pas compté. Astere dans ça l’heure ki li permette-là, li sounnat pou faire li entre zawaal et coucher du soleil. Apres coucher du soleil juska Soubh Swadiq li ene l’heure makrouh excepté pou banne vieux dimounes et banne madames ki gagne difficulté pou faire li acoze la foule. Alors pou ça banne-là li pas makrouh.

Le Rami de 12^ème Zul Hijjah aussi commencé à partir Zawaal juska Soubh Swadiq. Ici aussi li sounnat pou faire li entre Zawaal et coucher du soleil. Après coucher du soleil juska Soubh Swadiq li vine makrouh. Ici aussi ena exception pou banne vieux dimounes et banne madames. C'est-à-dire zotte gagne droit faire li. Coumsa meme ene dimoune malade aussi gagne droit faire li dans ça l’heure-là.

Normalement le Rami de 13^ème Zul Hijjah li optionnel. Mais si ene dimoune pas fine capave deplacé depi Mina juska ki Soubh Swadiq du 13^ème Zoul Hijjah fine joine li, alors li pas gagne droit déplacé avant li faire Rami.

N.B:- N’importe ki jour so Rami si li fine manqué, li éna droit remplace li juska avant coucher du soleil de 13^ème Zawaal. Mais li bizin paye l’ammane aussi. Et si le 13^ème Zul Hijjah, soleil fine fini couché, alors dans ça cas-là, pas capave remplace Rami ki fine manqué, li éna necque pou donne Dam.

4. Tawaaf Wadaa’

C’est ène Tawaaf ki ène Haji étranger faire avant li quitte Makkah. Quant à ène habitant de Makkah ou ène ki habite dans les environs de Makkah endans Meeqat, Tawaaf Wadaa’ li pas waajib pou li. Coumça même ène madame ki dans l’état de haiz ou de nifaas capave quitte Makkah sans faire li si li pas encore vine propre au moment de so départ.

L’heure Tawaaf Wadaa’ li commencé après Tawaaf Ziyaarat. Quand ène Haji fine décide pou quitte Makkah, alors li faire Tawaaf Wadaa’. Après Tawaaf si en cas li fine bizin reste encore quelques jours dans Makkah, alors ça pas empeche li vine faire namaz dans Haram Shareef. Ça Tawaaf ki li fine faire-là, li reste valable. Li pas obligé refaire Tawaaf Wadaa’ avant li quitte Makkah. Mais li pli bon et li pli recommendé refaire li afin ki Baitoullah vine so dernier contact dans Makkah avant li quitte Makkah.

5. Halq ou Taqseer

Halq veut dire rase la tête et taqseer veut dire diminuer cheveux lors la tête. Ene z’homme li éna choix entre halq et taqseer. Ene madame pas gagne droit faire halq. Li bizin faire taqseer. Taqseer ici veut dire diminuer banne cheveux de minimun ène quart (¼) la tête longueur ène boute le doigt. Ene z’homme ki so cheveux li moins ki ène boute le doigt, alors li absolument bizin faire halq. Taqseer pas suffit pou li.

6. Fini faire halq ou taqseer avant le 12^ème Zul Hijjah

Couma halq ou taqseer li waajib, coumsa même bizin fini faire li avant soleil couché le 12^ème Zul Hijjah. Si pas fine faire li avant ça, ça veut dire ki fine manque ene waajib.

7. Attache Ihraam depi lors Meeqaat

Meeqaat c’est ène point cote bizin attache Ihraam si éna l’intention rente dans Makkah pou n’importe ki but. Pas gagne droit dépasse ça point ki appelle Meeqaat-là sans attache Ihraam.

Ena cinq Meeqaat:-

Zoul Houlaifa
Zaat Irq
Yalamlam
Juhfa
Qarn

Ene personne ki traverse lors deux Meeqaat li recommendé attache Ihraam depi lors premier Meeqaat même, mais li permettre pou attaché depi lors deuxieme Meeqat aussi. Pena narien ki mauvais si li attache depi lors deuxieme Meeqaat. Si li traverse par ène chemin à cote perna aukene Meeqaat alors li bizin attache Ihraam quand Meeqaat vine à so coté droite ou so coté gauche et distance depi ça point-là juska Makkah li égale à distance depi ene Meeqaat, ki trouve dans les environ, juska Makkah.

Meeqaat pour banne habitants de haram

Banne habitants de haram bizin vine dans l’état Ihraam depi haram même si zotte ena l’intention faire Hajj. Et pou ‘Oumrah, zotte bizin alle dans Hill Sagheer pour vine dans l’état lhraam. Hill Sagheer c’est ça region la terre ki trouve entre banne Meeqaat et haram. Mais de préférence li faire li depi تنعيم(Tan-ïme). C’est ça l’endroit à cotte Rasouloullah ‎(Sallallaahou A'laihi Wasallam)‎‎‎‎ ti faire Hazrat Aisha ‎(Radiyallahou anhou‎)‎ allé pou attache Ihraam pou faire ‘Oumrah. Ça meme nou conne li par masjid Aisha.

Traverse Meeqaat sans Ihraam

Ene personne ki vine depi en dehors Meeqaat et ki oulé rentre dans Makkah, bizin être dans l’état Ihraam pou traverse Meeqaat. Li pas gagne droit dépasse le Meeqaat sans être dans l’état Ihraam - li obliger être dans l’état Ihraam, même si li pé rentre Makkah pou ene l’autre but apart Hajj ou ‘Oumrah. Astere quand li fine attache Ihraam, li pou bizin faire soit ene ‘Oumrah ou bien hajj. Lerla li pou gagne droit tire so Ihraam. Si li dépasse Meeqaat sans être dans l’état Ihraam, alors li bizin paye dam et apart ça li pou doit soit ene ‘Oumrah ou bien ene Hajj. Mais li capave couvert ça erreur-là si li retourne lors Meeqaat et rente dans l’état lhraam en prononçant le Talbiyah lors Meeqaat et ensuite li accomplir Umrah ou bien Hajj. Dans ce cas, li pas pou bizin paye dam ki ti frappé lors li ni li pou bizin accomplir ene ‘Oumrah ou bien ene Hajj apart.

La personne li ena droit couvert so erreur dans ça façon-là tanque ki li pas encore faire narien dans ‘Oumrah ou dans Hajj. Si jamais li fine fini faire au moins ene tour dans tawaaf, alors li perdi so chance. Astere li bizin absolument paye dam même.

Si dans aller - vini pour répare so erreur, li trouvé ki li capave perdi so Hajj, alors dans ce cas li pas bizin prend la peine pour retourne lors Meeqaat. Li bizin vine dans l’état Ihraam depi à cote li été et li accomplir so Hajj. Mais li bizin paye dam pour erreur ki li fine commette dans traverse Meeqaat sans être dans l’état lhraam.

Ihraam pou les habitants de “Hill Sagheer”

L’endroit ki trouve entre Meeqaat et Haram appelle Hill Sagheer. Banne habitants de Hill Sagheer ena droit rentre dans Makkah sans Ihraam si zotte perna l’intention faire ‘Oumrah ou bien Hajj. Coumsa meme ene personne qui habite en dehors Meeqaat gagne droit traverse Meeqaat sans Ihraam si li ena l’intention reste dans Hill Sagheer seulement. Ene fois quand li fine rentré, li vine pareil couma banne habitants là-bas (c.a.d de Hill Sagheer). Aster si li oulé rentre dans Makkah pou ène l’autre but ki ‘Oumrah ou Hajj, alors li pou capave rentré sans Ihraam.

8. Prolongation de Wouqouf juska coucher du soleil

Passe ène fraction le temps entre le Zawaal du 9^ème Zul Hijjah et Soubh Swadiq du 10^ème Zul Hijjah dans la plaine de ‘Arafaate li faraz. C’est à dire passe au moins ene tigite le temps narien du tout dans ça intervalle-là, li obligatoire. Sans ça, ça Hajj-là pas compté. Mais prolonge Wouqouf c’est à dire continué reste attane depi n’importe ki l’heure après Zawaal juska coucher du soleil li waajib.

9. Tarteeb ou respecté l’ordre entre banne waajib

Tarteeb c’est respecté l’ordre entre Rami, Qourbaani et Halq ou taqseer. Li waajib d’abord pou faire Rami, ensuite Qourbaani et ensuite Halq ou Taqseer. Quant à ène personne ki pé accomplir Hajj Ifraad, na pena Qourbaani waajib lors li. Alors li bizin d’abord faire Rami et ensuite Halq ou Taqseer

10. Qourbaani

Qourbaani li Waajib lors ène personne ki pé accomplir Hajj Tamat-tou’ ou soit Hajj Qiraan.

POU PLIS DETAIL LORS QOURBAANI, REFERE OU AU SUJET « QOURBAANI » DANS CHAPITRE HALQ

11. Accomplir Tawaaf Ziyaarat dans ène de banne jours de Qourbaani

Capave faire Tawaaf Ziyaarat dans 10^ème ou bien 11^ème ou soit 12^ème jour de Zul Hijjah. Pouvu bizin fini faire li avant soleil couché le 12^ème de Zul Hijjah.

N.B : A noté ki faire Tawaaf Ziyaarat après Rami, Qourbaani et Halq li sounnat mais pas Waajib. Si kikene faire li avant ça, li makrouh acoze ki li fine neglige ène sounnat. Mais so tawaaf pou compté. Seulement li pas pou vine en dehors Ihraam tanque ki li pas fini faire ça banne pratique-là.

12. Quelques choses ki waajib dans Tawaaf et Sa’ee, etc...

Commence faire tawaaf depi Hajar Aswad.Commence faire tawaaf depi so coté droite.Pas neglige marché dans Tawaaf sans ene raison valable. C'est-à-dire sans ene raison valable li pas gagne droit faire charié li au lieu li marche lors so propre li pied.
Tahaarat, c’est à dire faire Tawaaf avec roussal et wazou.
Couvert le corps la meme quantité ki bizin couvert dans namaz.
Faire Tawaaf de Hateem aussi quand pé faire Tawaaf de Ka’bah.
Commence Sa’ee depi Safaa.Marcher dans Sa’ee à moins ki ena kit obligation valable. C'est-à-dire sans ene raison valable li pas gagne droit faire charié li au lieu li marche lors so propre li pied.
Bizin faire Sa’ee entre Safaa et Marwa aprés avoir faire ène Tawaaf valable. Pas avant Tawaaf ou bien apres ene Tawaaf ki pas compté.
Faire halq dans ène de banne jours de Qourbaani et faudré faire li dans Haram - pas gagne droit faire li en dehors Haram.
Abstenir et garde distance avec banne kikchose ki empeché dans Ihraam couma alle dans menage, mette linge ki coude lors forme le corps, couvert la tête et figure etc...

Principe concernant waajib

Tout kikchose ki necessite dam quand ou abandonne li, alors ça veut dire ki ça kitchose-là li waajib.

DETAILS CONCERNANT TAWAAF, IZTIBA’, RAMAL, SA’EE, RAMI ET PASSE LA NUIT DANS MINAA

TAWAAF

Tawaaf veut dire faire le tour. Dans Shariah, ça signifié faire le tour Ka’bah. Tawaaf de Ka’bah li constitué de sept tours. Li commence depi Hajar-e-Aswad et termine lors Hajar-e-Aswad même.

D’abord bizin fini faire l’intention de tawaaf avant vine en face avec Hajar-e-Aswad. Quand vine en face avec Hajar-e-Aswad lève tous les deux la mains jusqu’a boute z’oreille couma levé dans namaz en lisant “Bismillah wallahou Akbar walillahil Hamd. Wassalaatou Wassalamou ‘ala Rasoulillaah.”

Et ensuite baisse la main. Astere faire signe avec tous les deux plats la main vers Hajar-e-Aswad et embrasse li. Ça appelle lstilaam. Et commence faire tawaaf depi ou coté droite. Depi Hajar-e-Aswad à Hajar-e-Aswad li faire ene tour. Bizin faire sept le tours coumsa pou faire ene Tawaaf.

Ena cinq qualité tawaaf:

TAWAAF-UN-NAFL
TAWAAF-UL-‘OUMRAH
TAWAAF-UL-QOUDOUM
TAWAAF-UZ-ZIYAARAH
TAWAAF-US-SADAR

TAWAAF-UN-NAFL :-

C’est à dire ene tawaaf ordinaire ki normalement tout le temps ene personne capave faire. Ça tawaaf-là pena Ihraam, pena Ramal ni ena Iztiba là-dans. Ni ena Sa’ee entre Safa et Marwah après ça. Mais pareille couma tous tawaaf, ça tawaaf-là aussi li nécessite deux rakaats namaz en dehors l’heure Makrouh acote Maqaam-e-lbrahim de préférence.

TAWAAF-UL-‘OUMRAH :-

Tawaaf dans ‘Oumrah li faraz. Ça veut dire ki ‘Oumrah pas capave existé sans Tawaaf. Au moins 4 tours bizin faire pour ‘Oumrah compté.

TAWAAF-UL-QOUDOUM :-

Tawaaf-ul-Qoudoum c’est le premier tawaaf ki ene étranger faire quand li rente Makkah avec Ihraam pou faire hajj.

Ene personne ki rente Makkah avec Ihraam pour faire ‘Oumrah, na pena pour faire Tawaaf-ul-Qoudoum séparément. Le Tawaaf ki li faire pour ‘Oumrah li suffit de la part de Tawaaf-ul-Qoudoum.

La même chose appliqué pour ene personne ki fine rente Makkah avec Ihraam pour faire Hajj-e-Tamattou ou Hajj-ul-Qiraan. C’est à dire le Tawaaf ki la personne faire quand li rente Makkah, li compté de la part de Tawaaf-ul-‘Oumrah et Tawaaf-ul-Qoudoum, tous les deux. Mais en ceki concerne Hajj-ul-Qiraan, li meilleur si la personne faire ene l’autre Tawaaf pour Qoudoum après ki li termine so Sa’ee pour ‘Oumrah. Tawaaf-ul-Qoudoum li sounnat pou ene personne ki rente Makkah avec lhraam pour faire Hajj-ul-Ifraad.

