LE MARRIAGE - النّكاح

Ki veut dire nikah?

Nikah d'après so sens littéral li signifié relation sexuelle. Et dans langage commun li signifié ene contrat entre deux personnes par lequel zotte vine missié-madame. Ça deux personnes-là, ene bizin de sexe masculin et l'autre de sexe féminin.

Couma ene contrat nikah conclure?

Ça contrat-là li conclure par l`offre d'une part et l`acceptation d`une autre part. Nou appelle ça l`offre-là ايجاب ('ijaab) et ça l`acceptation-là nou appelle liقبول (qouboul). Par exemple madame-là déclaré "Mo fine donne moi dans to nikah". Ça déclaration ou proposition-là appelle ('ijaab). Au lieu madame-là faire ça déclaration-là, ene l'autre aussi capave faire ça de la part ça madame-là couma madame-là so papa, so dada, so frère, so chacha ou bien ene l'autre dimoune ki ça madame-là fine délègue li comme so représentant. A son tour missié-là dire "Mo fine accepté toi dans mo nikah". Ça déclaration-là appelle qouboul.

Nécessité témoins

ايجاب et قبول bizin faire li divant minimum deux témoins. Ça deux témoins-là bizin deux personnes majeur de sexe masculin ki musulman et ki sain d`esprit. Pou le besoin de témoignage, ene zomme et deux madames aussi li sufi. Donc l'offre et acceptation bizin conclure divant deux hommes musulmans majeur ou bien ene zomme et deux madames en sorte ki banne témoins zotte tendé et conné qui sanla pé marié avec ki sanla.

Attention!

Influencé par ceki passé dans banne films indien, ena boucou parmi nou ki capave ena tendance faire nikah par faire seulement Allah Ta'ala temoin. Nou bizin conné ki nikah pas compté sans témoignage dimoune. Coumsa même si ene dimoune faire nikah par faire Allah Ta'ala et so Rassool ‎(Sallallaahou A'laihi Wasallam)‎‎‎‎ témoin, alors ça nikah-là pas compté. Au contraire banne 'Oulama fine considère ça façon faire nikah-là comme ene façon bien grave. Ena fine considère ça ziska même comme kufr aussi.

Mahar

Missié ki pé marié-là, li bizin donne so madame ene kitchose ki ena ene valeur commercial. Ça appelle mahar ou bien swadaaq. Ça kikchose-là li capave être en forme la monnaie liquide couma capave donne li en forme kit z'effet ou objet aussi. Bijou ki normalement la famille garçon faire pou ti fille, ça aussi capave donne li comme mahar.

Taux maximum de Mahar

Le taux maximum de Mahar perna aukene limite. Mais li déconseillé pou exige ene Mahar exorbitant. Ene Nikah ki ena pli tigite dépense et pli tigite Mahar, ena pli boucou barakat. Mahar li suggéré par garçon couma li capave proposé par la fille aussi. Mais de toute façon ça bizin finalisé par ene accord mutuel entre les deux parties.

Taux minimum de Mahar

Le taux minimum de mahar li de 10 dirhams ki équivaut à peu près 31.5 grammes d`argent (chandi). Selon ene hadice, Hazrat Ali ‎(Radiyallahou anhou‎)‎ dire ki perna aukene Mahar moins ki 10 dirhams. Li bon conné ki c'est ene hadice ki fine être qualifié de ene hadith faible. Ça li capave vrai par rapport à ene certaine sanad (source). Mais ceki Ibn Abu Hatim fine rapporté, li ene hadith correcte.

Mahar de Rs 27.50

Mahar de Rs 27.50 ki en vigueur à Maurice cote li sorti ça? Bizin guetté eski nou bizin continué avec ça. Si li ene kitchose de shariat, pena doute nou bizin pas abandonne li. Mais si li pas ene kitchose ki prouvé dans shariat, alors li pas bon aussi ki nou continué avec ça.

Longtemps Rs 27.50 ti ene grand la monnaie. Banne grand dimoune dire ki ti ena ene l'époque quand ene souverain l'or ti pé vende Rs 5.00. Pou ça l'époque-là, Rs 27.50 ti équivaut 5 1/2 souverain l'or. Li paraître ki dimoune de certaine l'endroit ti fixé ça comme ene facilité ou bien ça li ti la valeur de Mahar Fatimi. Donc de toute façon, nou pas trouve aukene raison ki nou bizin continué avec ene mahar Rs 27.50 ou Rs xx 27.50.

