Batté rendé

Si ou batte kikene, ou aussi ou pou gagne batté. Ça batté ki ou gagné-là, nou conne li par batté rendé. Ça même c’est la règle naturel. Amoins si ou ena ene justification valable pou ceki ou fine faire. Dans ça cas-là, ou fine décharge ou responsabilité par mesure ki ou fine prend. En retour ceki ou gagné c’est ene récompense. Sinon nou ena ene conséquence à subir pou ceki nou fine faire. Narien pas passe inaperçu pou Allah Ta’ala. Ou batte kikene. Ou maltraite kikene. Ou ignore kikene. Ou sous estime kikene. N’importe ceki ou faire avec kikene, alors ou gagne ça même en retour. Ene cozé dire ki le monde-là li couma ene montagne ki faire l’écho. Ceki ou dire, ça même ou tendé en retour. Donc eski li sage pou brise l’avenir kikene ki pou brise ou l’avenir plitard ?

Donc pli facile protège ou même par protège ou prochain. Sinon ça même appelle brise ou l’avenir par ou propre la main. C’est dans ça façon-là même ene dimoune li vine so propre l’ennemi. Pas conné si ça capave appelle autodestruction !

[Extrait de Al Jamiat Vol.8 No.1]