Tawaaf-ul-Qoudoum ena plusieurs noms couma : -

طواف التحية (Tawaaf-ut-Tahiyyah)
طواف اللقاء (Tawaaf-ul-Liqaa)
طواف الوارد (Tawaaf-ul-Warid)
طواف الورود (Tawaaf-ul-Wouroud)

LA POSITION DE TAWAAF-UL-QOUDOUM

Tawaaf-ul-Qoudoum li sounnat. Retarde li ou bien pas faire li même du tout pas nécessite aukene dam mais li pas bon quitte li.

JUSKA QUAND CAPAVE FAIRE TAWAAF-UL-QOUDOUM ?

La personne ki pas encore faire li, ena le temps faire li tanque ki li pas encore alle dans la plaine ‘Arafaat. Ene fois ki li donne so présence dans la plaine ‘Arafaat, astere Tawaaf-ul-Qoudoum so l’heure fini dépassé. Li pas capave faire li.

TAWAAF-UZ-ZIYAARAH:

Les 4 premiers tours de Tawaaf-uz-Ziyaarah li faraz (obligatoire) dans Hajj. Nous appelle ça Tawaaf-là Tawaaf-ul-Ifaadah aussi.

Ena plusieurs conditions pour ki ça Tawaaf-là compté:

Bizin dans l’état lhraam.

A noter ki ena différence entre « être dans l’état Ihraam » et « mette linge Ihraam ».

Quant nou dire être dans l’état lhraam pas veut dire ki le Haji bizin continué reste avec so linge Ihraam. Mais ça signifié ki tanque le Haji pas fini faire Tawaaf-uz-Ziyaarah, li bizin tini so l’etat Ihraam en ceki concerne alle dans menage. C’est à dire li pas gagne droit «alle dans ménage ». Parceki après Halq, tout kitchose couma mette linge coude, mette parfum, tire cheveux etc. ki ti empêché à coze lhraam, revinne halal (permette), excepté « alle dans ménage » ki continué reste interdit. Donc par rapport «alle dans ménage », le Haji encore continué reste dans l’état Ihraam. Alors « bizin dans l’état Ihraam » signifié ça genre de lhraam-là.

Bizin fini passé dans la plaine Arafaate.
Bizin faire Niyyat (l’intention).
Bizin faire li le l0eme jour de Zulhijjah ou après. C’est à dire pas avant ça.
Bizin faire li par li même. Personne pas gagne droit faire li de la part de kikene. Excepté de la part ene personne ki fine tombe sans connaissance.
Bizin faire li à l’intérieur de masjid autour de Ka’bah.

BANNE KIKCHOSE KI WAAJIB DANS TAWAAF-UZ-ZIYAARAH

Faire Tawaaf par marche lors so propre li pied sans faire kikene charié li. A moins si li perna capacité pou marché. Alors li capave faire charié li.
Faire Tawaaf depi coté droite.
Les trois derniers tours de Tawaaf.
Bizin être avec roussal et wazou et bizin propre de toute sorte impureté.
Bizin couvert la quantité ki bizin couvert dans namaz. Par exemple ene zomme bizin couvert so le corps depi en bas nombril juska genoux inclus.
Faire li dans banne jours de Qourbaani, c’est à dire dans l’intervalle entre l0eme Zulhijjah et avant le couché du soleil de 12eme Zulhijjah.

N.B: Normalement le haji, d’abord li faire Rami et ensuite li faire Qourbaani et tire cheveux. Après ça li faire Tawaaf-uz-Ziyaaarah. Si ene haji arrivé faire Tawaaf-uzZiyaarah avant ki li faire Rami, Qourbaani et tire cheveux alors so Tawaaf pour compté parceki respecter l’ordre entre Tawaaf et Rami etc. li sounnat. Li pas obligatoire ni waajib. Mais faire li dans ça façon-là li pas bon parceki li conte sounnat. Faire kitchose conte le principe de sounnat laisse la pratique en question privé de Noor et de lumière. A noté ki dans ça cas-là, so Tawaaf ki li fine faire, pas pou permette li vine en dehors l’etat Ihraam tanque ki li pas fini faire Rami, Qourbaani et Halq.

TAWAAF-UZ-ZIYAARAH ET DAM

Tawaaf-uz-Ziyaarat pas capave être remplacé par Dam. Si kikene fine retourne chez li sans faire li, alors li bizin absolument retourne Makkah avec Ihraam et accomplir li. Sinon li pas pou gagne droit approche so partenaire toute longue so la vie. Excepté ene personne ki fine mort après avoir donne so présence dans Arafaat et avant li mort li fine faire Wasiyyah (testament) pou complète so hajj. Alors dans ce cas bizin faire zabah ene chameau ki pou remplace so Tawaaf-uz-Ziyaarat. Dans ça façon-là so hajj pou ene hajj valable.

L’HEURE DE TAWAAF-UZ-ZIYAARAH

L’heure Tawaaf-uz-Ziyaarah li commencé à partir ki l’heure namaz fajr rentré le 10eme Zulhijjah. Li resté juska toute longue la vie. Mais li waajib faire li juska avant soleil couché le I 2eme zulhijjah. Si kikene pas réussi faire li dans ça l’intervalle-là sans aukene raison valable alors ça pour nécessite donne ene dam pour répare le manquement causé par retard injustifié. Si fine retarde li juska après ça délai-là àcoze ene raison valable, alors li pas bizin paye aukene dam. Couma ene madame ki pas fine capave faire li à temps dans ça l’intervalle de trois jours-là, à coze ki li li fine gagne so haiz alors li pas bizin paye aukene dam pou retard ki li fine faire.

NIYYAT DANS TAWAAF

Pour Tawaaf compté bizin ena niyyat (l’intention) de Tawaaf. Si kikene tourne autour de Ka’bah ziste pour guette-guette Ka’bah ou bien ziste pour rode kikene sans l’intention pour faire Tawaaf, alors so Tawaaf pas pour compté. C ‘est seulement ene le tour ki li fine faire.

Mais li na pas nécessaire spécifié la nature de Tawaaf pour Tawaf compté. Si li faire ene Tawaaf sans précise la nature de ça Tawaaf-là alors li pour compté de la part de ça Tawaaf ki li ti supposé faire dans ça l’heure et l’intervalle-là. Par exemple:

Si la personne fine rente Makkah avec lhraam de ‘Oumrah, alors le premier Tawaaf ki li pou faire, pou compté de la part de Tawaaf-ul-‘Oumrah.
Si li fine rente avec Ihraam Hajj, alors le premier Tawaaf ki li faire avant Yaum- un-Nahr (10eme Zul Hijjah) pou compté de la part de Tawaaf-ul-Qoudoum.
Si li fine rente Makkah avec Ihraam pour Hajj-ul-Qiraan et li faire deux Tawaaf, alors le premier pou compté de la part de Tawaf-ul-‘Oumrah et le deuxième de la part de Tawaaf-ul-Qoudoum.
Si li faire Tawaaf le 10eme Zul Hijjah après ki l’heure namaz Fajr fine rentré, alors ça pou compté de la part de Tawaaf-uz-Ziyaarah.
Si li faire Tawaaf après ki li retourné depi Mina le 12eme Zul Hijjah et après ki li fine fini faire Tawaaf-uz-Ziyaarah, alors ça pour compté de la part de Tawaaf-uz-Sadar.

TAWAAF-US-SADAR

Tawaaf-us-Sadar, c’est le Tawaaf ki ene haji étranger accomplir avant li quitte Makkah. Ça Tawaaf-là appelle Tawaaf-uI-Wada aussi.

Ene Haji étranger c’est ene haji ki habite en dehors Meeqat. Li wajib lors ene haji pareil pou faire ene Tawaaf avant li quitte Makkah. Si li pas faire li, li pou bizin donne dam. Quant à ene madame ki fine gagne so haiz (période) et so groupe apé retourné ou apé alle Madinah, ena droit quitte Makkah sans faire Tawaaf-us-Sadar. Dans ce cas li na perna aukene dam à payer. Coumsa même Tawaaf-us-Sadar pas wajib:

a) Lors ene personne ki fine faire 'Oumrah seulement.

b) Lors ene personne ki fine ratte so hajj.

c) Lors ene personne ki pas fine réussi gagne l'accès à Makkah.

d) Lors ene personne ki pas sain d’esprit.

e) Lors ene mineur.

Coumsa meme ene personne ki fine adopté Makkah ou ene l'endroit ki trouve dans les environs de Makkah couma so résidence permanente avant le couché du soleil de troisième jour de Qourbaani, perna pou faire Tawaaf-us-Sadar et apres aussi, si jamais li ena pou sorti depi Makkah, li pas pou obligé faire ça Tawaaf-là.

COMMENCEMENT L’HEURE TAWAAF-US-SADAR

Tawaaf-us-Sadar ou Tawaaf-ul-Wadaa so l’heure commence à partir ki fine fini faire Tawaaf-uz-Ziyaarah. Quand le haji fine décide pou quitte Makkah et li faire Tawaaf après avoir accomplir so Tawaaf-uz-Ziyaarah, alors ça Tawaaf-là pour compté de la part Tawaaf-us-Sadar ou Tawaaf-ul-Wada. Astere si li fine continué resté dans Makkah pour kit raison, li pas obligé faire ene l’autre Tawaaf avant li quitté, quand même li fine reste boucou jours. Ça Tawaaf avant-là même li suffit. Mais li bon si li faire ene l’autre Tawaaf avant li quitte Makkah pour ki Ka’bah vine so dernier contact dans Makkah avant so départ depi Makkah.

QUITTE MAKKAH SANS FAIRE TAWAAF-UL-WADA ou TAWAAF-US-SADAR

Ene personne ki fine quitte Makkah sans faire Tawaaf-us-Sadar, bizin nécessairement retourne Makkah pour faire Tawaaf, tanque ki li pas encore sorti en dehors Meeqaat. Si li fine fini sorti en dehors Meeqaat, alors li ena choix entre deux kitchoses :-

a Soit li donne ene dam ki pour remplace ça Tawaaf-là.

b Ou bien li re-attache Ihraam pou ‘Oumrah. Quand li vine Makkah, d’abord li accomplir ‘Oumrah et après ça li faire Tawaaf-us-Sadar. Dans ça cas-là li perna narien à payer comme dam pour so retard ki li fine faire.

N.B : La première façon li pli appropriée parceki premierement li pli facile pou le haji li même et deuxiement li profitable pour banne pauvres.

TAWAAF ET NAMAZ FARAZ ET SOUNNAT

Ene personne ki rente dans Baitullah, d’abord li bizin commence avec Tawaaf. Mais si namaz avec jamaat apé dibouté, ou soit li ena crainte ki si li engage li dans Tawaaf, li pas pour gagne le temps pour faire sounnat ou soit l’heure namaz faraz ou bien l'heure namaz witr pour fini dépassé, alors dans ça cas-là d’abord li faire ça banne namaz-là et ensuite li faire so Tawaaf. C'est-à-dire si dans faire Tawaaf, li ena chance perdi ene de ça trois kitchose-là, alors li post-pone Tawaaf pou plutard.

TAWAAF DANS L’HEURE MAKROUH

L’heure makrouh veut dire l'heure ki li makrouh pour faire namaz nafil. L’intervalle entre l’heure fajar juska soleil levé, l'intervalle entre namaz Assr juska soleil couché, l’heure soleil pé levé ou bien l’heure li pé couché ou bien li lors la tête, c'est banne l’heure ki li empêché faire namaz nafil. Donc ene personne ki rente dans Baitoullah et li faire Tawaaf, li capave faire Tawaaf mais ça deux rakaats ki ena pou faire après Tawaaf, bizin pas faire li dans ça banne l’heure-1à. Li faire li après levé du soleil ou après couché du soleil ou apres zawaal ou bien ene l’autre l’heure.

TAWAAF-UN-NAFL

Pendant so séjour dans Makkah, ene haji capave faire la quantité Tawaaf nafil ki li content. Dans ça Tawaaf-là na perna Ramal, ni Iztibaa et ni ena Sa’ee après. Mais ena 2 rakaats pour faire après chaque Tawaaf ki li faire.

DETAIL LORS IZTIBAA’

Iztibaa’ veut dire croise la toile Ihraam ki fine metté la haut, en sorte ki faire so ene coté passe en bas le bras droite pour laisse zepaule droite reste découvert et jette li lors zepaule gauche.

Iztibaa’ li sounnat dans tout Tawaaf ki ena Sa’ee après li, couma Tawaaf-ul-Qoudoum et Tawaaf-ul-‘Oumrah. Coumsa même li sounnat dans Tawaaf-uz-Ziyaarah si fine post-pone Sa’ee pou après Tawaaf-uz-Ziyaarah et li pas encore tire linge lhraam. A noté ki na perna Iztibaa’ du tout quand pé faire Tawaaf-uz-Ziyaarah dans Hajj-ul-Ifraad. Ça li appliqué même si li ena pour faire Sa’ee aussi après ça Tawaaf-là.

Iztibaa’ li sounnat seulement dans les sept tours de Tawaaf. Pendant ki pé faire les 2 rakaats de Tawaaf bizin couvert les deux zepaules. Faudré pas faire lztibaa’ là-dans. Coumsa même dans Sa’ee entre Safa et Marwah na perna Iztibaa’.

DETAIL LORS RAMAL

Ramal veut dire faire ti galope avec tipti pas, et bouge les deux zepaules. Ramal li sounnat dans les premiers trois tours de tout Tawaaf ki ena Sa’ee après. Ene Tawaaf ki na perna Sa’ee après, na perna Ramal aussi là-dans.

BANNE TAWAAF KI ENA RAMAL LA-DANS

Tawaaf ki ena Ramal c’est Tawaaf-uI-‘Oumrah et Tawaaf-ul-Qoudoum. Si ene haji ki apé accomplir Hajj-ul-Ifraad on bien Hajj-ul-Qiraan fine fini faire Sa’ee après Tawaaf-ul-Qoudoum, alors li perna pou faire Sa’ee après Tawaaf-uz-Ziyaarah. Donc li perna pou faire Ramal aussi dans Tawaaf-uz-Ziyaarah. Ça veut dire ki si après Tawaaf-ul-Qoudoum li pas fine faire Sa’ee, alors li faire li plutard quand li faire Tawaaf-uz-Ziyaarah. Donc li pou faire Ramal aussi dans Tawaaf-uz-Ziyaarah.