Position de nikah

Hadice Hazrat Sa'd Bin Abou Waqqaas ‎(Radiyallahou anhou‎)‎

"عن سعد بن ابى وقاص يقول رد رسول الله صلى الله عليه وسلم على عثمان بن مظعون التبتل ولو اذن له لاختصينا" (البخارى)

Traduction:

"Hazrat Sa'd Bin Abou Waqqaas ‎(Radiyallahou anhou‎)‎ rapporté ki Rassouloullah ‎(Sallallaahou A'laihi Wasallam)‎‎‎‎ ti rejette la requête de Hazrat Usmaan Bin Maz'oune ‎(Radiyallahou anhou‎)‎ concernant tabattul. Si li ti autorise li, nou ti pou faire castré nou". (Sahih Boukhari)

Explication:

Tabattul signifié reste célibataire. Hazrat Usmaan Bin Maz'oune ‎(Radiyallahou anhou‎)‎ ti dimane permission avec Rassouloullah ‎(Sallallaahou A'laihi Wasallam)‎‎‎‎ pou reste célibataire. Nabi ‎(Sallallaahou A'laihi Wasallam)‎‎‎‎ pas fine accepté ça. Ti ena encore lezot Sahaba-e-Kiraam ki ti ena le même désir reste célibataire. Zotte ti pé attane gagne permission. Si Hazrat Usmaan Bin Maz'oune ‎(Radiyallahou anhou‎)‎ ti gagne l'autorisation, zotte ti pou faire castré zotte pou pena le désir marié.

D'après banne Sahaba-e-Kiraam, peut être le but principal de l'organe sexuel c'était marié pou augmente la population. Si Nabi ‎(Sallallaahou A'laihi Wasallam)‎‎‎‎ ti approuve zotte requête reste célibataire, à ce moment-là pas ti pou ena aukene nécessité pou ça l'organe-là. Donc zotte ti pou faire castré zotte. C'est dans ça sens-là ki zotte ti pou permette zotte en même temps concentré pli facilement dans ibaadat.

D'après ene hadice ki trouve dans Tabraani, la requête de Hazrat Usmaan Bin Maz'oune ‎(Radiyallahou anhou‎)‎ en réalité ti ene requête pou faire castration. D'après le hadice de Sahih Boukhari, la requête li concerne tabattul (reste célibataire). Li possible ki le rawi fine exprime castration par tabattul puisque tabattul li réalisé pli facilement par moyen de castration. L'essential c'était pou gagne la permission reste célibataire soit par moyen castration ou bien sans faire castré. Banne Sahaba-e-Kiraam ti pé attane permission et zotte ti tellement intéressé pou amène la vie célibataire ki zotte ti pou même disposé faire castré zotte si ça ti indispensable.

Ça hadice-là montré ki shariat désapprouve amène la vie célibataire. Si ene personne pena facilité marié, li recommandé pou garde roza continuellement. Quant à castration, ça li pas permette parceki li représente ene modification et changement dans la forme ki Allah Ta'ala fine accorde insaan et ça li ene inspiration satanique d'après Qour'aan-e-Kareem. A la lumière de ça, tous changement ou modification dans la forme ki Allah Ta'ala fine accorde insaan, li interdit. Et li pou reste interdit ziska nou gagne ene l'autorisation spécifique ou ene l'autre preuve ki dire le contraire et légalise ça.

Hadice Hazrat Abdullah Bin Mas'oud ‎(Radiyallahou anhou‎)‎

"قال عبد الله بن مسعود : كنا مع النبى صلى الله عليه وسلم شبابا لا نجد شيئا فقال لنا رسول الله صلى الله عليه وسلم يا معشر الشباب من استطاع منكم الباءة فليتزوج فانه اغض للبصر واحصن للفرج ومن لم يستطع فعليه بالصوم فانه له وجاء" (البخارى)

Traduction:

