Mutilation

Rase la barbe li ene genre de mutilation ki Nabi ‎(Sallallaahou A'laihi Wasallam)‎ fine empêché. Mutilation li ene façon pou défigure visage ene dimoune. Ene dimoune li rase so la barbe pou li paraite chic mais d’après shariah li défiguré et li paraite vilain divant Allah Ta’ala. Allah Ta’ala so Habeeb, nou Nabi ‎(Sallallaahou A'laihi Wasallam)‎ et so banne disciples c'est-à-dire banne Sahaba-e-Kiraam et banne personnages pieux fine toujours garde la barbe. Allah Ta’ala li content guette so serviteur dans ene coup d’œil ki ressemblé so banne serviteurs privilégiés. Ça li pou réalisé quand ene dimoune pas rase so la barbe. Rase la barbe li faire ene dimoune paraite vilain pareil couma ene madame paraite vilain quand li rase so cheveux lors so la tète. Si long la queue cheveux li ene moyen de beauté pou ene madame, alors la barbe li ene moyen pou embellir ene missié.

D’après Qur’aan-e-Kareem, change la forme ki Allah Ta’ala fine donne insaan li ene inspiration satanique. Tout changement dans le corps physique ene dimoune li interdit. A moins si ena ene preuve ki autorise ça changement-là ou bien impose ça. Par exemple ena preuve pou taille zongle, taille moustache, corrige la barbe, nettoye enba le bras, nombril etc. alors ça changement-là bizin faire li. Mais cote pena preuve, bizin laisse li couma li été. D’après ça principe-là si Nabi ‎(Sallallaahou A'laihi Wasallam)‎ pas ti ordonne pou garde la barbe, là aussi rase la barbe pas ti pou autorisé. Parceki rase la barbe li ene changement et ene modification dans le corps ki dimane preuve pou capave faire li.

D’après ça principe-là, banne ki autorise rase la barbe ki ti bizin fourni preuve de l’autorisation. Le fait ki pena aukene preuve ki autorise ça, rase la barbe pou continué reste interdit. Et la fait ki Nabi ‎(Sallallaahou A'laihi Wasallam)‎ fine ordonne pou garde la barbe, fine pli renforci ça l’interdiction-là. Et la pratique permanente et continuelle de Nabi ‎(Sallallaahou A'laihi Wasallam)‎, de banne Sahaba-e-Kiraam et de banne personnages pieux fine ajoute ene l’autre degré de l’emphase et l’importance à ça pratique-là.

Ça vilain manière copié lezot-là ki fine amène nou dans ene situation cote nou préfère bataz kuffaar et mushrikeen. Tifi et garçon zotte tous les deux zotte trouve zotte camarade pli zoli dans bataz kuffaar et mushrikeen. Ene musulman li bizin content Rasouloullah ‎(Sallallaahou A'laihi Wasallam)‎. Ça l’amitié-là li bizin à ene degré ki dépasse tout l’amitié. Signe de l’amitié pou Nabi ‎(Sallallaahou A'laihi Wasallam)‎ li trouve dans suive so sounnat. Pretanne ena l’amitié pou Nabi ‎(Sallallaahou A'laihi Wasallam)‎ sans pratique so sounnat li ene l’amitié dans balance. C’est ene genre de l’amitié ki nou même nou pas pou accepté de la part de kikene. Sans hésitation nou capave qualifié ça de traite et malhonnête et de mensonge.

[Extrait de Al Jamiat Vol.7 No.15]