Faveur lors banne ki ena taqwa

Taqwa veut dire l’obéissance à Allah Ta’ala. Nou obéir Allah Ta’ala par exécute tous banne commandements et par abstenir de tous ceki li fine interdit. Fodé ena les deux aspects pou nou capave dire ki nou pé obéir Allah Ta’ala. Par pratique banne ibaadat saisonniere couma faire namaz à l’occasion de Shabe Baraat, jour Jum’ah ou bien le 10eme jour de Mouharram nou pas prouve nou l’obéissance à Allah Ta’ala. Ça banne ibaadat ki nou faire à ça banne l’occasion-là en forme zikrullah, namaz, tilawatul Qur’aan et roza etc. zotte ena zotte mérite sans doute et zotte ena zotte récompense aussi mais ça quantité-là li pas sufi pou faire nou dire ki nou pé obéir Allah Ta’ala. Ça li vini quand nou faire li lors ene base permanent et dans tous banne commandements. Ceki pli important là-dans c’est abstenir de banne kitchose ki Allah Ta’ala fine empêché.

Quand ene dimoune arrive dans ça niveau-là, Allah Ta’ala tire li depi dans banne difficultés. Allah Ta’ala soulage li dans banne moments de détresse. Allah Ta’ala accorde li so banne nécessité dans ene façon ki li pas atane. C’est à dire li reste sous le regard de Rahmat spécial de coté Allah Ta’ala. So banne moments difficiles aussi li mélangé avec la joie. Li senti ene la joie et tranquillité extraordinaire quand li pose so front dans sajdah.

[Extrait de Al Jamiat Vol.8 No.2]