Donne 3 talaaq ene sel cou

Pas gagne droit donne tout les trois talaaq ene sel coup. Mais si fine donne tout les trois ene sel coup, alors tous les trois talaaq pou compté. Pas capave faire prétexte ki li pas compté acoze ki pas gagne droit donne li dans ça façon-là. Tous les trois compté et ça même ceki tous banne Sahaba-e-Kiraam dire. Et ça même ceki tous les 4 Imam dire.

Coumsa même pas gagne droit donne talaaq quand ene madame li dans so haiz. Mais si fine donné, li prend l’effet et li compté.

Couma ou guette kikene ki conné pou faire ou nikah, coumsa même bizin guette kikene ki ena connaissance et l’expérience et ki honnête avant ou donne talaaq. Rupture dans ene ménage li pas ene simple zaffaire. Ena boucou dimoune souffert là-dans acoz plaisir ou erreur ou négligence ene seul dimoune. Bizin analyse les pours et les contres avant prend décision pou séparé. Quand trouvé ki li pli néfaste dans reste ensam ki dans séparé, alors à ça moment-là bizin séparé même. Aster quand fine décide pou séparé, bizin séparé par ene sel talaaq. Dans donne ene seul talaaq, ou pou ena tous banne options. Ou pou ena droit retourne avec ou madame avant so iddat terminé. Dans ça cas-là pena pou faire nikah si talaaq ki ou ti donné li ti ene talaaq Raj’i.

Si ou pas retourne avec li ziska ki so iddat fine terminé, alors ou madame pou sorti depi dans ou nikah et li pou libre pou faire so l’avenir. Mais après iddat si tous les deux décide pou retourne ensam, alors zotte pou capave faire li. Dans ça cas-là zotte pou bizin refaire nikah. Voilà tout ça facilité-là ena dans donne ene seul talaaq sans embarrasse personne. Problème-là vini quand nou pas accepté facilité ki shariat fine donne nous. Acoze ça, erreur-là vine irréparable. Dimoune ki pas ça sérieux-là dans Deen, li retourne avec so ex-madame malgré ki li pas gagne droit. Li accepté vive dans haraam pou tout le temps sans réalise ça ditort ki li pé faire li même. Li pas trop tard si ou arrivé réalise li quand même ou fine fini vive ene bon boute le temps dans ça l’enfer de haraam-là. Ou capave discontinué et repentir. Jamais ti trop tard pou faire tawbah.

Ena ene l’autre extrême dans la vie mariage. Ene dimoune li capave tire tous qualités défauts dans so madame mais li refuse pou donne talaaq. Li capave dire ou ki li pas envi faire Allah Ta’ala so trône tremblé. Pourtant li capave pé commette ene quantités gaffes et ene série de erreurs dans so la vie. Mais li trouve ki talaaq même ki faire trône tremblé sans prend compte banne bêtise ki li capave pé faire. C’est plitot par méchanceté et pou banne l’intérêt personnel ki li faire ça. Quand ene dimoune trouvé ki li pas pou capave établir commandements Allah Ta’ala dans so la vie conjugale et li trouvé ki madame-là pas envi reste avec li, alors c’est so devoir ki li faire le nécessaire. C'est-à-dire li séparé par ene sel talaaq. Eski li chic ki ou force ene dimoune vive avec ou quand li pas envi vive avec ou? Sans doute li pas faire l’honneur à ene personne digne. C’est ene bassesse plitot.

Li vrai ki ena possibilité ki ene madame capave servi nikah comme ene moyen pou avale dimoune so richesse. C'est-à-dire dans banne cas cote banne mahar assez conséquent fine fixé dans mariage. Si missié-là trouvé ki madame-là pé rode séparé sans aukene raison valable, alors pou remédié ça problème-là shariat autorise ça missié-là pou réclame le retour de so mahar comme ene condition pou donne talaaq.                     

Shariat fine faire provision pou personne entre les deux pas gagne aukene difficulté. Problème vini quand nou pas accepté servi facilité ki Shariat fine donné. Très souvent ene missié li pas envi donne so madame talaaq malgré ki madame-là pas oulé continué reste avec missié-là. Dans la plupart du cas, c’est par méchanceté ki missié-là envi bloque madame-là. Finalement arrive le pire. Madame-là li vive avec ene lot et missié-là li incapable pou empêche li. Eski li ene l’honneur pou ene missié ki li continué garde ene madame dans so nikah quand li bien conné ki madame-là li avec ene lot ? Définitivement non. Si madame-là li en tort à cent pour cent, missié-là aussi li pas moins. Parceki li capave libère li et tous problèmes resoude. Mais li faire la tète dur. Et résultat-là li clair. Ene pé vive dans zina et lot pé amène la vie dayyous dans colère et malédiction Allah Ta’ala.

[Extrait de Al Jamiat Vol.8 No.1]