"Hazrat Abdullah Bin Mas'oud ‎(Radiyallahou anhou‎)‎ fine dire: Nou ti ensemble avec Nabi ‎(Sallallaahou A'laihi Wasallam)‎‎‎‎ quand nou ti jeune. Nou pas ti possède narien. Alors Rassouloullah ‎(Sallallaahou A'laihi Wasallam)‎‎‎‎ fine dire nou: O banne jeunes! Celui ki ena le moyen pou marié parmi zotte, li bizin marié parceki ça li ene moyen pli efficace pou baisse regard et ene pli bon moyen pou préserve parti privé. Et celui ki pena le moyen, li bizin applique le principe garde roza parceki ça li couma dire ene genre de castration pou li." (Sahih Boukhari)

Explication:

Rassouloullah ‎(Sallallaahou A'laihi Wasallam)‎‎‎‎ fine donne l'ordre pou faire nikah à banne ki ena le moyen. Ziska preuve du contraire, li obligatoire exécute l'ordre Nabi ‎(Sallallaahou A'laihi Wasallam)‎‎‎‎. Donc nikah li obligatoire lors ene dimoune ki ena le moyen. Mais ça "obligatoire-là" li appliqué pou ene dimoune ki so désir sexuel li ene ti pé pli fort ki normal. Parceki Rassouloullah ‎(Sallallaahou A'laihi Wasallam)‎‎‎‎ fine ordonne pou garde roza continuellement en cas si ene dimoune pena le moyen pou marié. Ene dimoune ki so constitution li normal, li pena aukene nécessité garde roza dans le but pou garde so désir sexuel sous contrôle. C'est necque ene ki so désir li assez fort ki bizin ça. Donc ça montré ki ça hadice-là li adressé à banne ki zotte désir sexuel li pli fort ki normal. C'est pou ça catégorie dimoune-là ki Nabi ‎(Sallallaahou A'laihi Wasallam)‎‎‎‎ fine oblige zotte faire nikah si zotte ena le moyen. Le moyen veut dire la capacité financière ki permette ene dimoune prend responsabilité ene madame. Et banne ki pena ça moyen-là, Nabi ‎(Sallallaahou A'laihi Wasallam)‎‎‎‎ fine ordonne zotte pou garde roza continuellement afin ki ça capave garde zotte désir sous contrôle.

Dans ça hadice-là Rassouloullah ‎(Sallallaahou A'laihi Wasallam)‎‎‎‎ fine adresse la parole à banne jeunes. Ça capave donne l'impression ki ça l'ordre-là li concerne banne jeunes seulement mais pourtant ça li applique en général pou tout banne ki ena le désir sexuel impé plis ki normal, ki ce soit jeune ou vieux. Malgré ça si Nabi ‎(Sallallaahou A'laihi Wasallam)‎‎‎‎ fine adresse banne jeunes en particulier, c'est àcoze ki dans la pratique, c'est zotte même ki ena ça désir-là pli fort. D'après ça hadice-là, ça désir fort-là capave être contrôlé par faire nikah ou bien garde roza continuellement.

Nabi ‎(Sallallaahou A'laihi Wasallam)‎‎‎‎ fine qualifié garde roza continuellement de وجاء (Wijaa) ki signifié castration parceki couma la castration li enlève désir sexuel totalement, coumsa même garde roza continuellement li diminué ça désir-là à ene degré contrôlable. De par so l'effet ça fine être qualifié de ene genre de castration par Rassouloullah ‎(Sallallaahou A'laihi Wasallam)‎‎‎‎.

La position de nikah li varié selon constitution et l'état ene dimoune. C'est-à-dire pou certaine dimoune li capave seulement recommandé couma li capave obligatoire pou ene l'autre catégorie. Ça li dépanne lors l'état ene dimoune et le contexte dans lequel li pé vive. Donc par ça rapport-là ena cinq degré de nikah.

Les cinq degré de nikah:

Quand le désir li fort à ene degré ki tombe dans haraam vine inévitable, à ce moment-là nikah vine FARAZ.
Si li fort à ene degré ki ena fort possibilité tombe dans haraam, li vine WAAJIB.
Si ene dimoune sure ki li pou néglige so madame et li pou faire li misere, vaut mieux li pas marié parceki dans ene cas pareille nikah li HARAAM.
Si ena fort possibilité ki li pas pou capave occupe so madame couma bizin et li pou faire li misère, alors dans ene situation pareil nikah li MAKROUH.
Quand ene dimoune so constitution li normal et li ena de quoi ki permette li guette so madame bien, alors nikah li SOUNNAT MOU'AKKADAH.

