Rêve-là fine cassé

Tous banne ki fine galoupe derrière dounia fine déçu. Parceki dounia jamais ti sincère avec kikene. Li couma ene objet ki passe dans la main tous dimoune sans ki li vine pou kikene. Banne ki fine senti ki zotte fine gagne dounia, c’est plito ene illusion ou ene mirage ou bien ene rêve. Et ça rêve-là li cassé quand zotte ferme lizié pou tout le temps. Zotte allé depi ça dounia-là la main vide necque avec quelque mètres la toile blanc lors zotte le corps. Et ça aussi pou vine la terre avec zotte le corps dans qabar. C’est dans qabar ki nou arrivé réalisé ki quantité ça dounia-là fine embête nou. Li pas fine vine pou nou. Ceki pli grave, li fine éloigne nou de ene aakhirat verdoyant et plein de succès ki li toujours sincère avec banne ki intéressé avec li.

Banne ki fine vive pou aakhirat fine conne vraiment la joie de la vie. Aakhirat fine reste toujours sincère avec zotte. C’est banne ki fine gagne le vrai succès parceki c’est ene succès ki reste tout le temps. Faudré pas nou gagne embêté avec le succès temporaire ki nou fine gagné. Pena succès sans réussir dans aakhirat. Vrai succès c’est succès dans aakhirat.

Li trop bonheur pou prononce lors succès ki nou gagné dans ça dounia-là parceki la lutte-là pencore fini. Le vrai score nou pou conne li quand lizié-là pou fermé pou tout le temps. Lerla nou pou réalisé ki tout ceki nou ti croire nou ena, fine disparaite. Parceki nou ti dans ene rêve et finalement rêve-là fine cassé pou nou trouve la plus grande réalité. Acoze ça bizin réveillé depi ça rêve de négligence et l’insouciance-là et commence travaille pou bâtir ça aakhirat ki pé attane nou avant ki vine trop tard.

[Extrait de Al Jamiat Vol.7 No.15]