RAMAL ET TAWAAF-US-SADAR

Si en cas ene haji pas réussi faire Sa’ee et Ramal dans Tawaaf-ul-Qoudoum ni dans Tawaaf-uz-Ziyaarah alors li faire li dans Tawaaf-us-Sadar et après ça li faire Sa’ee aussi. Si necque Ramal ki pas ti faire, alors perna pour faire Ramal après.

QUITTE RAMAL PAR OUBLI

Ene personne ki fine oublié faire Ramal dans ene ou deux ou trois premiers tours de Tawaaf, na perna pour remplace li dans les 4 derniers tours parceki li sounnat faire li dans les 3 premiers tours et li sounnat pas faire li dans les 4 derniers tours. Astere si li remplace li dans les 4 derniers tours, dans ça cas-là li pou arrivé quitte 2 sounnat. Ene à coze ki li pas fine faire à cote li ti sounnat. Deuxième à coze ki li fine faire li à cote li ti sounnat pou pas faire li. Vaut mieux quitte ene seul sounnat ki quitte deux sounnats.

RAMAL DANS LA FOULE

Dans commencement Tawaaf, si li trouve ena la foule ki pour empêche li faire Ramal, alors li bon ki li attane juska ki li capave faire Tawaaf avec Ramal. Si dans au milieu Tawaaf fine gagne la foule ki empêche li faire Ramal, alors faudré pas li diboute en place dans Tawaaf parceki continué faire Tawaaf sans interrompe li au milieu li ene sounnat établi. Donc li pas sage pou sacrifié ene sounnat de ene telle nature ziste pou gagne ene sounnat ki ena controverse là-dans.

SA’EE

Sa’ee li constitué de sept (7) tours entre Safa et Marwah. Depi Safa juska Marwah, li faire ene tour. Coumsa même en retournant depi Marwah à Safa li faire ene deuxième tour. Alors septième tour pou terminé lors Marwah.

SA’EE AVANT TAWAAF

Sa’ee vine tout le temps après Tawaaf. Ene Sa’ee ki fine faire avant faire Tawaaf pas valable.

SA’EE DANS HAJJ ET ‘OUMRAH

Sa’ee li wajib dans ‘Oumrah après ki fine fini faire Tawaaf.

Coumsa même li wajib Faire li dans hajj. Ene personne ki faire Hajj-ul-Ifraad ou Hajj-ul-Qìraan, li ena choix faire ça Sa’ee-là après Tawaaf-ul-Qoudoum ou bien après Tawaaf-uz-Ziyaarah. Si li fini faire li après Tawaaf-ul-Qoudoum, alors li perna pou faire li après Tawaaf-uz-Ziyaarah. Coumsa même la personne ki faire Hajj-e-Tamattou, li ena droit mette lhraam pour Hajj, faire ene Tawaaf nafil et ensuite faire Sa’ee après ça. Dans ça cas-là, li pas pou bizin refaire li après Tawaaf-uz-Ziyaarah.

Mais dans Hajj-ul-Ifraad et Hajj-ut-Tamattou li meilleur faire li après Tawaaf-uz- Ziyaarah. Pou Hajj-ul-Qiraan, meilleur faire li après Tawaaf-ul-Qoudoum.

PERNA SA’EE APRES TAWAAF-US-SADAR

Normalement après Tawaaf-us-Sadar na perna pou faire Sa’ee pareil couma après Tawaaf nafil na perna Sa’ee. Mais si jamais kikene pas réussi faire Sa’ee après Tawaaf-ul-Qoudoum ni li fine capave faire li après Tawaaf-uz-Ziyaarah, alors li bizin faire li après Tawaaf-us-Sadar. Dans ça Tawaaf-là li ena pou faire Ramal aussi.

DELAI POUR FAIRE SA’EE

Dans hajj na perna ene le temps limité pou faire Sa’ee. Si jamais li fine retourne Madina ou bien li fine retourne so la caze sans faire li, li capave faire li plutard aussi. Na perna dam pour le retard ki li fine faire.

RAMI JIMAAR

Rami Jimaar veut dire lance banne cailloux ki nou appelle batte shaitaan dans langage commun. Ça li waajib dans hajj. Ça pratique-là li déroulé dans Mina pendant 4 jours. Li commencé le l0eme Zulhijjah à partir ki l’heure namaz fajr rentré et li terminé avec le couché du soleil le 13eme Zulhijjah. Mais li permette pou retourne Makkah lors troisième jour même. Pas nécessaire attane pou batte shaitaan dans 4eme jour.

PREMIER RAMI JIMAAR LE 10EME ZULHIIJJAH

Le premier Rami c’est le 10eme Zulhijjah. Li commencé à partir ki l’heure namaz fajar rentré ça jour-là et li resté juska l’heure namaz fajar le lendemain. Mais li sounnat pou faire li entre levé du soleil et l’heure namaz zohar. Li permette pou faire li dans l’intervalle entre zohar et couché du soleil. Quant à Rami dans l’intervalle avant soleil levé ou dans l’intervalle apres soleil couché juska l’heure namaz fajar, sans aukene raison valable li makrouh. Mais banne madames et banne vieux dimounes ki gagne difficulté pour batte shaitaan dans banne l’heure normal, capave faire li avant soleil levé ou après soleil couché pendant la nuit. Li pas makrouh pou ça catégorie dimoune-là pou ene raison pareil. Couma ene dimoune malade aussi capave profité avec ça facilité-là.

Le 10eme Zulhijjah ena ene seul place pou faire Rami. C’est le Jamrat-ul-Aqabah ki nou appelle le grand shaitaan.

DEUXIEME RAMI LE 11EME ZULHJJJAH

Ça jour-là Rami li commencé à partir l’heure zohar pou terminé avec la rentrée de Soubh-Swadiq le lendemain. Si kikene faire Rami avant zohar, alors ça pas pou compté. Coumsa même li makrouh pou faire Rami après soleil couché pendant la nuit. Excepté pou banne madame et banne vieux dimounes et banne dimounes malade li pas makrouh. L’heure valable et sounnat li trouve à partir l’heure namaz zohar juska couché du soleil. Ça jour-là, ena pour faire Rami de tous les trois shaitaan.

TROISIEME RAMI LE 12EME ZULHIJJAH

Le Rami de ça jour-là aussi li commencé à partir l’heure zohar et li resté juska Soubh-Swadiq. Ici aussi l’heure valable et sounnat li trouve dans l’intervalle entre l’heure zohar et couché du soleil. Avant l’heure zohar li pas permette et li pas compté et après couché du soleil c’est l’heure makrouh. Si kikene fine faire li après couché du soleil pour ene raison valable alors li compté sans être makrouh.

Après avoir batte shaitaan le l2eme Zulhijjah, le haji capave retourne Makkah. Li pas nécessaire resté et attane pour batte shaitaan le lendemain. Si jamais li pas réussi déplacé juska ki couché du soleil joine li, alors li makrouh pour déplacé sans faire le Rami le lendemain. Si li fine retourné sans faire li, li pema narien à payer comme dam. Mais si li pas réussi déplacé juska ki Soubh-Swadiq joine li, alors li bizin absolument batte shaitaan ça jour-là avant déplacé. Si li sorti sans faire Rami ça jour-là, li bizin donne dam.

4EME RAMI LE 13EME ZULHIJJAH

Le 13eme Zulhijjah, Rami commencé à partir l’heure namaz fajar et li reste juska couché du soleil. Donc li permette pour faire Rami ça jour-là le matin même et retourne Makkah. Mais li sounnat faire li après ki l’heure zohar fine fini rentré.

RETARDE RAMI OU BIEN PAS FAIRE RAMI

Ene haji ki pas fine réussi faire Rami dans n’importe ki jour et combien jours capave faire Rami en ordre si li réussi gagne le temps avant le couché du soleil du 13eme Zulhijjah. Si soleil fini couché le 13eme Zulhijjah, alors li pas capave faire li parceki Rami li ene acte ki reconnaîte comme ibaadat ziste dans ça banne jours-là. Dans le premier cas à cote li fine retarde Rami et dans le deuxième cas à cote li fine quitte Rami, dans les deux cas li bizin paye dam pou ça manquement ki fine ena par retarde Rami ou bien par neglige Rami.

PASSE LA NUIT DANS MINA

Rami li wajib mais passe la nuit dans Mina dans ça banne jours-là li sounnat. Si kikene arrivé pas passe la nuit dans Mina, alors perna aukene dam mais li pas bon parceki li conte sounnat.

RAMASSE ROCHE POUR RAMI

Li moustahab (recommandé) pour ramasse roche pour faire Rami le premier jour depi Mouzdalifah. Pou le reste jours, capave ramasse li depi n’importe à cote ça. Pourvu li pas ramassé depi cote Jamrah. Jamrah c’est ça l’endroit acote avoye roche quand pé faire Rami. Pou ene facilité, capave ramasse tout depi dans Mouzdalifah aussi.

FAÇON FAIRE RAMI

Li recommandé pour attrape roche avec pouce et l’index pour batte shaitaan. De préférence roche-là so grosseur bizin dans dimension ene la grain tamme.

Au moment de Rami, Le haji li deboute ene distance 7 1/2 ft loin de Jamrah en sorte ki Mina vine dans so coté droite et ka’bah vine dans so coté gauche.

Si roche ki li fine batté, arrivé tombe lors le dos ene dimoune ki près avec Jamrah, ça

Rami-là li valable et li compté. Si li fine tombe loin de Jamrah li pas compté.

Li sounnat pou arrête faire Talbiyah avec le premier cailloux ki li batté.

HALQ

HaIq veut dire rase cheveux lors la tête. C’est ene kitchose ki li interdit dans l’état de Ihraam. Ene personne ki dans l’état Ihraam perna droit tire so cheveux lors ta tête ni li ena droit tire pou kikene. Quand même ça l’autre personne-là li pas dans l’état Ihraam.

Mais ça même halq li waajib pou faire li afin pou capave sorti en dehors l’état Ihraam quand tous banne actions dans ‘Oumrah et hajj fine terminé.

HALQ ET ‘OUMRAH

En ceki concerne ‘Oumrah, bizin faire halq après ki fine fini faire Sa’ee. Pas avant ça. Après ki fine fini faire Sa’ee, li ena la liberté faire halq quand li oulé. Perna aukene limite fixé ki bizin fini faire halq avant ça. Mais tanque ki li pas faire halq, li pas pour sorti en dehors l’état Ihraam. Et tout kitchose ki ti empeché dans l’etat Ihraam, pou continué reste empeché tanque ki li pas faire halq.

HALQ ET HAJJ

En ceki concerne hajj-ul-Ifraad, capave faire halq après rami le 10eme Zulhijjah. Par contre dans hajj-ul-Qiraan et hajj Tamattou, bizin faire li quand fini faire Qourbaani.

LIMITE POU FAIRE HALQ

Li waajib lors ene haji pou fini faire halq avant le coucher du soleil du 12eme Zulhijjah. Et coumsa même li waajib pou faire halq dans ene l’endroit ki trouve dans haram. Faire halq après le coucher du soleil du 12eme Zulhijjah ou bien faire li en dehors perimetre de haram li ene offense ki nécessite dam.

LIMITES DE HARAM

Faudré pas confondre haram avec Masjid-ul-Haraam parceki haram ici li signifié ça region ki trouve tout autour de Baitoullah shareef ki ena banne bornes dans tout le quatres directions fixé par Hazrat Ibrahim ‎(Alaihis Salaam)‎‎‎‎‎. Rassouloultah ‎(Sallallaahou A'laihi Wasallam)‎‎‎‎ fine rénove ça banne bornes-la. En suite Hazrat ‘Oumar ‎(Radiyallahou anhou‎)‎ Hazrat Uthman ‎(Radiyallahou anhou‎)‎ et Hazrat Mou’awiyah ‎(Radiyallahou anhou‎)‎, chakene fine rénove ça dans zotte règne respective. Alors halq ou taqseer, bizin faire li à l'intérieur de ça limite-là. Pas capave faire li en dehors.

Depi Baitoullah shareef la superficie de haram li étendu lors:

KILOMETRAGES?????

3 Miles en direction Madina
7 Miles en direction Iraq et Taïf
10 Miles en direction Jeddah
9 Miles en direction Ji’raanah

Halq et Qourbaani bizin faire à l’intérieur de ça banne limite-là. A noté ki ene mile d’après shariat li de 2000 yards au lieu de 1760 yards.

KI QUANTITE CHEVEUX BIZIN RASER?

Pou le besoin de waajib, li suffit rase cheveux lors ene quart la tête. Ça li suffit pou permette li sorti en dehors l’état Ihraam mais li makrouh, parceki rase entier la tête li sounnat. Et faire kitchose conte le principe de sounnat li makrouh.

TAQSEER

Au lieu halq, ene zomme ena droit faire taqseer aussi. Mais halq pli bon. Taqseer veut dire diminué cheveux lors la tête longueur ene boute le doigt. Ici aussi li suffit faire li lors ene quart la tête. Mais faire li entier la tête, li pli bon. Le choix ki ene zomme ena entre rasé ou diminué, li valable tanque ki so cheveux li assez longue. Assez longue veut dire ki au moins li dans longueur ene boute le doigt. Si li pli courte ki ça, li bizin rasé même. Pas capave diminué. Si au lieu rasé li diminué, veut dire ki li fine néglige ene waajib.

TAQSEER (DIMINUE CHEVEUX) POU MADAME

Quant à banne madames, halq pas appliqué pou zotte ni li permette pou zotte. Zotte bizin faire seulement taqseer. C'est à dire tire cheveux longueur ene boute le doigt lors entier la tête. Mais faire taqseer de ¼ la tête aussi li suffit pou le besoin de waajib. Li vrai ki faire taqseer de entier la tête li pli bon et li sounnat. Faudré pas quitte ça sounnat-là sans ene raison valable.

HALQ POUR ENE PERSONNE KI CHAUVE

Ene personne ki chauve, bizin passe tondeuse ou razoir lors so la tête en ressemblance avec banne hajis normal.