Hadice Hazrat Anas ‎(Radiyallahou anhou‎)‎

عن انس بن مالك يقول جاء ثلاثة رهط الى بيوت ازواج النبى صلى الله عليه وسلم يسألون عن عبادة النبى صلى الله عليه وسلم فلما اخبروا كانهم تقالوها فقالوا واين نحن من النبى صلى الله عليه وسلم قد غفر له ما تقدم من ذنبه وما تاخر قال احدهم اما انا فانى اصلى الليل ابدا وقال آخر انا اصوم الدهر ولا افطر وقال آخر وانا اعتزل النساء فلا اتزوج ابدا فجاء رسول الله صلى الله عليه وسلم اليهم فقال انتم الذين قلتم كذا وكذا اما والله انى لاخشاكم لله واتقاكم له لكنى اصوم وافطر واصلى وارقد واتزوج النساء فمن رغب عن سنتى فليس منى" (البخارى)

Traduction:

Hazrat Anas Bin Malik ‎(Radiyallahou anhou‎)‎ rapporté ki trois personnes fine vine la caze banne madames de Nabi ‎(Sallallaahou A'laihi Wasallam)‎‎‎‎ pou dimane zotte concernant ibaadat Nabi ‎(Sallallaahou A'laihi Wasallam)‎‎‎‎. Quand zotte fine gagne l'information, couma dire zotte fine trouve ça bien tigite. Mais après ça zotte fine dire: cote nou! Et cote Nabi ‎(Sallallaahou A'laihi Wasallam)‎‎‎‎! (C'est-à-dire nou pas représente narien divant position très élevée de Nabi ‎(Sallallaahou A'laihi Wasallam)‎‎‎‎). Quand tandis ki li fine être gracié pou ceki avant et pou ceki après! Alors ene parmi zotte fine dire: Quant à moi mo pou faire namaz pendant la nuit tout le temps. L'autre fine dire: moi mo pou garde roza tout le temps et mo pas discontinué roza. Et ene l'autre fine dire: moi mo pou reste loin avec banne madames et mo pas pou marié jamais.

Alors Nabi ‎(Sallallaahou A'laihi Wasallam)‎‎‎‎ fine alle guette zotte et fine dire: "Eski c'est zotte même ki fine faire telle ou telle déclaration? Laisse mo dire zotte ki par Allah mo pli ena la frayeur pou Allah ki zotte et mo pli ena l'obéissance pou li ki zotte. Malgré ça (parfois) mo garde roza et (parfois) mo pas gardé. Mo faire namaz (dans ene parti la nuit) couma mo dormi (dans ene parti) et mo marié avec banne madames. Donc celui ki tourne le dos avec mo sounnat, li pas avec moi." (Sahih Boukhari)

Explication:

Le désir pou reste engagé et reste absorbé complément dans ibadaat fine faire ene groupe de Sahaba-e-Kiraam prend décision ferme pou passe entier la nuit dans ibaadat et garde roza dans la journée lors ene base permanent. Zotte fine même prend décision reste célibataire afin ki zotte capave consacré zotte totalement dans ibaadat. Mais Rassouloullah ‎(Sallallaahou A'laihi Wasallam)‎‎‎‎ pas fine approuve zotte décision et fine faire ressortir ki mangé boire et la vie mariage li pas en conflit avec taqwa. Au contraire c'est la meilleur façon pou vive dans l'obéissance Allah Ta'ala parceki ça façon vive-là c'est la façon de Nabi ‎(Sallallaahou A'laihi Wasallam)‎‎‎‎ ki ena pli boucou taqwa et ki ena pli boucou la frayeur pou Allah Ta'ala. Ça hadice-là montré ki mariage c'est le principe et sounnat de Nabi ‎(Sallallaahou A'laihi Wasallam)‎‎‎‎. La vie mariage c'est la vie ki ressemblé avec la vie Nabi ‎(Sallallaahou A'laihi Wasallam)‎‎‎‎. Donc li pli bon ki reste célibataire. Et considère la vie mariage en conflit de taqwa et de l'obéissance à Allah Ta'ala li représente tourne le dos avec le noble principe et le moubaarak tareeqah de Nabi ‎(Sallallaahou A'laihi Wasallam)‎‎‎‎.

