Connaissance de Deen

Connaissance de Deen c’est ene kitchose tellement valeureux et louable ki Allah Ta’ala fine recommane Nabi ‎(Sallallaahou A'laihi Wasallam)‎ pou faire duah pou augmente ça. C’est ene signe et ene indication ki Allah Ta’ala li satisfait avec ene ki Allah Ta’ala fine accorde li la compréhension et connaissance de Deen.

Ena ene quantité faveurs ki ene dimoune capave ena lors li. La connaissance de Deen li ene parmi banne faveurs ki li vaut la peine si ene dimoune li envié ene ki ena li. Dans ene hadice Nabi ‎(Sallallaahou A'laihi Wasallam)‎ fine dire :

« Ene personne ki prend ene chemin pou acquérir la connaissance, alors acoze ça travail-là Allah Ta’ala facilite pou la personne ene chemin ki pou amène li dans jannat. »

D’après ene l’autre hadice, ene personne ki sorti pou cherche la connaissance, li continué reste dans chemin Allah Ta’ala tanque li pas retourné.

D’après ene hadice de Tirmizi, dounia et tout ceki ena là-dans li maudit excepté Allah Ta’ala so zikr et ceki Allah Ta’ala li content et ene aalim ou ene ki apprane Deen.

Tout ça banne hadice-là sufi pou montré la valeur de connaissance de Deen. Donc banne ki ena li aussi pou banne ki vraiment valeureux et appréciable. Pou démontré ça valeur-là Nabi ‎(Sallallaahou A'laihi Wasallam)‎ fine dire ki valeur ene aalim lors ene personne ki reste engagé dans ibaadat li couma valeur ki moi mo ena lors ene ki pli bas parmi zotte.

[Extrait de Al Jamiat Vol.8 No.2]