HALQ POU ENE PERSONNE KI ENA BOUTON LORS SO LA TETE

Ene personne ki ena bouton lors so la tête, bizin passe tondeuse ou razoir si possible. Si ça pas possible, alors li capave sorti en dehors l'état Ihraam sans faire halq. Mais meilleur li attane juska le dernier jour de halq c’est à dire juska avant coucher du soleil le 12eme zulhijjah. Li perna aukene l'amane à payer si li pas attane juska ça jour-là. Li capave sorti avant ça aussi sans faire halq.

ENE PERSONNE KI PERNA FACILITE FAIRE HALQ

Ene personne ki perna le moyen ou z’outil nécessaire pou faire halq ou bien perna personne ki capave faire ça pou li, alors ça li pas ene raison valable pour sorti en dehors l'état lhraam sans faire halq. Li bizin attane juska ki li gagne facilité faire li.

L’EFFET HALQ OU TAQSEER DANS HAJJ ET 'OUMRAH

Quand fini faire halq, tout kitchose ki ti empêché et interdit à coze lhraam, revine halaal et permette. Mais en ceki concerne hajj, alle dans ménage li continué reste interdit tanque pas fini faire Tawaaf-uz-Ziyaarah.

TAlLLE ZONGLE, MOUSTACHE, ETC. AVANT HALQ

Quand fine arrive l’heure pour faire halq, alors d’abord bizin fini faire halq avant taille zongle, taille moustache, corrige la barbe ou bien tire kit cheveux depi lors le corps. Bizin faire bien attention parceki si taille moustache, corrige la barbe ou bien taille zongle avant halq, alors bizin paye l’amane.

ESKl GAGNE DROlT COUPE ENE L’AUTRE DlMOUNE SO CHEVEUX AVANT Ll COUPE SO PROPRE CHEVEUX?

En plein l’état lhraam quand pencore arrive l'heure pou faire halq, ene personne na pas gagne droit taille ene l’autre dimoune so cheveux pareil couma li pas gagne droit taille so propre cheveux. Mais quand tous banne rites de hajj ou bien 'Oumrah fine terminé et fine arrive l’heure ziste pou faire halq, alors le haji gagne droit taille cheveux ene l’autre dimoune avant li taille pou li même.

QOURBANl

Qourbaani li waajib pou ene personne ki pé accomplir hajj Tamattou ou bien hajj Qiraan. Quant à ene personne qui pé accomplir hajj-ul-Ifraad, Qourbaani li moustahab lors li. Li pas waajib.

Ene personne ki pé accomplir hajj Tamattou ou bien hajj Qiraan bizin faire Qourbaani après Rami. Bizin ene bouc ou ene mouton ou bien ene part dans ene grand zanimau couma boeuf ou chameau dans Qourbaani. Si au lieu ene ti zanimau, kikene prend ene grand zanimau, alors ça aussi li valable.

Bizin fini faire Qourbaani avant ki soleil couché le 12eme zulhijjah. Et bizin faire li dans haram. C’est à dire couma Qourbaani li waajib, coumsa même li waajib pou faire li dans haram et li waajib pou faire li avant soleil couché le 12eme zulhijjah.

ENE PERSONNE KI PERNA MOYEN FAlRE QOURBANl

Ene personne ki perna le moyen pou faire Qourbaani, bizin garde en tout dix roza. Trois avant hajj et sept apres hajj.

LA FAÇON POU GARDE ÇA ROZA-LA

Ça trois roza ki bizin gardé avant-là, li capave garde li apartir le mois de shawwaal, pas avant ça. Mais li bizin dans l’état Ihraam pour 'Oumrah. Li bon ki li garde ça trois roza-là consécutivement ene après l’autre, mais li permette garde zotte saute-sauté aussi. Pourvu li bizin fini garde tous les trois roza avant le 10eme zulhijjah. Couma ça trois roza-là capave garde zotte dans tous les deux façons, coumsa même ça sept roza après-là aussi capave garde zotte consécutivement ou bien saute-sauté. Ça sept roza après-là, li capave commence gardé dans n’importe ki l’endroit ki li oulé. Pourvu li commence li après le 13eme zulhijjah, pas avant ça.

SI PAS FINE CAPAVE GARDE ROZA

En cas li pas fine réussi garde tous les trois roza avant le 10eme zulhijjah, alors li bizin faire Qourbaani même. Li pas capave remplace ça banne roza-là plutard. Astere si li perna moyen pou faire Qourbaani et ni li fine réussi garde tous les trois roza avant le 10eme zulhijjah, dans ce cas li capave vine en dehors Ihram par halq (rasé) ou bien par taqseer (diminué cheveu), mais li pou doit deux Qourbaani. Ene pour Tamattou et ene deuxième acoze ki li fine sorti en dehors Ihraam avant so l'heure.

Si ene personne ki ti garde roza dans place Qourbaani fine réussi gagne le moyen pou faire Qourbaani avant ki li rase so la tête et avant ki soleil couché le l2eme zulhijjah, alors li bizin absolument faire Qourbaani même. Li pas capave rase so la tête avant li faire Qourbaani parceki ça banne roza ki li fine garde-là pas suffit.

Mais si li fine gagne le moyen pou faire Qourbaani après ki li fine fini rase so la tête ou bien après ki soleil fine fini couché le 12eme zulhijjah, alors li pas bizin faire Qourbaani. Banne roza ki li fine gardé suffit pou permette li rase so la tête et vine en dehors l'état Ihraam.

LA VIANDE QOURBANI DANS HAJJ

La viande Qourbaani ki faire dans hajj li ene la viande ki tout dimoune capave consommé. La personne ki fine faire ça Qourbaani-là, banne dimoune riche, banne dimoune pauvre et banne proches, tout gagne droit consommé.

Détail en plis concernant ‘Oumrah

‘OUMRAH

Faire ‘Oumrah ene fois dans la vie, li sounnat Mou’akkadah lors celui ki ena le moyen. Ena boucou bénéfices à gagné dans faire 'Oumrah, surtout dans le mois de Ramadhaan ki selon Rasouloullah ‎(Sallallaahou A'laihi Wasallam)‎‎‎‎ li équivalent ene hajj.

Ene dimoune ki pas encore faire hajj, si arrivé li gagne l’occasion faire ‘Oumrah, faudré pas li laisse ça l’occasion-là perdi. Li faire so 'Oumrah parceki li ena droit faire ‘Oumrah, même si li pencore faire Hajj. Plutard, quand li gagne l’occasion pou faire hajj, li faire so hajj. Pas bizin peur ki si li fine faire 'Oumrah, alors hajj aussi pou vine faraz automatiquement. Parceki faire ‘Oumrah pas faire hajj vine obligatoire.

Gagne droit faire ‘Oumrah pendant toute longue l’année. Na perna ene saison spécifique pou ça. Excepté 5 jours ki pas gagne droit attache lhraam pou faire ‘Oumrah là-dans. Le 9eme Zulhijjah, le jour Eid-ul-Adha (Baqr-Eid) et trois jours après Eid-ul-Adha.

‘OUMRAH DANS LE MOIS DE HAJJ

Le mois Shawwaal, le mois Zul-Qa’dah et le mois Zulhijjah juska avant soubh swadiq de 10eme nuit, c’est banne mois de hajj. Ça signifié ki ene personne ki ena l’intention faire hajj bizin attache Ihraam de ‘Oumrah ou bien Ihraam pou hajj selon le type de hajj ki li fine choisir, apartir le mois de Shawwaal. Pas avant ça.

‘OUMRAH ET HAJJ TAMATTOU

Ene hajj Tamattou c’est ene hajj ki ena ene ‘Oumrah avant li. Ene ‘Oumrah ki faire ene hajj vine hajj Tamattou, c’est ene ‘Oumrah ki fine faire dans les mois de hajj et apart ça li très important ki la personne pas retourne chez li après avoir accomplir ça ‘Oumrah-là avant ki li accomplir hajj. Si jamais li retourne so la caze après ça ‘Oumrah-là avant faire hajj, alors li pou bizin faire ene l’autre ‘Oumrah quand li retourné, si li oulé faire hajj Tamattou. Ça premier Oumrah-là pas suffit.

‘OUMRAH ET LES HABITANTS DE MAKKAH

Le droit pou accomplir hajj tamattou c’est ene privilège ki shariah fine accorde banne ki habite en dehors Meeqaat. Quant à banne habitants de Makkah et banne ki habite dans les alentours de Makkah à l’interieur de Meeqaat, zotte capave faire hajj Ifraad seulement. Zotte pas en droit faire hajj tamattou. Acoze ça ene habitant Makkah ou bien ene habitant ki habite dans les environs de Makkah pas gagne droit faire ‘Oumrah dans banne moisde hajj si li ena l’intention faire hajj. Parceki si zotte faire ‘Oumrah dans les mois de hajj et ensuite zotte faire hajj, ça hajj-là pou vine ene hajj tamattou ki zotte perna droit faire li. C’est ene facilité ki Allah Ta’ala fine accorde banne musulmans ki reste loin en dehors Meeqaat ki plus ou moins li difficile pou zotte faire voyage, spécialement pou ‘Oumrah. Quant à banne ki reste dans les environs, li bien facile pou zotte accomplir ene ‘Oumrah séparément plutard.

‘OUMRAH POU ENE ETRANGER DANS MAKKAH

Ene étranger ki fine rente Makkah avant banne mois de hajj, li vine pareil couma ene habitant de Makkah. C’est à dire si la lune de Shawwaal fine paraite par exemple et li pas dans l’état Ihraam, alors astere li pas gagne droit faire ‘Oumrah si li ena l’intention faire hajj.

‘OUMRAH SUPPLEMENTAIRE ENTRE ‘OUMRAH ET HAJJ

Ene personne ki alle faire hajj Tamattou, li dispose ene nombre de jours après avoir accomplir ‘Oumrah dans l’intervalle entre ‘Oumrah et hajj. Dans ça I’intervalle-là le haji capave profite l’occasion faire banne ‘Oumrah supplémentaire selon so capacité et so facilité. Pourvu ça pas fatigue li ene quantité ki empêche li faire so hajj couma bizin.

ALLE EN DEHORS MEEQAAT APRES ‘OUMRAH

Apres avoir accomplir ‘Oumrah, dans banne mois de hajj, dans l’intervalle entre ‘Oumrah et hajj ene personne fine alle Madina ou ene l’autre l’endroit ki trouve en dehors Meeqaat. Dans ce cas, en retournant, la personne en question bizin rente Makkah avec Ihraam. Mais li ena choix rente avec Ihraam ‘Oumrah ou avec lhraam hajj Ifraad. Tous les deux permette et dans tous les deux cas, so hajj pou ene hajj Tamattou. En principe li pli bon si li rente avec Ihraam de hajj Ifraad. Mais si ena ene bon nombre de jours divant li avant hajj commencé, alors li dans so l’avantage ki li rente avec Ihraam de ‘Oumrah acote li capave sorte en dehors Ihraam toute suite après ‘Oumrah afin pou évite reste dans l’état lhraam pendant ene bon boute le temps ki paraite pas facile.

Si jamais li rente avec lhraam de hajj alors li pou bizin tini so Ihraam juska ki li termine so hajj. Tanque pas fini, li pas pou capave tire Ihraam. Donc chaque dimoune bizin guette so facilité avant li choisir la qualité de Ihraam ki li pou adopté.

Ene personne pareil, en retournant à Makkah, pas gagne droit rente avec Ihraam de hajj Qiraan. Si li faire li, li bizin paye dam.

NAMAZ DANS ARAFAH

Dans Arafah, banne hajis ena seulement deux namaz - Zohar ek Assar - pou faire. Ça deux namaz-là, Rasouloullah ‎(Sallallaahou A'laihi Wasallam)‎‎‎‎ ti faire li dans ene façon ki li pas ti habitué faire dans lezot jours. C’est à dire li ti combine les deux namaz - Zohar ek Assar - et fine faire zotte dans l’heure de Zohar même, au lieu faire chakene dans so l’heure habituel et normal. Et deuxièmement li fine faire Qasr. C’est à dire li fine faire Zohar ek Assar, tous les deux namaz, deux-deux rakaat au lieu faire li quatre-quatre rakaat. D’apres lmaam Malik (rahmatoullah ‘alayh), Imaam Shafi (rahmatoullah ‘alayh) et lmaam Ahmad Bin Hambal (rahmatoullah ‘alayh), Rasouloullah ‎(Sallallaahou A'laihi Wasallam)‎‎‎‎ ti combine ça deux namaz-là pou faire zotte ene par ene dans ene seul l’heure, acoze ki li ti ene mousafir (voyageur). Donc d’après ça banne savants-là, faudré bizin ene mousafir (voyageur) pou capave faire ça deux namaz-là ensemble dans ene seul l’heure. Si ene Haji li pas ene mousafir, li bizin faire Zohar dans l’heure Zohar et Assar dans l’heure Assar.

Ene haji ki fine fini reste dans Makkah pendant 15 jours ou plis ki 15 jours avant li alle Mina, li nepli reste ene mousafir. Li vine ene mouqeem et li vine couma ene habitant normal. Alors ene haji coumsa, pas pou gagne droit faire ça deux namaz-là ensemble dans ene seule l’heure. Li bizin faire chaque namaz dans so l’heure habituel et normal.

D’après Imaam Abou Hanifah (rahmatoullah ‘alayh), ene haji li gagne droit combine ça deux namaz-là dans ene seul l’heure ziste quand li faire li avec jamaate ki dirigé par Imaam ki fine fixé par l’état. Si li faire li dans ene l’autre jamaate séparé ou bien li faire li tout seul, alors li pas pou gagne droit faire tous les deux namaz dans ene seul l’heure. Li bizin faire chaque namaz dans so l’heure habituel et normal.

Ça veut dire ki ene haji ki pas ene mousafir et ki pé faire namaz avec ene jamaate séparé ou bien tout seul, bizin faire ça deux namaz-là dans zotte l’heure normal. D’après tous les 4 Aimmah li pas gagne droit faire ça deux namaz-là ensemble dans ene seul l’heure.