Pli bon partenaire dans la vie

عن ابى هريرة عن النبى صلى الله عليه وسلم قال: تنكح المرأة لاربع لمالها ولحسبها وجمالها ولدينها فاظفر بذات الدين تربت يداك (البخارى/مسلم)

Traduction:

Hazrat Abou Hourairah ‎(Radiyallahou anhou‎)‎ rapporté ki Nabi ‎(Sallallaahou A'laihi Wasallam)‎‎‎‎ fine dire: "Ene madame li gagne demande en mariage acoze 4 kitchose: acoze so du bien, acoze so noblesse familiale, acoze so beauté, et acoze so Deen. (Quant à toi) considère toi gagnant avec ene ki ena Deen. (Sans quoi) to pou faire défaite." (Sahih Boukhari/ Mouslim)

Explication:

Le hadice pé faire mention de banne facteurs ki en principe banne dimoune prend en considération avant zotte marié avec kikene. C'est à dire ene dimoune li capave intéresse marié avec ene madame acoze ki madame-là li bien possédé couma li intéressé avec li acoze ki li sorti dans ene grand famille. Mais très souvent dimoune attiré par ene madame so beauté. Et bien rare li intéressé avec ene madame acoze so Deen. Sans doute li ene grand cadeau si kikene fine gagne ene madame ki ena tous les 4 critères dans li. Mais si li ena 4 madames divant li ki personne parmi zotte pas possède tous les 4 qualités, alors d'après hadice li bizin choisir et donne préférence ça madame ki ena Deen dans li.

Beauté, richesse et noblesse familiale, c'est banne kitchose ki capave être considéré. Mais eski capave considère ça banne critères-là quand li trouve dans ene partenaire ki pena Deen? D'après hadice de Nabi ‎(Sallallaahou A'laihi Wasallam)‎‎‎‎, faudré ena Deen pou capave considère ça banne critères-là. Li bien pas bon guette beauté, richesse ou noblesse familiale au détriment de Deen.

D'après ene l'autre hadice ki trouve dans Ibn Majah, Rassouloullah ‎(Sallallaahou A'laihi Wasallam)‎‎‎‎ fine dire:

لا تزوجوا النساء لحسنهن فعسى حسنهن ان يرديهن ولا تزوجوهن لاموالهن فعسى اموالهن ان تطغيهن ولكن تزوجوهن على الدين ولامة خرماء سوداء ذات دين افضل (ابن ماجه)

Traduction:

"Pas marié avec banne madame acoze zotte beauté parceki zotte beauté capave détruire zotte. Ni marié avec zotte acoze zotte du bien parceki ena toute possibilité ki zotte du bien faire zotte révolté. Mais plutôt marié avec zotte acoze Deen. Sans doute ene madame esclave noir avec zoreille et néné coupé mais ki ena Deen, li pli bon” (Ibn Majah)

C'est-à-dire ene madame ki Deendaar ki pena lezot critères, li pli bon ki ene madame ki ena tout mais ki pena Deen dans li.

Hadice Hazrat Abdullah Bin Amr ‎(Radiyallahou anhou‎)‎

"الدنيا كلها متاع وخير متاع الدنيا المرأة الصالحة" (مسلم)

Traduction:

"Dounia dans so l'ensemble, c'est ene kitchose de jouissance (temporaire). Et meilleur kitchose pou bénéficié dans dounia c'est ene bon madame." (Mouslim)

Explication:

Ena boucou kitchose dans ça le monde-là ki Allah Ta'ala fine mette à nou disposition. Mais dans tous ça-là pli bon kitchose et kitchose ki pli profitable, c'est ene bon madame. D'après ene hadice ki trouve dans Ibn Majah, après l'obéissance Allah Ta'ala pena aukene kitchose ki ene mou'mine (croyant) bénéficié ki capave pli bon ki ene bon madame. Dans ça même hadice, Rassouloullah ‎(Sallallaahou A'laihi Wasallam)‎‎‎‎ fine définir ene bon madame dans ça terme-là:

C'est ene madame ki obéir so missié,
C'est ene madame ki comporte li en sorte ki faire so missié content quand li vine divant li,
C'est ene madame ki garde parole et serment ki so missié faire,
C'est ene madame ki préserve so la chasteté et dibien so missié dans l'absence so missié.

