Mensonge

Mensonge signifié cause ene causé ki ou conné li pas couma ou pé dire. Ou conné ki ou camarade pas fine faire ene kitchose. Mais ou persisté avec connaissance ki li fine faire. Alors ça appelle mensonge et celui ki commette ça action-là appelle li menteur. Dans Qour'aan-e-Kareem Allah Ta'ala dire :

« Malédiction Allah lors banne menteurs ».

Selon ene hadice de Tirmizi, mensonge li amène vers gunaah et gunaah amène vers l'enfer. A force ene dimoune cause menti ki finalement li reconnaite comme ene grand menteur cote Allah Ta'ala. Mensonge li pas digne à ene ki ena imaan. C'est ene kitchose de la honte et de la bassesse ki ranne ene dimoune indigne. Donc cause menti, li pas travail ene dimoune ki ena dignité. Promouvoir et soutenir ene pratique ki en dehors banne limites de shariah aussi li ene mensonge. Et ça li encore pli grave parceki li capave mette toute ene population dans l'erreur. Et parceki ça mensonge-là li ene bouhtaan (fausse blâme) lors Allah Ta'ala et so Rasoul ‎(Sallallaahou A'laihi Wasallam)‎. Ça qualité dimoune-là li faire croire ceki pas vrai. Li envi faire croire ki c'est l'ordre Allah Ta'ala et l'enseignement de Rasouloullah ‎(Sallallaahou A'laihi Wasallam)‎ mais pourtant li conné ki li pas coumsa. Li faire li zisse pou so gain matériel et parfois li faire li pou pas perdi point.

Parfois ene dimoune li arrivé cause ene kitchose ki pas vrai. Mais li faire ça par erreur et par confusion. Ça qualité dimoune-là li capave ena ene chemin sorti si li fine prend tous so précaution avant li dire ça. Si jamais li faire li par négligence, alors li pou coupable cot Allah Ta'ala acoze so négligence. Acoze ça bizin prend boucou précaution avant cause causé Deen. Fodé pas déclare conné ceki ou pas conné. Ena boucou dimoune dans ça erreur-là. Li tellement ene zaffaire courant ki ena des fois banne 'Ulama aussi tombe là-dans. Zotte mal interprète banne versets Qur'aan et banne hadices. Et zotte induire le public dans l'erreur. Donc coze cozé Deen sans connaissance li ene très grave péché parceki en réalité li ene grand mensonge lors Allah et so Rasoul ‎(Sallallaahou A'laihi Wasallam)‎.

Bizin mette dans la tête ki tout ceki ene dimoune pé envi accumulé et gagné par embête dimoune li pas représente narien divant ceki Allah Ta'ala fine réservé pou banne ki sincère et honnête. Lors-là ça bien tigite narien ditout-là li pou ene bien bien tigite le temps. Acoze ça nou bizin cause la vérité, pratique la vérité, reste lors la vérité et propage la vérité si vraiment nou envi vine appréciable dans lizié Allah Ta'ala. Pou ena toute sorte tentation ki pou tente nou pou pas dire la vérité. Mais nou bizin conné ki nou ena ene prix à payé pou dire la vérité. Ena boucou kitchose à perdi. Mais pou le plaisir d'Allah Ta'ala nou bizin accepté perdi li. Et ça perdi-là li pas représente narien divant ceki pé attane nou. Li pas ene perdi dans vide ki pou plonge ou dans le regret. C'est ene perdi apart ki couronne ou de succès. C'est ene perdi ki ene la grain subir pou donne naissance à ene grand zarbre chargé de fruits.

فَمَا مَتَاعُ الْحَيَاةِ الدُّنْيَا فِي الْآَخِرَةِ إِلَّا قَلِيلٌ

« Jouissance dans dounia pas représente narien divant aakhirat apart ene kitchose bien minime. »

[Extrait de Al Jamiat Vol.7 No.12]