Li facile

Li facile pou faire hajj chaque l'année. Li facile pou faire ene douzaine umrah dans ene ti morceau jours. Li facile pou faire ene khatam Qur'aan tous les jours. Li facile pou lire ene centaine quantité de rakaat tous les jours. Mais ceki difficile et bien difficile même c'est baisse regard quand ene visage attirant passe devant ou. Ça deux « zimposse » ki Allah Ta'ala fine fixé dans nou la tète-là li faire boucou dégât si nou pas conne garde li dans control. Ou conné comié la caze fine cassé acoze ça. Comié le cœur fine brisé. Comié crime fine ena acoze ça. Et comié zenfant fine vine orphelin acoze ça.

Coumsa même li facile pou fanne la monnaie au nom sadaqah et la charité. Li facile pou faire donation énorme pou construire masjid, madrassah etc. mais ceki difficile c'est mange avec ça monstre ki appelle kibr-là. Ceki difficile c'est éradique le rongeur de la société ki appelle la jalousie. Li facile pou faire ibaadat en abondance mais ceki difficile c'est débarrassé et libéré de ça prison ki appelle riya-là.

Quand ene dimoune faire ene travail de Deen mais li pas faire li pou le plaisir Allah Ta'ala, li faire li pou so nom marché. Ça mentalité-là même ki appelle riya. Celui ki pas conne grandeur Allah Ta'ala et ki pas conne valeur récompense ki Allah Ta'ala fine réservé pou banne actions ki fine accomplir avec la sincérité, c'est ça qualité dimoune-là même ki tombe dans la bassesse de riya. Ena trop grand jouissance et l'ambiance quand ou tanne dimoune flatte ou. Donc li difficile pou débarrassé avec ça. Dimoune fort c'est ene personne ki réussi libère li de riya, de la jalousie, de l'arrogance et ki réussi ena control lors so regard. Et ça même ki appelle vrai Insaan. C'est dans ça sens-là même ki ene grand 'Aalim Hakeemul Ummat Hazrat Maulana Ashraf Ali Thaanvi (R) fine dire ki li bien facile pou ene dimoune vine ceki li envi mais ceki bien bien difficile c'est ki ene insaan vine insaan.

Li pas sufi ki kikene ena la main lipied couma insaan pou li vine insaan. Li bizin ena manière insaan pou li vine ene vrai insaan. Manière insaan c'est ça manière ki faire li vine bon, humble, gentil affectionné envers so semblable et sincère envers so créateur. Nou fine tendé et trouvé dimoune ena talent dans différent domaine ki faire li gagne banne titre couma Mr World, Miss World etc. Mais véritable fort et ceki nou tous bizin fier de li c'est ene personne ki combatte ça banne monstre ki dégrade insaan à ene degré cotte nepli ena insaniyyat.

[Extrait de Al Jamiat Vol.7 No.12]