Accusé No 1

Avant nou tire défaut avec kikene, nou bizin d’abord guette nou même dans la glace. C’est ene cozé ki tout dimoune même pou d’accord. Ki conné ça défaut ki ou pé tiré dans ou camarade li capave trouve dans ou même pli bien. Ou pé fatigue ou la tète avec ene joli signe de beauté lors figure ou camarade mais sans conné ki ou ena ene gros tache noire lors ou visage. Aster si ou oulé, ou capave appelle li « ene gros tache de beauté ». Mais tout dimoune conné ceki li été.

A peu prés ça même erreur nou pé commette depi boucou le temps. Nou plaigne nou la misère ki nou pé gagne crasé et nou pé subir difficulté et l’injustice par lezot. Eski nou fine déjà prend compte combien ditort nou pé faire nou qualité même. Ki quantité nou pé crase nou même. Ene dimoune pas pé capave vive avec tranquillité pourtant li entouré avec so qualité même. Ki manière nou capave vive bien avec le zot quand nou déjà couma chatte lichien entre nou même ? Bon manière et bon caractère c’est banne kitchose ki aide pou gagne ene dimoune so le cœur. Acoze nou mauvais caractère et faille mentalité, nou pas fine capave conquérir le cœur nou qualité. Si nou pas fine capave maille ene poisson dans l’aquarium, alors ki la pèche nou pou capave faire dans ene grand l’océan !

Pas tout dimoune ki sans comprend lors ça la terre-là. Ena boucou ki pé cherche la vérité. Si nou ti conne pratique nou Deen couma bizin, alors nou ti pou capave vine banne l’exemple vivant ki ti capave encourage et impressionne lezot. Mais ceki nou pé faire et la façon ki nou pé agir, li pas reflète narien de ceki nou pretanne. Nou appelle nou musulman mais narien pas reflète comme l’Islam dans nou. Nou ressemblé plis lezot ki nou même. Bizin tanne ou nom pou conné ceki ou été. Dans ene situation semblable, couma nou capave attane ki dimoune conne ça Deen ki garanti l’harmonie et la paix ? Mille ou cozé mais dimoune pou impressionné par ou comportement et ou façon de vive, pas par ceki ou dire. Si zordi nou pé gagne problème c’est acoze ki nou pas fine faire nou travail. Nou pas fine vive ça l’Islam-là dans nou la vie quotidienne. Dimoune fine reste sans conne l’Islam et ceki zotte fine conné, zote fine mal conne li. Donc dans ene certaine mesure, premier fautif et accusé numéro 1 c’est nou même parceki nou fine néglige nou Deen et nou fine blié nou mission. Nou capave dire ki nou fine faire ene grand ditort à l’humanité par néglige nou Deen !!!

[Extrait de Al Jamiat Vol.7 No.15]