Ça veut dire ene madame ki pas écoute so missié pas capave vine ene bon madame. Tanque possible li bizin obéir so missié. Tanque possible veut dire tanque ki li ene kitchose ki permette dans Shariah. Parceki Nabi ‎(Sallallaahou A'laihi Wasallam)‎‎‎‎ fine dire:

"لا طاعة لمخلوق فى معصية الخالق"

Traduction:

"Pena l'obéissance créature dans désobéissance Créateur"

Donc ene madame li obligé obéir so missié aussi longtemps ki ça l'obéissance-là pas amène li dans désobéissance Allah Ta'ala. Li très important ki li conne garde so le corps et linge lors so le corps propre. Li bizin conne cause bien et agir bien dans ene façon convenable avec so missié. C'est dans ça façon-là ki li pou capave ranne so missié heureux. Et après ça li pli important ki li garde so l'honneur et préserve li même et dibien so missié. Faudré pas li ena contact avec banne zomme étranger parceki ene madame so dignité li trouve dans so la chasteté. Et ça li préservé quand li réserve li zisse pou so missié. Et faudré pas li faire gaspillage. Pas faire gaspillage veut dire ki li pas amène la vie dans l'étalage. Li contente li avec ene ti peu ki so missié donne li. Dans l'absence so missié, li pas lève narien li donne kikene sans l'autorisation so missié. Par cela li gagne confiance so missié. Si la méfiance entre missié-madame ranne la vie difficile, la confiance li amène la paix, l'harmonie conjugale et tranquillité morale.

Hadice Hazrat Abou Hourairah ‎(Radiyallahou anhou‎)‎

"اذا خطب اليكم من ترضون دينه وخلقه فزوجوه ان لا تفعلوه تكن فتنة فى الارض وفساد عريض" (الترمذى)

Traduction:

Rassouloullah ‎(Sallallaahou A'laihi Wasallam)‎‎‎‎ fine dire: "Quand ene, ki ou satisfait avec so (comportement dans) Deen et avec so caractère, avoye ou ene demande, alors marié li (avec ou zenfant). Si ou pas faire ça, pou ena ene grand fitna lors la terre et ene désordre à grand échelle." (Tirmizi)

Explication:

D'après ça hadice-là ene dimoune bizin choisir ene ki ena Deen et ki ena bon caractère pou marié so zenfant avec li parceki c'est ça même critère ki pli essentiel. Si ene dimoune fine gagne demande de la part ene personne pareille, alors li bizin accepté li. Faudré pas li rejette li acoze manque de richesse etc.

Très souvent dimoune rode ene la caze riche pou marié so ti fille avec ene l'espoir ki so zenfant pou dans bien. Nou ena droit et nou bizin toujours cherche le bien être de nou zenfant mais très souvent nous faire erreur dans cherche li parceki nou cherche li cote pena Deen et bon caractère. Nou pensé c'est richesse ki faire bonheur ene dimoune. Mais en réalité c'est ene dimoune ki ena Deen et ki ena bon caractère ki apporte li le bonheur.

Donc le bien-être et le bonheur li trouve avec ene partenaire ki ena Deen et ki ena bon caractère. Li pas trouve avec ene ki riche mais ki pauvre de par so Deen et so caractère. Dans considère lezot critères au lieu considère le critère de Deen, ena forte possibilité ki li pas gagne ene bon traitement. Et ça li capave développe l'ennemité entre les deux familles. C'est dans ça façon-là ki ça choix-là li ene choix ki désapprouvé par Shariah. Et c'est ene choix ki pena narien de bon apart ki li créé hostilité entre famille et bouleverse la société. Donc bizin choisir ene ki ena Deen et ki ena ene bon caractère.

Li pas ene façon pou dire ki la richesse li pas ene critère ki capave être considéré mais l'essentiel pou montré ki sans Deen et sans bon manière, la richesse pena aukene considération. En fin de compte, li vine ene fardeau. Donc la richesse c'est ene plus quand li accompagné de Deen et de bon caractère.

Ene personne fine dimane conseille avec Hazrat Hassan Al-Basri (R) concernant so tifille ki ti pé gagne demande de tout coté. En réponse Hazrat Hassan Al-Basri (R) fine dire:

"Marié li avec ene dimoune ki peur Allah. (Parceki) Si arrivé li fine content li, li pou garde li bien et si li pas content li aussi, li pas pou faire dominere avec li."