En ceki concerne faire ça deux namaz-là deux-deux rakaat au lieu 4 rakaat selon Imaam Tirmizi ((rahmatoullah ‘alayh)), banne 'Oulama couma Imaam Abou Hanifah (rahmatoullah ‘alayh), lmaam Malik (rahmatoullah ‘alayh), Imaam Shafi (rahmatoullah ‘alayh), Imaam Ahmad Bin Hambal (rahmatoullah ‘alayh), Soufyaan Thawry (rahmatoullah ‘alayh), Yahya Bin Said Al-Qattaan (rahmatoullah ‘alayh) dire ki bizin être ene mousafir (voyageur) pou capave faire li dans ça façon-là.

Donc si ene haji fine fini reste 15 jours ou plis ki 15 jours dans Makkah avant li alle Mina, alors li fini vine couma ene habitant normal. Li bizin faire so banne namaz normal. Li pas gagne droit réduire banne namaaz 4 rakaat à deux rakaat.

Après tous ça explication-là, quand nou analyse le cas ene haji ki fine fini vine couma ene habitant normal, nou trouvé ki ça qualité haji-là pas pou gagne droit faire namaz Zohar ek namaz Assar ensemble dans ene seul l’heure dans Arafaate. D’après tous les 4 lmaam, so namaz pas pou correcte parceki li bizin être ene mousafir d’après Imaam Malik (rahmatoullah ‘alayh), Imaan Shafi (rahmatoullah ‘alayh) et Imaam Ahmad Bin Hambal (rahmatoullah ‘alayh) pou li capave faire tous les deux namaz ensemble. Et d’après tous les 4 Imaam, li bizin ene mousafir pou li capave faire 2-2 rakaat au lieu 4-4 rakaat. Acoze ça nou conseille nou banne frères et soeurs haji ki zotte pas bizin complique la vie. Faire tous les deux namaz dans la tente même avec jamaat. Faire Zohar dans l’heure Zohar et Assar dans l’heure Assar. Astere si le haji fine fini reste 15 jours ou plis ki 15 jours dans Makkah avant li alle Mina, alors li faire tout les deux 4-4 rakaat. Si li fine reste moins ki 15 jours dans Makkah avant li alle Mina alors li faire Zohar 2 rakaat et Assar 2 rakaat.

N.B: Ça deux namaz Zohar et Assar ki faire ensemble par 2-2 rakaat dans l'heure de Zohar dans la plaine Arafah, li correcte pou faire si le haji li ene mousafir et Imaam fixé par l'état ki pé dirige ça namaz-là, li aussi li ene mousafir et li dans l’état Ihraam pou Hajj.

NAMAZ DANS MINA

Banne ki mousafir, zotte bizin faire banne namaz Zohar, Assar et Esha deux deux rakaat au lieu 4-4 rakaat dans Mina. A moins si zotte pé faire ça banne namaz-là derrière ene Imaam ki pas mousafir. Alors dans ça cas-là, zotte bizin faire ça banne namaz-là normal. C’est à dire zotte faire li 4-4 rakaat même. Coumsa même ene haji ki pas mousafir, bizin faire tous so banne namaz normal dans Mina.

Couma ou pou conné ki ou ene mousafir ou non ?

Ou bizin garde en tête ki date ou fine rentre dans Makkah et ki jour ou pou sorti Makkah pou alle Mina. Si ou trouvé ki ou fine fini reste dans Makkah 15 jours ou plis ki 15 jours avant ou alle Mina, alors ou pas ene mousafir. Ou fini vine couma ene habitant là-bas même ki bizin faire tous so banne namaz dans Mina normal. Mais si ou trouvé ki ou fine reste moins ki 15 jours dans Makkah avant ou alle Mina, alors ou ene mousafir et ou bizin faire banne namaz 4 rakaat vine 2 rakaat. Astere si ou pé suive ene lmaam ki pas mousafir, alors ou pou bizin faire couma li pé faire. C'est à dire faire tout banne namaz normal.

Jinaayah

Ki veut dire Jinaayah?

Jinaayah veut dire commette offense. En ceki concerne ‘Oumrah et Hajj, Jinaayah veut dire commette kitchose ki empeché faire dans l’état Ihraam ou bien acoze le lieu sacré de Haram. Par exemple taille z’ongle et taille cheveux pas permette pou éne personne dans l’état Ihraam. Astère malgré ça si li taille cheveux ou taille z’ongle, veut dire ki li fine commette Jinaayah.

Offense et kaffaarah

Quand éne personne commette éne offense dans l’état Ihraam ou dans Haram, alors ça necessite éne l’amane. La qualité de kaffaarah li vine waajib selon la gravité de l’offense. Dans certaine cas bizin faire zabah éne bouc couma dans certaine cas li necessite juska faire qourbani éne chameau aussi. Dans certaine cas éne ti sadaqah aussi li suffit.

Commette offense par oubli

Pou kaffaarah vine waajib, li pas necessaire ki fine commette l’offense avec connaissance. Parceki kaffaarah li vine waajib même si fine commette l’offense par l’oubli, par l’ignorance, sous contrainte, dans sommeil, dans soulaison ou par éne coute manqué. Mais si fine commette li avec connaissance sans aukene raison valable, alors ensemble avec kaffaarah li gagne péché aussi. Dans ça cas-là kaffaarah pas suffit pou couvert ça l’offense-là. Bizin faire tawbah aussi pou ça péché-là effacé.

Nous bizin mette dans nous la tête ki faudré pas kikène parmi nous commette éne l’offense avec l’idée pou couvert li par fidya ou kaffaarah parceki c’est éne kitchose très grave. Commette ene kitchose ki interdit pendant Ihraam sans kit raison valable, c’est ene desobeissance pou Allah Ta’ala. La desobeissance pou Allah Ta’ala li éne kitchose bien bien grave.

Quand kikène commette kitchose ki empeché dans Hajj sans éne raison valable, alors so Hajj pas appelle éne Hajj Mabrour.

Hajj mabrour

Mabrour li sorti à partir le mot “Birr” ki signifie la bonté et la piété. Donc éne Hajj Mabrour c’est éne Hajj ki rempli de la bonté et de la piété. Éne Hajj pareil c’est éne Hajj acceptable ou éne Hajj maqboul. Dans Qour’aan-é-Kareem Allah Ta’ala dire:

“... Allah li accepté seulement de la part de ceux qui ena Taqwa (piété).” (S5/ V27)

Couma tous les autres actions, Hajj aussi li éne action ki pou vine mabrour, maqboul et acceptable quand ça fine être accompli en observant le Taqwa (piété).

Accomplir éne action avec Taqwa et avec la piété veut dire faire ça action-là en observant strictement so banne principles et reglements. En ceki concerne Hajj, éne Hajj mabrour c’est éne Hajj ki fine être accompli en suivant strictement so banne principles et so banne reglements sans commette kit peché et sans faire kikène du tort.

Selon éne hadith rapporté par Hazrat Jabir ‎(Radiyallahou anhou‎)‎ Rasouloullah ‎(Sallallaahou A'laihi Wasallam)‎‎‎‎ fine dire :

“Devotion dans Hajj trouve dans donne mangé et dans cause bon causé.” (Mousnad Ahmad/Tibraani)

Recompense Hajj mabrour

Rassouloullah ‎(Sallallaahou A'laihi Wasallam)‎‎‎‎ fine dire:

“Hajj mabrour na pena aukene recompense pou ça apart Jannat.” (Boukhari/Mou’atta Imam Malik).

Jannat represente le salut eternel. Ça signifié ki z’effort qui éne personne faire pou accomplir éne bon Hajj, en realité c’est éne z’effort pou reussir eternellement.

Selon éne l’autre hadith, Rassouloullah ‎(Sallallaahou A'laihi Wasallam)‎‎‎‎ fine dire :

“Celui ki accomplir Hajj et li pas commette aukene grossièreté ni li commette kit péché alors en ceki concerne so banne péchés li vine absolument couma ça jour ki so maman ti donne li naissance.” (Boukhari/Muslim)

C’est à dire couma éne ti bébé ki fine fécque né, li éne innocent ki na perna aukene péché, coumsa même ça personne-là aussi, tout so péché effacé.

Signe ène Hajj mabrour

Éne de banne signes de Hajj mabrour c’est que la personne vine plis bon ki avant - c’est à dire après Hajj so la vie pli ammelioré et li vine pli bon et li pratique Deen pli bien ki avant Hajj.

Commette offense par obligation

Par contre si kikène fine bizin commette kikchose ki interdit par la necessité et par obligation, alors ça pas diminué recompense de so Hajj. Mais li aussi li bizin donne fidya. C’est à dire li bizin soit garde 3 roza ou soit distribuer à six pauvres, la valeur éne sadaqatoul-fitr à chakene ou bien faire zabah éne bouc.

N.B:- Le choix entre ça trois qualités de fidya c’est éne facilité accordée à éne personne ki fine bizin commette kitchose ki interdit en cas oblige seulement. Quant à sadaqah li capave faire n’importe côte ça li oulé. Coumsa même li capave garde so Roza côte li oulé. Li capave garde so Roza couma li oulé. Pas necessaire garde li dans Haram ni li important pou garde li consecutivement. Li ena droit garde li saute-sauté aussi. Mais si li choisir pou faire Zabah, alors li bizin faire li dans Haram. A moins si li distribué ça la viande-là aux six pauvres en sorte ki chaque pauvre recevoir la valeur éne sadaqatul-fitr. A ce moment-là aussi, ça aussi li pou valable et li pou compté.

Comportement generale de ene mouhrim

(ène personne dans l’état Ihraam)

Allah Ta’ala dire dans Qour’aan-é-Kareem:

“Celui ki engage li dans Hajj dans ça banne mois-là, alors à ce moment là pas bizin éna ni Rafath, ni Foussouq, ni Jidaal…” (S2/ V197)

Rafath comprend tout qualité action, declaration et comportement ki vulgaire, grossier et indecent. Cause banne gros mots dans ène façon vulgaire et grossier juska même cause causé l’amour et kitchose ki éna relation avec sexe avec so madame aussi li interdit dans l’état Ihraam.

Fousouq signifié tout kitchose ki contre Shariah. C’est ène terme ki englobe toute sorte désobeissance ki ène serviteur commette à l’égard de so Rabb. En sus de ça li englobe tout banne kitchose ki interdit dans l’état Ihraam.

Jidaal veut dire discuté, querellé et rentre dans banne conflits dans ène façon vulgaire et indésirable ki normalement péna aukene utilité apart crée l’ènemité et la haine.

Le verset pé mette ène Haji en garde contre toute sorte grossièreté et façon vulgaire et pé invite li pou être gentil, poli et pou reste loin de toute sorte de désobeissance et reste à l’écart de toute sorte péché. C’est banne kitchose indesirables dans lizié Allah Ta’ala. Surtout dans l’etat Ihraam et dans Haram.

Mahzooraat de Ihraam

Afin pou capave faire ène bon ‘Oumrah et ène bon Hajj, li très important pou ène Haji conne banne kitchoses ki interdit pendant Ihraam. Ça banne kitchoses-là appelle Mahzouraat de Ihraam. Mahzouraat même signifié banne kitchoses ki interdit. Mais dans le contexte de ‘Oumrah et Hajj, ça signifié banne kitchoses ki ti permette avant Ihraam mais fine interdit ziste acoze l’état Ihraam ou bien acoze le lieu sacré de Haram.

Quant à banne kitchoses ki ti haraam et interdit avant Ihraam, zotte pou continuer reste haraam. Au contraire ça pou boucou pli grave à coze ça l’état et l’endroit ki ène Haji été.

En principe nou éna six Mahzouraat (kitchoses interdits) ki necessité par Ihraam :

Relation sexuelle,
La chasse,
Taille cheveux lors la tete ou tire cheveu depi lors le corps ou taille z’ongle,
Servi parfum,
Mette linge ki coude lors forme le corps
Couvert la tête ou couvert figure.

Mahzouraat de Ihraam en detail

1. Relation Sexuelle

Pas gagne droit alle dans ménage pendant Ihraam. Coumsa même pas gagne droit cause banne paroles indecent, érotiques et tout banne kitchoses ki éna rapport avec sexe. Tout ça-là li empeché, même avec so madame aussi. Avec ène étrangère pas gagne droit du tout. Ni dans Ihraam ni en dehors Ihraam.

2. La Chasse

Dans Qour’aan-é-Kareem, Allah Ta’ala dire:

“O banne ki fine amène imaan, pas touye banne gibiers quand ou dans l’état Ihraam.” (S5/ V95)

“La chasse (banne gibiers ki vive lors la terre) li interdit lors ou tanque ki ou dans l’état Ihraam…” (S5/ V96)

D’après ça banne versets-là, ène mouhrim pas gagne droit touye ène gibier. Couma pas gagne droit touyé, coumsa même pas gagne droit aide kikene pou la chasse ène gibier. Ça montré ki pas gagne droit interfere avec ène gibier, ni montré ni indiqué cote li été. Tout action ki enleve sécurité ène gibier li interdit lors ène personne dans l’état de Ihraam.

Ene gibier li signifié tout z’animaux ki farouche de par so nature et ki so naissance li lors la terre et ki défanne ou bien protege li soit par so les ailes ou par so la patte. Na péna aukene difference entre ène z’animau ki halaal et ène z’animau ki haraam. Couma pas gagne droit interfere avec ène z’animau ki halaal, coumsa même pas gagne droit interfere avec ène z’animau ki haraam. C’est à dire couma la chasse lièvre et cerf li défanne, coumsa même la chasse lion, tigre etc... li interdit.

Couma ène mouhrim pas gagne droit la chasse et interfere avec banne z’animaux ki dans Haram, li pas gagne droit faire ça avec banne gibiers ki en dehors Haram aussi.

Exception

Mais acoze sécurité ène mouhrim, Shari’ah fine autorise ène mouhrim pou débarasse li avec certaine z’animaux nuisible ki normalement faire du tort. De ce fait Shari’ah qualifié zotte comme “faassiq”.

