Ene faille mentalité

Allah Ta’ala pas content quand kikene faire kikene ditort. Pas gagne droit faire personne ditort. Ene zanimo aussi li mérite ene bon traitement. Sinon ena ene compte à rendé cote Allah Ta’ala. Ene madame ti martyrise ene chatte par attache li sans donne li mangé boire ziska ki chatte-là fine mort. Nabi ‎(Sallallaahou A'laihi Wasallam)‎ fine trouve ça madame-là pé gagne punition dans jahannam. Si dans faire ditort ene zanimo ena ene conséquence grave, alors ki quantité grave li pou été si faire ene insaan ditort. Et ki arrivé si ça insaan-là li ou mama ou papa ? Vrai musulman c’est ene kikene ki pas faire ene l’autre musulman ditort. Combien ena parmi nou ki échoué dans ça l’examen-là tous les jours ! Chaque dimoune guette so l’intérêt personnel. Bien rare et bien tigite dans tigite ki ena considération pou lezot. C’est ene faille mentalité ki pli ressemblé avec la vie dans la jungle ki avec la vie dans ene société civilisée.

[Extrait de Al Jamiat Vol.8 No.1]