Pli bon missié

Hadice Hazrat Aisha ‎(Radiyallahou anhou‎)‎

ان من اكمل المؤمنين ايمانا احسنهم خلقا والطفهم باهله (الترمذى)

Traduction:

"Ene pli bon croyant de par so imaan c'est ene ki pli bon de par so caractère et ki pli gentil envers so madame." (Tirmizi)

Explication:

Ene dimoune so imaan li déterminé par so bon caractère et so façon d'agir avec so madame. Ene dimoune ki so caractère pas bon ou bien ki pas agir bien avec so madame pas capave être ene bon croyant.

Ene dimoune de bon caractère c'est ene dimoune sincère ki fine débarrasse li de banne manière couma la jalousie, l'orgueil, colère etc. Et ene bon façon d'agir avec ene madame signifié donne li so droit avec dignité et l'amitié dans ene façon convenable. Pli ene dimoune ena ça dans li, pli li pou ene bon croyant. Ça montré ki ene dimoune ki faire dominere avec so madame, pas capave être qualifié de ene bon musulman quand même li faire boucou ibaadat. Ene dimoune ki so imaan li ene imaan parfait, li pou toujours respecté droit so prochain et surtout droit de la personne ki pli proche avec li.

Droit ene missié lors so madame

Hadice Hazrat Abou Hourairah ‎(Radiyallahou anhou‎)‎

لو كنت آمر احدا ان يسجد لاحد لامرت المرأة ان تسجد لزوجها (الترمذى)

Traduction:

Rassouloullah ‎(Sallallaahou A'laihi Wasallam)‎‎‎‎ fine dire: "Si mo ti ena pou ordonne kikene faire sajdah divant kikene, mo ti pou ordonne ene madame faire sajdah divant so missié." (Tirmizi)

Explication:

Pas gagne droit faire sajdah pou personne apart Allah Ta'ala. Faire sajdah pou kikene apart Allah Ta'ala li haraam. C'est ene action de kufr ki faire ene dimoune vine kaafir. Si ene kitchose aussi grave ti pou permette, li ti pou permette pou ene madame faire li pou so missié tellement so missié ena droit lors li. Ça montré ki ene madame bizin toujours obéir et écoute so missié. Amoins si li ene kitchose ki pas d'après l'Islam, à ce moment-là li bizin pas faire li parceki Rassouloullah fine dire:

"لاطاعة لمخلوق فى معصية الخالق"

"Pena aukene l'obéissance pou kit créature dans désobéissance Créateur."

Hadice Hazrat Abou Hourairah ‎(Radiyallahou anhou‎)‎

"اذا دعا الرجل امرأته الى فراشه فابت فبات غضبان لعنتها الملئكة حتى تصبح" (البخارى/ مسلم)

Traduction:

Rassouloullah ‎(Sallallaahou A'laihi Wasallam)‎‎‎‎ fine dire: "Quand ene personne appelle so madame lors so lili et madame-là refuse vini et (acoze ça) so missié passe la nuit dans colère, alors banne anges zotte avoye malédiction lors ça madame-là ziska li joine gramatin." (Sahih Boukhari)

Explication:

Quand ene mari bizin so madame, li bizin pas refusé. Si so refus faire so missié en colère, li passe toute la nuit dans gagne malédiction. Li bizin ene kitchose bien grave même pou ene dimoune gagne malédiction. Ça montré ki refuse ene mari dans ene moment pareille, li ene péché tres grave. Ça hadice-là li applique lors ene madame ki malgré li en bonne santé, li refuse so missié sans ki li ena kit raison valable. Si jamais madame-là li malade ou bien li ena kit l'empêchement, à ce moment-là li pas pou coupable si li pas repone l'appel so missié. Au contraire missié-là bizin agir avec la sagesse et li bizin pas montré li égoïste par force so madame conte so gré. Banne mari pareille zotte dénigré zotte même par zotte façon d'agir dans lizié zotte madame. D'après shariat ene missié bizin pas gagne relation avec so madame ene quantité ki plis ki madame-là so capacité et ene quantité ki fatigue li. De l'autre coté ene madame aussi bizin pas refuse so missié zisse par la paresse avec banne fausse prétextes. Tous les deux bizin coopéré pou capave vive en paix.