Dans ène Hadice de Boukhari Sharif rapporté par Hazrat Aisha ‎(Radiyallahou anhou‎)‎, Rassouloullaah  fine dire:

“Ena cinq z’animaux ki zotte tous faasiq (nuisible) et li capave etre tué dans Haram: corbeau, vautour, scorpion, le rat et li chien enragé.” (Boukhari)

Ena banne hadices ki mentionne serpent, le loup, leopard et banne z’animaux féroce et agressif. A la lumière de ça banne hadices-là, ène mouhrim, pou so sécurité, li gagne droit touille ène serpent ki nuisible pareille couma scorpion. Quant à le loup, leopard et les autres z’animaux feroce ki agressif capave etre tué si zanimau-là paraite capave attaqué ou capave agressé. Si pou défanne li et sauve so la vie, ène mouhrim fine touille ène z’animau là-dans, alors ça pas pou affecté so ‘Oumrah ou so Hajj ni li pou éna l’amane à payer. Par contre si ène mouhrim fine faire premier pas vers l’attaque sans ki ça z’animau feroce-là attaque li ou agresse li, alors li pou éna ène l’amane à payer si jamais li fine touille z’animau-là.

3. Taille Cheveu ou Taille Z’ongle

Ene mouhrim pas gagne droit raser, tailler ou enleve cheveux ou poil dépi lors so le corps. Couma li pas gagne droit taillé, rasé ou enleve so propre cheveu, coumsa même li pas gagne droit taillé, rasé ou enleve ène l’autre dimoune so cheveu, même si ça l’autre dimoune-là li pas dans l’état Ihraam. Ici cheveux comprend la barbe, moustache et tout banne poil ki éna lors ène dimoune so le corps.

Rase la barbe li pas permette dans l’état normal, alors li pou pli grave dans l’état Ihraam. Couma li pas gagne droit taille cheveux coumsa même li pas gagne droit taille z’ongle. Li pas gagne droit laisse kikène taille so z’ongle ni li taille kikène so z’ongle.

N.B:- Si kikène so z’ongle fine cassé et pé tini lors ène boute, alors na péna narien si li detache ça boute z’ongle là.

4. Servi Parfum

Ene mouhrim bizin pas servi parfum dans l’état Ihraam. Si li servi, li bizin paye dam. Si arrivé li servi parfum avec l’intention medicament, là-dans aussi li ena pou paye l’amane.

N.B:- (1)Si ène mouhrim mette parfum avec ène lotte dimoune, alors ça mouhrim-là péna narien à payer comme l’amane.

(2) Li empeché pou ène mouhrim lave so la tête ou so la barbe ou bien so le corps avec kitchose ki éna parfum ou soit kitchose ki amolir cheveux et chevelure couma savonnette, shampooing etc...

5. Mette linge ki fine coude lors forme et mésure le corps

Ene mouhrim péna droit mette ène linge ki fine taillé et coude lors forme le corps couma kourta, pyjama, pantalon, chemise, sous vetement etc… Comme ça même pas gagne droit mette ène linge ki fine coude pou couvert ène parti le corps couma chaussette, bonnet, les gants etc... Tout ça-là li appliqué pou ène z’homme. Quant à ène madame li autorisé pou mette ène linge ki fine coude lors forme le corps.

6. Couvert la tête et couvert figure

Ene mouhrim li pas gagne droit couvert so figure. Ça li appliqué pou z’homme et madame tous les deux. Mais madame-là bizin barre so figure divant banne étrangers avec l’espece ène l’évantail ou avec so voile ou bourqa mais li bizin faire ça en sorte ki ça pas touche so figure. Normalement banne madames zotte mette ène l’espece casquette enbas zotte voile lors zotte la tête et zotte jette voile-là depi par là-haut ça casquette-là. Ça barre zotte figure sans touche figure. Etant donné ki la bouche et menton li trouve dans figure, alors ene zomme pas gagne droit couvert ni la bouche ni menton. Ene madame aussi, li bizin couvert so figure dans ene façon ki so voile pas touche so la bouche ni so menton.

Ene z’homme pas gagne droit couvert so la tête dans l’état Ihraam. Ça veut dire ki ‘Imaamah aussi li pas pou en droit metté ni li en droit mette mouchoir lors so la tête.

Quant à ène madame, li bizin couvert so la tête. Couma la tête ène z’homme ki dans l’état Ihraam bizin reste découvert coumsa même so cheville et so coude li pied bizin reste découvert.

N.B:- Mette la tête ou figure en bas couverture Ka’bah li makrouh pou ène mouhrim. Pas gagne droit charrié lors la tête ene kitchose ki normalement banne dimoune servi comme l’habillement. Par exemple ène mouhrim pas pou en droit charrié ène paquet linge lors so la tête. Mais si ça banne linge là zotte dans ène panier ou bien dans ène sac ou valise, li pou en droit charrié ça lors so la tête. Tout ça-là parceki quand kikène charrié kitchose ki normalement servi couma l’habillement, comme si li fine couvert so la tête ki ène mouhrim pas gagne droit. Mais charrié valise, sac, etc... pas appelle couvert la tête.

Li makrouh pou ène mouhrim fonce so la tête ou plonge so figure dans l’oreiller parceki ça aussi li couma dire couvert la tête et couvert figure ki pas gagne droit. Mais si necque li pose so la tête ou soit so la joue, alors ça li permette malgré ki ici aussi ène parti la tête et ene parti figure fine fonçé, parceki ça li ène façon recommendé pou dormi.

Waajibaat et Mahzooraat

Nous ena deux (2) sortes de waajib. Ene waajib ki bizin faire li et l’autre ki bizin pas faire li. Le premier ki bizin faire nou appelle banne waajibaat. Et le deuxieme ki bizin pas faire nou appelle mahzouraat - par example batte shaitaan c`est ène pratique ki bizin faire, alors li forme parti dans banne waajibaat. Et taille cheveux c`est ène pratique ki bizin evité et pas faire, alors li forme parti dans mahzouraat.

Neglige ène kitchose ki waajib pou ène raison valable

Si ène personne fine neglige ène kitchose ki waajib pou ène raison valable, alors li pena narien a payer comme l’amane - par exemple li waajib pou faire Tawaaf-e-Ziyaarat juska avant soleil couché du 12^ème Zil hijjah - mais si ène madame pas fine capave faire li avant ça acoze haiz (regle), alors li pena narien à payer comme l’amane. Coumsa même ène madame capave quitte Makkah sans faire Tawaaf-e-Wadaa’ si en cas li fine gagne so haiz au moment de so depart pou Madinah Shareef. Li pas pou ena pou paye kit l’amane pou ça.

Neglige ène waajib sans ène raison valable

Par contre si li fine neglige ène waajib sans ène raison valable, alors li pou ena l’amane à payer selon circonstance.

L’amane pou avoir commis ène de banne mahzooraat (kitchose ki bizin evitér) pou ène raison valable

Quant à banne kitchose ki ti bizin pas faire, si fine faire li pou ène raison valable, alors ena fidyah là-dans. Fidyah veut dire soit garde trois roza ki pas necessaire gardé consecutivement, capave garde li saute-sauté aussi. Ou bien donne six (6) pauvres la valeur ène sadaqat-ul-fitr à chacun. Ou soit faire zabah ène bouc. Par exemple si ène personne fine bizin rase so la tete acoze maladie, alors li ena choix entre ça trois kikchose-là. Mais si li fine commette ça kitchose-là sans aukene raison valable, alors li bizin absolument paye l'amane ki appelle Dam. Dans ça cas-là li perna choix apart paye dam.

Ki veut dire dam?

DAM c'est ene genre de l'amane ki appliqué quand fine commette ene kitchose ki interdit dans Ihraam sans ene raison valable ou bien quand fine quitte ene kitchose ki ti waajib sans ene raison valable. Le mot Dam veut dire du sang. Ici dans ça contexte-là, li signifié verse du sang par faire zabah ene ti zanimeau couma ene bouc ou bien ene grand zanimeau couma ene chameau selon circonstance.

Ki veut dire sadaqah

Dans le contexte de Hajj quand nous dire sadaqah, ça veut dire la valeur ene fitra ki le haji bizin donné pou repare banne manquements mineurs ki li fine capave commette dans banne pratiques de hajj.

Dam ou l’amane pou avoir commis, sans ène raison valable, ène de banne mahzoorat (kitchoses ki bizin evitér et abstenir)

Dam dans servi parfum sans ène raison valable

Servi banne substances couma musc, ambre, camphre ki zotte parfum en zotte même, li necessite l’amane quand même si fine servi ça comme ène médicament aussi. Mais dans le cas cotte li necessite dam si fine servi ça comme médicament, alors li pou éna l’option soit li garde 3 roza ki pas nécessairement consecutives ou soit distribué à six pauvres la valeur de ène sadaqat-ul-fitr à chacun ou bien faire Qourbaani ène bouc.
Mette parfum lors ène grand organe complete dans l’état Ihraam li necessite ène dam.
Mette parfum lors ène seul grand organe complete ou plusieurs organes ena même l’effet en ceki concerne dam si ça fine faire dans ène seul session. C’est à dire ène seul dam bizin donner.
Par contre si fine parfume plusieurs parti dans le corps dans plusieurs session, alors ça pou necessite ène dam separé pou chaque fois ki li fine servi parfum.
Servi ène bon quantité parfum lors 25 pou cent ou plis ki 25 pou cent de ène grand organe le corps ou soit ène ti peu parfum lors ène grand organe entier, necessite ène dam.
Servi ene bon quantité parfum lors ene ti l’organe entier ena dam.
Servi ène bon quantité parfum lors moins ki 25 pou cent de ène grand organe necessite sadaqah.
Servi ène ti peu parfum lors moins qui ène l’organe entier necessite sadaqah.
Li recommendé pou mette parfum dans le corps - pas dans linge avant rentre dans l’état Ihraam. Astère après ki fine rente dans l’état Ihraam si ça parfum ki fine metté avant-là fine gagne dans ène lot place, ça pas pou necessite aukene dam.
A noter qui dans l’état Ihraam li makrouh pou senti parfum ou soit banne fruits ou banne fleurs ki ena bon parfum mais ça pas necessite aukene l’amane. Coumsa même li makrouh por assize dans ène parfumerie avec l’intention pou senti parfum. Mais ça pas necessite aukene l’amane. Sans ène l’intention pareil capave assizé.

N.B : Zoreille et néné compte dans banne tipti l’organe et la jambe, mollé, figure, la tête compte dans banne grand l’organe.

Dam dans mette linge parfumér

Mette ène linge ki fine parfumé avec ène bon quantité parfum et reste avec ça pendant ène journée complete necessite dam. Coumsa même si ène bon boute ça linge-là fine parfumé avec ène ti peu parfum, ça aussi pou necessite ène dam si fine mette ça pendant ène journée entier.
Mais si ça linge-là fine parfumé ène ti boute même ou soit pas fine continué reste avec ça pendant ène journée entier, alors dans ça deux cas-là ena seulement sadaqah.
Ena difference entre mette parfum lors le corps et mette parfum lors linge. En ceki concerne linge faudré bizin reste avec ça linge-là pendant ène journée complete pou dam vine obligatoire. Mais en ceki concerne mette parfum lors le corps, couma metté même dam fini vine obligatoire. Pas bizin absolument laisse li ène journée entier pou dam vine obligatoire.

Dam dans servi mehendi

Li recommedé pou ène madame mette mehendi lors so la main et so li pied. Dans la même façon, ène z’homme gagne droit mette mehendi dans so la tête et so la barbe. Mais faudré pas zotte faire li dans l’état Ihraam parceki ça aussi li couma ene parfum. Mette mehendi dans l’état Ihraam nécessite dam. Na pena narien de mauvais si couleur mehendi ki ti metté avant rente dans l’etat Ihraam, reste dans cheveux, la main, li pieds et la barbe après ki fine rentre dans Ihraam. Ene dimoune gagne droit mette mehendi avant rente dans l’etat Ihraam. Pourvu li fini lave so le corps et tire so mehendi avant li attache Ihraam.

Dam dans servi de l’huile

Ena de l’huile ki capave servi dans plusieurs façons. Par exemple de l’huile olive et de l’huile sésame capave servi dans mangé, boire couma capave servi comme ène lubrifiant pou le corps et couma capave servi aussi pou dilué et mélange banne parfum. Alors pou ena l’amane si fine frotte ene de l’huile pareille lors le corps ou dans cheveux comme lubrifiant. Par contre si fine servi ça dans mangé, boire ou comme médicament pou traite banne fissures dans li pied ou fine servi dans z’oreille, alors na pena aukene l’amane là-dans.
Pou dam vine obligatoire faudré fine lubrifié ène l’organe entier. Si fine servi de l’huile dans moins ki ène l’organe, alors là-dans pou ena sadaqah.
Dans servi ène la graisse ou ène de l’huile ki servi seulement dans consommation na pena aukene l’amane là-dans.

Dam dans servi parfum dans mangé

Dans mange ène mangé ki contenir parfum et ki fine cuit na pena aukene l’amane là-dans.
Quant à ène mangé ki pas fine cuit et ki contenir parfum là-dans à ène proportion predominante de ça parfum-là, alors ça pou nécessite dam si consommé, même si parfum-là pas senti aussi.
Mais si parfum-là li existé dans ça mangé-là à ène proportion faible et inferieure, alors na pas pou éna dam dans consomme ça. Seulement li pou makrooh pou consommé si li donne parfum.

Dam dans servi parfum dans la boisson

Ena l’amane dans boire ène la boisson ki contenir parfum. Si parfum-là li predominant, alors pou bizin donne dam et si li inferieur, alors bizin donne sadaqah. A moins si fine boire ça à plusieurs reprises, à ce moment-là bizin paye dam. Ca li applique lor banne la boisson gazeuse, alouda, sirop, du thé et café aussi ki contenir parfum
Ena substance ki melange et dilué avec parfum et ki servi lors le corp, alors bizin guetté : Si dimoune appelle ça l’usage là “servi parfum” alors bizin donne dam. Si zotte appelle ça autrement alors bizin donne sadaqah là-dans. Par exemple servi savonnette ki normalement ena parfum là-dans pou necessite sadaqah, pas dam parceki dimoune pas appelle ça “servi parfum” - zotte appelle li “servi savonette”.

N.B :- Savon ki pena parfum capave servi dans état Ihraam.

Dam dans linge ki fine coude

Li interdit pou ene zomme mette linge coude dans l’état Ihraam. Pour ene madame li pas empêché.

Linge ki fine coude signifié ene linge ki fine coude lors forme le corps couma kourta, chemise, pantalon, paletot, jaquette, bonnet, chaussette, le gant etc.

