Couteau à double tranchant

Vrai méthode pou apprane Deen c’est apprane li par l’accompagnement c'est-à-dire par reste en compagnie ene ki fine aprane Deen dans ene façon professionnelle et ki so comportement aussi li islamique. Ça connaissance de Deen ki ene dimoune gagné par ça méthode-là li couma dire ene nourriture naturelle ki pas fine subir aukene modification ni dopage. C’est ene nourriture ki garanti ene la santé impeccable.

Zordi jour nou pé vive ene l’époque cotte la technologie et moyen de communication fine bien avancé. Le system de internet fine facilite pou gagne information à la minute. Mais après tout, c’est ene facilité ki nou bizin conne servi pou bénéficié. Li ene couteau à double tranchant. Celui ki pas conne servi ene couteau, li capave coupe li même et parfois ça capave coute li so la vie aussi. Dans la même façon, ene dimoune li joué avec so Deen quand li choisir pou conne so Deen à travers internet.

Nou tous conné ki information de Deen ki nou gagné lors internet li vine de plusieurs tendances. Très souvent ene quantité alle piégé par ceki zotte lire lors internet et sans conné ki zotte fine être piégé. Ou capave lire banne matière cotte ou pou trouve insulte contre banne Sahaba-e-Kiraam. Et ça capave change ou jugement à l’égard banne Sahaba-e-Kiraam. Et parfois zotte présente kikene comme ene héro ki Nabi ‎(Sallallaahou A'laihi Wasallam)‎ fine qualifié li de ene grand menteur. Ou pou capave trouve toute sorte commentaire lors l’Islam et banne pratiques de l’Islam ki non seulement capave bouleverse banne données auparavant mais li capave mette ou en doute envers l’Islam. Ki capave pli dangereux ki ene kitchose ki capave mette ou Imaan en danger ? Acoze ça bizin apprane Deen avec ene ‘Aalim ki nou conné. Et si bizin même apprane li par internet, alors bizin vérifié banne sites-là bien.

Quant à banne ‘Oulama, zotte bizin toujours reste en contact permanent avec banne livres. Fodé pas dépanne lors internet. Bizin toujours vérifié dans banne livres pou donne fatwa. Fodé pas copy and paste. Ça li ene moyen pou paralyse potentiel ene ‘aalim. Ene dimoune li autonome et indépendant quand li capave écrire avec so la main et li capave étudié dans livre. Fodé pas perdi ça cadeau-là.

[Extrait de Al Jamiat Vol.7 No.14]