Necessité témoins dans nikah

Hadice Hazrat Abdullah Bin Abbaas ‎(Radiyallahou anhou‎)‎

البغايا اللاتى ينكحن انفسهن بغير بينة (الترمذى)

Traduction:

"C'est banne adultèresse ki donne zotte en mariage sans (présence) témoin." (Tirmizi)

Position hadice:

D'après Imam Tirmizi ça hadice-là fine rapporté comme la parole de Nabi ‎(Sallallaahou A'laihi Wasallam)‎‎‎‎ zisse par le rawi nommé عبد الاعلى (Abdul-A'la). Tous lezot ki fine rapporte ça, zotte fine rapporte li comme ene déclaration de Hazrat Abdullah Bin Abbaas ‎(Radiyallahou anhou‎)‎. Mais le rawi عبد الاعلى li ene rawi authentique ki parfois fine rapporte ça hadice-là comme la parole de Nabi ‎(Sallallaahou A'laihi Wasallam)‎‎‎‎ et parfois comme la déclaration de Hazrat Abdullah Bin Abbaas ‎(Radiyallahou anhou‎)‎. D'après principe quand ene rawi authentique rapporte ene hadice comme la parole de Nabi ‎(Sallallaahou A'laihi Wasallam)‎‎‎‎ ki lezot fine rapporté comme déclaration ene sahabi, alors ceki li fine rapporté li acceptable parceki li implique ene l'information en plis. Ene l'information en plis de la part ene ki authentique li acceptable d'après le principe établi chez banne savants de hadice. Donc d'après principe, ça hadice ki fine rapporté comme la parole de Nabi ‎(Sallallaahou A'laihi Wasallam)‎‎‎‎ li valable et authentique.

Explication:

D'après ça hadice-là pena nikah sans témoin. C'est-à-dire ene nikah ki faire sans ki banne témoin présent, li ene nikah ki pas compté. Après avoir rapporte ça hadice-là, Imam Tirmizi dire:

"والعمل على هذا عند اهل العلم من اصحاب النبى صلى الله عليه وسلم ومن بعدهم من التابعين وغيرهم قالوا لا نكاح الا بشهود"

"Ça hadice-là fine reste en application chez banne Sahaba-e-Kiraam, banne Tabeines et lezot. Zotte tous dire ki pena aukene nikah sans (présence) banne témoins."

La déclaration de Imam Tirmizi li ene preuve et ene indication ki l'Oummah fine toujours considère témoin comme ene élément indispensable pou la validité de ene nikah. Parceki d'après shariah, nikah c'est ene contrat ki bizin faire en public. Li pas capave reste secret entre les deux parties concernées seulement. Mais ça aussi li vrai ki personne pas dire ki bizin faire li en présence tous dimoune ki trouve dans ene l'endroit. C'est necque ene certaine quantité dimoune ki bizin témoigne ça. Donc ki ça certaine quantité dimoune-là été ou bien ki quantité dimoune au minimum bizin témoigne ça pou ça nikah-là li valable?

Si échange de propos ou bien ايجاب et قبول fine déroulé divant ene seul témoin, alors ça définitivement pas sufi parceki d'après ene anecdote ki trouve dans Mou'atta Imam Malik, Hazrat 'Oumar ‎(Radiyallahou anhou‎)‎ ti rejette ene nikah ki ti témoigné par seulement ene zomme et ene madame. Si ene zomme et ene madame pas suffit, ça veut dire définitivement ene zomme seulement ou bien ene madame seulement aussi pas pou suffit.

D'après plusieurs hadice ki fine rapporté par différent Sahaba-e-Kiraam, Rassouloullah ‎(Sallallaahou A'laihi Wasallam)‎‎‎‎ fine exige témoignage deux zomme au minimum pou la validité ene nikah. Donc échange de propos bizin faire divant minimum deux zomme musulmans pou ene nikah compté. D'après ene récit ki trouve dans Mou'atta Imam Mouhammad (R), Hazrat 'Oumar ‎(Radiyallahou anhou‎)‎ ti approuve ene nikah ki ti témoigné par ene zomme et deux madames dans place deux zomme. Donc d'après ça, ene zomme et deux madame aussi li suffit. Alors au minimum bizin témoignage deux zomme ou bien ene zomme et deux madames pou ene nikah compté. Et ça quantité-là li sufi pou ranne ene nikah public ki exigé par Shariah.

Par M.R. Meerun

Marriage