Ene Mouhrim ki mette ene linge coude couma Kourta, chemise, pantalon etc. ou soit li couvert so la tête pendant ene journée ou pendant ene la nuit, bizin donne Dam.
Si le Mouhrim fine mette ene linge coude plis ki ene journée ou plis ki ene nuit, là-dans aussi li ena ene seul Dam à donné.
A moins si li tire ça linge-là depi lors so le corps avec ene l’idée pou pas remette li, alors dans ça cas-là, si li remette ça ene l’autre coup, li bizin donne ene l’autre Dam pour ça deuxième coup-là.
Par contre si li fine tire ça linge-là depi lors so le corps, avec ene I’idée pou remette li ou bien avec ene l’intention pou mette ene l’autre dans so place, alors dans ce cas li pou ena ene seul dam.
Pou ene seul on plusieurs linge coude ki le Mouhrirn metté à la fois pendant ene journée ou ene nuit, ena ene seul dam. Pou plusieurs linge pas pou ena plusieurs dam.
Ene Mouhrim fine fini paye ene dam pou ene linge coude ki li ti metté avant ki li tire ça linge-là depi lors so le corps. Li fine continué reste avec ça. Dans ce cas li bizin donne ene l’autre dam, parceki quand li fine continué reste avec ça, couma dire li fine remette ça ene nouvelle fois.
Quand la raison et motif pou mette linge coude changé, alors ene l’autre Kaffaarah ou bien fidya vine waajib. Par exemple ene Mouhrim fine mette linge coude à coze la fièvre, alors li fine bizin donne Kaffaarah. Astere si li remette ça pou ene l’autre maladie, li bizin donne ene l’autre Kaffaarah parceki la raison pou laquelle li fine remette ça fine changé. Par contre si li fine regagne même problème ki li ti gagné avant, dans ce cas li pas pou bizin donne ene 1’autre Kaffaarah. Ene seul Kaffaarah sufi.
Couma ene Mouhrirn pas gagne droit mette bonnet lors la tête, coumsa méme li pas gagne droit couvert so la tête ni li gagne droit couvert so figure. Si li fine couvert entier la tete ou entier figure pendant ene journée ou pendant ene nuit, alors ena dam à payer.

Couvert ¼ la tête ou couvert ¼ figure li couma dire couvert entier la tête ou entier figure. C’est-à-dire li bizin paye meme quantité et même qualité l’amane ki li bizin payé dans couvert entier la tete ou entier figure. A noter ki dam vine waajib quand li arrivé couvert ¼ ou plis ki ¼ figure ou la tête pendant ene journée ou ene nuit. Mais si li fine couvert moins ki ¼ figure ou moins ki ¼ la tête pendant ene journée ou ene nuit alors ena sadaqah seulement. Coumsa même si li fine couvert ¼ ou plis ki ¼ ki li soit la tête ou figure pendant moins ki ene journée ou moins ki ene nuit, alors ici aussi ena sadaqah seulement.

N.B:- Ene linge ki ti metté par nécessité bizin tire li quand pas bizin li. Si malgré pas bizin li, li fine continué mette li, alors li couma dire fine mette linge coude sans aukene nécessité ki normalement pou nécessite l’amane. C’est-à-dire ene l’amane en forme dam ou en forme sadaqah pou appliqué selon la durée et la quantité le corps ki li fine couvert.

N:B:- Couma ene zomme pas gagne droit mette le gant et chaussette, coumsa même li pas gagne droit enveloppe narien lors so la main ou so li pied sans aukene raison valable. Mais li gagne droit necque couvert li avec ene couverture ou ene la toile.

N:B:- Couvert figure ou couvert la tete ki necessite dam ou sadaqah veut dire couvert avec ene kitchose ki touche avec la tete ou avec figure. Ene kitchose ki couvert sans touche avec la tete ou bien figure pas necessite aukene l’amane.par exemple couvert la tete avec parasol pas necessite aukene dam.

DAM DANS TAILLE CHEVEUX

Tire cheveux de ¼ la tête ou plis ki ene ¼ la tête par raser, par tailler ou avec solution ou par n’importe ki moyen sans ene excuse valable, li nécessite dam. C’est-à-dire bizin sacrifié ene bouc ou ene mouton pou répare ça offense-là. Raser ou taille cheveux lors moins ki ¼ la tête nécessite sadaqah.
Tire cheveux de ¼ ou plis ki ¼ la barbe sans ene excuse valable par n’importe ki moyen aussi nécessite dam. Li bon conné ki pou le besoin de dam, la barbe ek moustache, tous les deux compte ene seul l’organe. Donc bizin mette moustache ek la barbe tous les deux ensembles quand ena pou estime la quantité cheveu ki fine tiré depi dans la barbe. Si fine taille la barbe moins ki ene quart ou bien fine tire seulement moustache alors ena pour donne sadaqah seulement.
Coumsa même rase ene coté enbas le bras ou tous les deux cotés, rase embas nombril ou rase cheveu lors li cou, tous ça-là nécessite dam. Si li tire cheveu lors ene parti li cou, alors là-dans ena sadaqah.

SADAQAH DANS TAILLE CHEVEU ENE L’AUTRE

Ene personne ki li en plein l’état Ihraam, pas gagne droit tire so cheveu. Coumsa même, li pas gagne droit tire cheveu ene l’autre dimoune.

Si li tire cheveu ene l’autre personne ki li aussi li en plein l’état Ihraam, alors li bizin donne sadaqah. Si li tire cheveu ene 1’autre personne ki li pas dans l’état Ihraam, alors li donne sadaqah ene quantité ki li oulé. Pas necessaire donne absolument la valeur ene fitra. Li capave donne moins ki ça aussi.

Quant à la personne ki ti en plein l’état Ihraam et ki fine faire tire so propre cheveu, si li fine faire tire cheveu depi lors ¼ la tête ou plis ki ¼ la tête, alors li bizin donne dam. Si li moins ki ça, alors li donne sadaqah.

DAM DANS TAILLE ZONGLE

En ceki concerne taille zongle, dam vine obligatoire quand taille zongle de ene ou tous les deux la main. Coumsa même quand taille zongle dans ene ou tous les deux li pied. C’est-à-dire si li fine taille zongle dans tous les cinq les doigts dans ene la main ou plis ki cinq le doigts, alors dam pour vine waajib. Par contre si li taille moins ki cinq zongles dans ene la main ou ene li pied ou bien li fine taille moins ki cinq zongles depi dans chaque la main et chaque li pied, alors dans ce cas li pou bizin donne ene sadaqah pou chaque zongle ki li fine taillé. Si le montant de ça banne sadaqah-là li vine egal à la valeur de ene dam, alors li ena droit diminué li ene quantité ki li vine moins ki la valeur ene dam.

DAM DANS TAWAAF QOUDOUM SANS TAHAARAT

Tawaaf Qoudoum li ene tawaaf ki pas obligatoire. Li sounnat. Mais quand faire li bizin ena tahaarat. Si jamais kikene fine faire li sans ki li ti ena roussal lors li alors li bizin donne dam. C’est-à-dire li bizin sacrifié ene bouc ou ene mouton pour répare li. Coumsa même si li fine quitte 4 tours ou plis ki 4 tours après avoir commence li, alors li bizin paye dam. Mais si li fine quitte trois ou moins ki 3 tours, alors li bizin donne ene sadaqah pou chaque tour ki li fine manqué. Dans ça banne cas-là, dam ou bien sadaqah vine waajib si li pas remplace ça tawaaf-là. Mais si li fine remplace li, li pas pou ena dam lors li ni sadaqah. Si li fine faire ça tawaaf-là complètement ou 4 tours ou plis ki 4 tours sans wazou, alors là, li bizin donne necque ene seul sadaqah.

DAM DANS FAIRE TAWAAF SADAR SANS ROUSSAL

Tawaaf Sadar li waajib lors tous hajis étranger avant ki zotte quitte Makkah. Excepté ene madame ki fine gagne so période et so groupe pé quitte Makkah. Alors dans ene situation coumsa, si li pas encore faire tawaaf, li gagne droit quitte Makkah sans faire li.

Si kikene fine faire ça tawaaf-là sans roussal, alors li bizin donne Dam. A moins si li fine faire ene l’autre tawaaf pou remplace li. A ce moment-là, li pas bizin donne Dam. Dans ene telle situation, en principe d’abord bizin faire le maximum z’effort pour remplace li. Si pas fine capave même, lerla dans dernier lieu, bizin répare li avec Dam. La même chose appliqué pou ene madame ki fine faire li dans so période. Quant à ene personne ki fine faire tawaaf sadar 4 tours ou plis ki 4 tours ou fine faire li complètement sans wazou, alors li bizin donne ene sadaqah. Si jamais li faire 4 tours ou plis ki 4 tours avec tahaarah mais li quitte trois tours ou moins ki trois tours dans tawaaf, alors li bizin donne ene sadaqah pour chaque tour ki li fine manqué. A moins si li remplacé, li perna narien pou donné.

DAM DANS QUITTE TAWAAF SADAR

Si kikene fine quitte tawaaf sadar complètement ou bien 4 tours ou plis ki 4 tours là-dans, alors li bizin donne dam pour répare ça. Li bon noté ki tanque ki la personne li dans Makka ou endans Meeqaat, li bizin absolument faire tawaaf meme. Li pas bizin donne dam. Mais si li fine fini alle en dehors Meeqaat, astere li ena choix entre retourné faire li ou bien donne dam. Si li fine choisir pour retourné, li bizin retourné avec Ihraam. Li faire 'Oumrah d’abord et ensuite li faire tawaaf sadar. Dans ce cas, li pas bizin donne aukene dam.

Ene madame gagne droit quitte Makkah sans faire tawaaf sadar (wada) si li dans so période et so groupe pé déplacé. Li perna narien à payé ni sacrifié comme dam.

DAM ET TAWAAF ZIYAARAH SANS TAHAARAT (SANS WAZOU OU SANS ROUSSAL)

Tawaaf ziyaarah li faraz et obligatoire dans hajj. Si ene personne fine faire tous les sept tours dans tawaaf ziyaarah ou 4 tours ou plis ki 4 tours sans wazou, alors li ena pou sacrifié ene ti zanimaux couma ene bouc ou ene mouton comme dam. Mais si fine faire li sans roussal, dans ce cas li pli grave. Acoze ça, pou répare li, bizin sacrifié ene grand zanimau couma ene chameau on bien ene bœuf. Dans les deux cas, si li fine refaire tawaaf ziyaarah avec tahaarah, alors dam pas pou appliqué. Mais à condition ki li fine réussi refaire li avant ki soleil couché le 12eme de zulhijjah. Et si li fine remplace tawaaf ziyaarah ki li ti faire sans tahaarat apres le 12eme de zulhijjah, alors li bizin donne ene dam acoze ki li fine depasse so jour ki li ti bizin fini faire li là-dans.

DAM DANS QUITTE TAWAAF ZIYAARAH

Tanque ene dimoune pas faire tawaaf ziyaarah, li pas gagne droit alle dans ménage. Juska même si li fine retourne so la caze, là aussi li bizin retourné et faire li. Couma fine expliqué, quand li retourné, li bizin retourne avec Ihraam. D’abord li faire so 'Oumrah et ensuite li faire so tawaaf ziyaarah. Apart ça, li bizin donne ene dam pour le retard ki li fine faire dans accomplir tawaaf ziyaarah. Le même principe appliqué si li quitte 4 tours ou plus ki 4 tours dans tawaaf ziyaarah. Mais si li fine quitte 3 tours ou moins ki 3 tours, alors ça li capave réparé par sacrifié ene zanimau couma bouc ou ene mouton.

DAM DANS RETARDE TAWAAF ZIYAARAH

Tawaaf ziyaarah li faraz mais faire li juska avant soleil couché le 12eme zulhijjah li wajib. Alors si pas fine faire li avant ça sans ene excuse valable, li bizin paye dam.
La même chose appliqué si li fine retarde 4 tours ou plis ki 4 tours. Mais si li fine retarde 3 tours ou moins ki 3 tours alors li bizin donne ene sadaqah pou chaque tour ki li fine retardé.
Ene madame ki pas fine gagne le temps faire li avant ça acoze ki li ti dans période, perna narien comme dam ou sadaqah pou donné.

DAM ET TAWAAF 'OUMRAH

Tawaaf li faraz dans 'Oumrah. Si fine quitte ene ou plusieurs tours dans 'Oumrah, alors bizin donne dam. Coumsa même si fine arrivé faire li sans wazou ou bien sans roussal, alors bizin donne dam. Dans tous ça banne cas-là, si li fine refaire ene l'autre tawaaf pour 'Oumrah, alors li pou acquitté de l'obligation de Tawaaf et li pas bizin donne aukene dam.

REGLEMENTS CONCERNANT REMPLACE TAWAAF

Principe

N’importe ki tawaaf ki ene dimoune faire avec certaine manquements ki nécessite l’amane, alors ça l'amane-là li tombé si la personne fine refaire li dans façon et l’heure ki bizin faire li. Si ene personne fine faire tawaaf ziyaarah sans roussal et li fine faire tawaaf sadar (wada) avec tahaarat, alors si li fine faire tawaaf sadar pendant les jours de Qourbaani, ça tawaaf-là li pou remplace so tawaaf ziyaarah. Et dans place tawaaf sadar li bizin sacrifié ene bouc ou ene mouton. A moins si li fine faire ene l’autre tawaaf encore. Dans ce cas, ça tawaaf-là pou compté de la part de tawaaf sadar et li pas bizin donne dam.
Ene personne fine faire tawaaf ziyaarat sans roussal et li fine faire tawaaf sadar avec tahaarat mais li fine faire li après ki banne jours de Qourbaani fine fini traverse. Dans ce cas, le tawaaf sadar pou remplace le tawaaf ziyaarah et la personne ena pou donne deux dam. Ene acoze ki li fine remplace le tawaaf ziyaarah après so délai. Et deuxième dam dans le but pou remplace tawaaf sadar. A moins si li fine refaire ene l’autre tawaaf pour remplace tawaaf sadar. Dans ce cas li pou ena seulement ene seul Dam.
Ene personne fine faire tawaaf ziyaarah sans wazou et tawaaf sadar avec tahaarat. Dans ce cas si li fine faire tawaaf sadar dans banne jours de Qourbaani, alors ça tawaaf-là pou remplace tawaaf ziyaarat. Donc li bizin donne dam si li pas refaire ene l’autre tawaaf pour tawaaf sadar. Mais en cas si li fine faire tawaaf sadar après banne jours de Qourbaani, alors ça tawaaf-là pas pour remplace so tawaaf ziyaarah. Et dans ça cas-là, li bizin donne ene dam acoze ki li fine faire tawaaf ziyaarah sans wazou.
Ene personne ki fine faire tawaaf ziyaarah sans wazou et tawaaf sadar sans roussal bizin donne deux dam. Parceki ça deuxième tawaaf-là li pli pas bon ki le premier. Donc li perna capacité remplace le premier tawaaf. Alors li bizin donne ene dam acoze ki li fine faire tawaaf ziyaarah sans wazou et le deuxième acoze ki li fine faire tawaaf sadar sans roussal. A moins si li refaire ene l’autre tawaaf avec tahaarat avant le 12eme zulhijjah et ene deuxieme tawaaf plutard avant li quitte makkah. Dans ce cas li pas pou ena pou paye aukene dam.
Comme principe bizin remplace le tawaaf ziyaarah si fine accomplir li sans ki ena roussal. Ça li pou appliqué, surtout quand la personne li encore dans Makkah. Mais si la personne fine fini retourne chez li, alors li meilleur ki la personne concernée retourne Makkah avec Ihraam. Dans ce cas, d’abord li accomplir 'Oumrah et ensuite li remplace tawaaf ziyaarah. Apart ça li ena pou donne dam acoze ki li pas fine respecté le délai juska le couché du soleil du 12eme zulhijjah ki ti accordé pou faire ça tawaaf-là. Mais si li ti faire tawaaf ziyaarah sans wazou, alors li pli bon ki li envoye so dam.

Le premier tawaaf ki ti faire, li valable pou le besoin de sortir en dehors Ihraam complètement. Mais à coze pas ti ena roussal, le tawaaf fine ena ene manquement et ene défaut ki capave réparé soit par refaire li ou par sacrifié ene grand zanimau couma ene chameau ou ene bœuf. Etant donné ki le premier tawaaf-là ti valable dans certaine mesure, à coze ça, le Sa'ee ki li ti faire après ça-là aussi valable. Pas bizin refaire li.

DAM DANS PAS FAIRE SA'EE POU HAJJ

Sa'ee li waajib dans 'Oumrah et dans hajj, tous les deux. Si pas fine faire Sa'ee du tout ou bien pas fine faire 4 tours ou plis ki 4 tours sans aukene raison valable, alors bizin donne dam. Quitte 3 tours ou moins ki 3 tours dans Sa'ee nécessite ene sadaqah pou chaque tour ki li fine quitté. Si li faire Sa'ee après n’importe quand, li pas bizin donne dam ni kit sadaqah parceki li pena ene limite ki bizin fini faire li avant ça.

DAM DANS FAIRE SA'EE LORS MONTURE

Tanque capave bizin faire Sa'ee à pied. Pas gagne droit faire charrié lors monture ou chaise roulante ou par ene l’autre moyen. Si li fine faire charrié li dans Sa'ee sans aukene raison valable alors bizin donne dam. Quant à banne vieux dimounes et banne dimounes malades zotte gagne droit faire charrié zotte dans Sa'ee et ça pas pou nécessite aukene dam lors zotte.

DAM ET MOUZDALIFAH

Passe ene fraction le temps entre Soubh Swadiq et levé du soleil le 10eme zulhijjah dans Mouzdalifah li waajib. Si kikene fine manque ça sans ene raison valable alors li bizin donne dam.

Si ena même nécessité, alors capave sorti toute suite après Soubh Swadiq quand fini faire namaz fajar. Banne madames et banne vieux dimounes ou banne dimounes malades capave profite ça facilité-là. Dans ce cas perna dam lors zotte parceki zotte déjà fine passe dans Mouzdalifah la quantité le temps ki waajib lors zotte.

DAM ET RAMI

Si ene dimoune pas fine faire Rami le premier jour ou bien li fine quitte 4 ou plis ki 4 roche dans premier jour, alors li bizin paye dam. Coumsa meme si li fine néglige la majeur parti Rami de ene jour, alors li bizin paye ene dam. Si li pas fine faire Rami du tout, ici aussi li bizin donne ene seule dam.

DAM POU AVOIR RETARDE RAMI

Si ene personne pas fine batte shaitaan du tout, alors comme principe li bizin faire li en ordre avant soleil couché le 13eme zulhijjah mais li bizin donne dam pou le retard ki li fine faire. Après ça date-là et ça l’heure-là, li perna pou remplace Rami. Li ena necque pou donne dam. Coumsa même si ene dimoune fine retarde Rami ene jour juska l’autre jour, alors li bizin donne dam pou ça retard-là.

Par exemple Rami ki li ti bizin faire li zordi, li faire li le lendemain après Soubh Swadiq, alors li bizin faire li et après ça li bizin donne dam aussi pou ça retard ki li fine faire.

En cas si li fine quitte 3 roches ou moins ki 3 roches dans premier jour ou bien 10 roches ou moins ki 10 roches dans le zotte jours, alors li bizin donne ene sadaqah pou chaque roche ki li fine manqué. Ene sadaqah c’est la valeur ene fitra.

DAM DANS FAIRE HALQ EN DEHORS HARAM

Dans hajj ou bien dans 'Oumrah, bizin faire halq pou sorti en dehors Ihraam. Dans 'Oumrah, la personne li sorte toute suite en dehors Ihraam quand li faire halq. Et dans hajj, li sorte en dehors Ihraam par halq en ceki concerne tout kikchose apart alle dans ménage. Et ça pas vine halaal tanque ki li pas faire tawaaf ziyaarat.

Couma li important pou faire halq coumsa meme li important pou faire li dans le périmètre de haram. Faire halq en dehors les limites de haram li ene offense ki nécessite dam.

DAM DANS RETARDE HALQ DANS HAJJ

En ceki concerne hajj, le haji bizin fini faire halq avant soleil couché le 12eme zulhijjah. Si li faire halq aprés ça l’heure-là, li bizin donne dam. Quant à halq dans 'Oumrah, li capave faire li quand li oulé. Ça pas pou nécessite dam. Mais tanque li pas faire li, li pas pou sorti en dehors lhraam.

DAM DANS PAS RESPECTER L’ORDRE

Respecté l’ordre entre Rami, halq et Qourbaani li waajib. Excepté pou ene personne ki pé faire hajj lfraad, alors li ena pou respecté l’ordre entre Rami et halq seulement. Si ene personne ki pé faire hajj tamattou ou hajj Qiraan, faire Qourbaani avant faire Rami ou bien li faire halq avant faire Qourbaani, alors li bizin paye dam acoze ki li pas fine respecté l’ordre entre ça banne pratiques-là. Coumsa même si ene personne ki pé faire hajj Ifraad, li faire halq avant Rami, alors li bizin paye dam parceki li pas fine respecté l’ordre ki ti waajib.

DAM DANS TOUCHER, CARESSER ETC..

Toucher, caresser, mailler, serrer ou embrasser avec désir ou jouissance nécessite dam. Par tout ça-là, la personne fine décharger ou bien pas fine décharger, dans tous les deux cas, li bizin donne dam. Coumsa même, ça fine arrive li avant wouqouf Arafah ou après wouqouf Arafah, dans tous les deux cas li bizin donne dam quand ça fine arrive li avant li faire tawaaf ziyaarah. C’est ene manquement ki capave réparé par donne dam. Acoze ça, ça pas anule so hajj. Coumsa même, si li fine déchargé par jouer avec so le corps, alors li bizin donne dam. Par contre si li fine décharger dans sommeil ou par guetté sans touché ou bien par imagination, alors na pérna dam là-dans. Mais amene banne pensée erotique et malpropre dans l’esprit pou gagne plaisir, li ene kitchose ki defane dans l’etat normal couma li defane dans l’etat Ihraam.

Relation sexuelle dans l’état Ihraam : -

Relation sexuelle li ene offense ki annule lhraam. Les principes et règlements ki bizin suive en cas si fine ena relation sexuelle pendant Hajj ou ‘Oumrah, li varié selon contexte couma fine expliqué pli devant:

Ene personne ki annule so Hajj par alle dans ménage :-

Si ene personne alle dans ménage avant ki li alle donne so présence dans Arafah, alors so Hajj fine cassé et fine annulé. Mais li bizin continué pareil couma ene Haji normal. C’est à dire li faire tout ceki ene Haji faire. Li bizin remplace li l'année ensuite ou plutard après. Apart ça li ena pour donne ene dam pour offense ki li fine commette.

Alle dans ménage après Wouqouf Arafah avant faire Halq et Tawaaf :-

Par contre si li alle dans ménage après avoir donne so présence dans Arafah, alors dans ce cas li complète so Hajj pareil couma tous Hajis. Li perna pour remplace ça Hajj-là. Mais li bizin faire zabah ene chameau pour répare offense ki li fine commette.

Alle dans ménage après Halq avant Tawaaf : -

Si li fine alle dans ménage après ki li fine fini faire Halq mais avant ki li faire Tawaaf, alors dans ce cas li ena pour répare li par donne ene dam. C’est à dire ene mouton ou ene bouc.

Alle dans ménage dans ‘Oumrah avant faire Tawaaf: -

Ene personne ki pé accomplir ‘Oumrah, si arrivé li alle dans ménage avant ki li faire Tawaaf, alors so 'Oumrah fine cassé.

Aster ki bizin faire?

Aster li bizin continué. C’est à dire li faire so Tawaaf et Sa'ee. Après ça li tire so cheveux, li vine en dehors l'état Ihraam.

Quant à l'offense ki li fine commette, pour ça li bizin faire zabah ene bouc ou ene mouton. Et li ena pour remplace ça ‘Oumrah-là aussi.

Alle dans ménage dans ‘Oumrah après faire Tawaaf : -

En cas si li fine alle dans ménage dans ‘Oumrah après ki li fine fini faire Tawaaf, alors li continué so ‘Oumrah et li termine li. Pour offense ki li fine commette, li bizin donne ene dam. Mais ici li perna pour remplace ça ‘Oumrah-là.

FIDYA

Tout banne offense concernant taille cheveux, servi parfum ou bien mette linge coude à cote bizin donne dam pour réparé, si fine faire ene de ça banne kikchose-là par ene excuse valable, alors au lieu dam, ena fidya là-dans.

Fidya veut dire soit sacrifié ene bouc ou ene mouton dans haram ou bien donne 6 pauvres, à chacun, la valeur ene fitra ou bien garde trois roza consécutivement ou bien saute-sauté. La personne ena droit choisir entre ça trois-là. Ça droit pour choisir-là, li ene privilège et ene faveur accordé à seulement ene personne ki fine bizin commette ene de ça banne kikchoses-là par obligation et par ene excuse valable.

PREND COMPTE !

Li wajib pour passe ene fraction le temps entre l’heure namaz Fajar et levé du soleil dans Mouzdalifah. Nous ena banne savants ki fine déclare li juska même faraz aussi acoze ki ena ene hadice à cote Rasouloullah ‎(Sallallaahou A'laihi Wasallam)‎‎‎‎ fine dire:

“ Celui ki pas fine gagne Mouzdalifah, alors perna hajj pour li.” (Abou Ya’la)

Mais Rasouloullah ‎(Sallallaahou A'laihi Wasallam)‎‎‎‎ ti autorise ene certaine catégorie de personnes pour quitte Mouzdalifah le soir même afin pour capave évite la foule au moment de Rami. Ça fine empêche banne les autres Ulama déclare li faraz parceki pas capave ena concession dans ene pratique ki faraz. Acoze ça la majorité fine déclare li wajib.

Ena boucou banne hajis ki quitte Mouzdalifah le soir même avant l’heure namaz fajar rentré. C’est ene erreur ki nécessite dam. Faudré pas faire li sans aukene raison valable.

Pour le besoin de wajib li sufi passe ene fraction le temps entre après l’heure namaz fajar et avant soleil levé. Li pas nécessaire prolonge li juska soleil levé. Mais li sounnat ki tanque capave faudré pas négligé.

Bizin respecté l’ordre entre Rami, Qourbani et rase la tête. Très souvent nou banne hajis pas prend compte. Zotte rase zotte la tête avant même ki zotte conné si qourbani fine fini faire ou bien non. Si jamais zotte fine arrivé rase la tête avant faire Qourbani ou bien faire Qourbani avant faire Rami, alors zotte bizin donne dam. Ena banne responsable ki pas prend ça compte pour zotte propre facilité. Banne hajis bizin prend zotte précaution. Faudré pas zotte laisse banne responsables mette zotte dans l’erreur.

N.B:

A cet stade kikene capave dire ki dans hadice fine autorise rase la tête avant faire qourbani couma fine autorise faire qourbaani avant faire Rami. Mais bizin conné ki d’après ene l’autre hadice ki pli détaillé, ça ti appliqué pour ene personne ki ti faire li sans rende li compte. Li pas appliqué pour ene personne ki faire li avec connaissance. Zordi jour nou banne haji ki pé faire li, zotte pé faire li avec propre connaissance. Perna aukene hadice ki dire ki perna dam même si faire li avec connaissance.

3. Dans deuxième jour et troisième jour, l’heure Rami commence apartir l’heure zohar. Faudré pas faire Rami avant l’heure zohar. Bizin refaire li si fine faire li avant l’heure zohar parceki Rami ki fine faire avant l’heure zohar, li pas valable. Si pas fine faire li après l’heure zohar, alors bizin donne dam. Banne responsable ena l’habitude faire banne haji faire Rami le troisième jour avant ki l’heure zohar rentré. C’est ene erreur ki zotte pé commette pendant des années pour zotte propre facilité. Si acoze la foule zotte alle faire li bonheur avant Zohr, alors pas necessaire faire li coumsa avant l’heure. Capave faire li apres Assar ou bien apres Maghrib. Ou soit apres Esha juska soubh sadiq aussi. Banne hajis bizin prend ça banne kitchose-là compte !

Hajj