Couma gagne Allah

Chaque kitchose ena ene moyen et ene chemin pou gagne li. Pou gagne Allah Ta’ala aussi ena ene chemin. Li bien facile et simple. Necque ena pou développe la volonté. Avec la volonté, kitchose bien difficile aussi vine facile. Chemin pou gagne Allah Ta’ala c’est suive so banne commandements d’après les principes établi par nou bien aimé Nabi ‎(Sallallahu Alaihi Wassallam)‎. Pena aukene chemin apart ça. Tout kitchose ki nécessite casse l’ordre Allah Ta’ala ou nécessite alle conte sounnat de Nabi ‎(Sallallahu Alaihi Wassallam)‎, c’est ene chemin ki éloigne nou avec Allah Ta’ala. Pas faire namaz, pas garde roza dans le mois de Ramadhan ou bien pas donne zakaat c’est banne façon ki nou appelle casse l’ordre Allah Ta’ala. Coumsa même coze menti, embête dimoune, faire dimoune ditort par coquin zotte ou par prive zotte de zotte droit, tout ça-là c’est banne travail ki pas d’après l’ordre Allah Ta’ala. Ene dimoune semblable c’est ene kikene ki fine perdi ça chemin ki amène cote Allah Ta’ala.

Nou pas capave faire narien aussi apart suive commandements Allah Ta’ala parceki c’est Allah Ta’ala, Li tout seul ki fine crée nou. Li même nou Maalik. Li même ki donne nou tout ceki nou bizin. Suive ene l’autre chemin apart ça chemin ki Allah Ta’ala fine tracé pou nou, c’est pli grand ingratitude ki dimoune capave commette. Ça même ki nou appelle kufr. Acoze ça même, celui ki quitte ça dounia-là dans ene l’etat pareil, li pou souffert pou tout le temps. C’est ene péché impardonnable. A moins si ene dimoune réussi dimane pardon avant li mort, quand même à la dernière minute, alors Allah Ta’ala, pou pardonne li. Ça c’est ene faveur immense et inégale de la part Allah Ta’ala ki li pardonne ene ki dimane li pardon à la dernière minute aussi.

Fodé pas pensé ki Allah Ta’ala ena banne collaborateurs ki aide li dans so banne travail parceki Allah Ta’ala li tout seul li faire tout. Li pas bizin kikene pou aide li. Ça conception ki Allah Ta’ala fine partage so pouvoir à kikene c’est shirk. Shirk ou bien associé kikene avec Allah Ta’ala dans n’importe ki kitchose et dans n’importe ki aspect aussi li représente kufr. Et li ena même l’effet et même conséquence couma kufr. Shirk aussi li impardonnable excepté pou ene celui ki fine réussi repentir de ça avant li mort.

Donc pou gagne Allah Ta’ala nou bizin obéir Allah Ta’ala so deen ki représente so banne commandements d’après le sounnah de Nabi (Sallallahu Alaihi Wassallam). Pou gagne la volonté pou obéir Allah Ta’ala, nou cotoye ene ki ena ça volonté-là à ene stage assez avancé. Ena des fois ça même ki appelle ene guide spirituel ou bien ene mourshid ou bien ene sheikh. Li vrai ki sans ene contacte étroite avec ene sheikh, li possible pou gagne ça volonté-là mais pareille couma ene auto didacte ou ene ki apprane par li même, li bien rare dans le monde et bizin l’instruction et l’accompagnement pou apprane, coumsa même sanla aussi li bien bien rare. En général li bien nécessaire faire li dans l’accompagnement et sous l’instruction ene Sheikh Kaamil. Banne ki fine oulé gagne li sans passe par procédure normal, zotte capave fine gagne l’impression ki zotte fine gagne li mais ça aussi li bien vrai ki dans ça dounia-là bouteille cassé aussi ena des fois passe pou perle ou diamant. Ça c’est le constat général de banne Mashaa’ikh de tous l’époque. C’est necque après avoir goutte ceki réel ki capave conne la différence. Depi loin mirage aussi donne l’impression delo. Mais ça l’impression-là li pas plis ki ene illusion. Ena buku parmi nou ki prend illusion de taqwa pou taqwa. Or normalement taqwa réel li vine apartir Mujaahadah.

Mujahadah c’est ene cours de formation ki ene dimoune suive sous supervision ene Sheikh Kaamil. Dans ça l’étape de formation-là, le Sheikh li dépisté le germe de chaque maladie et li propose le moyen pou guéri li. Par exemple ene dimoune ki néglige so akhirat acoze so travail c’est ene dimoune ki so l’attachement avec dounia li pli fort ki l’attachement aakhirat à ene stage ki l’attachement-là li éclipsé et li sombré.

Quand li arrivé maitrise ça niveau-là, li pratique so Deen convenablement sans néglige so dounia. Acoze so l’attachement fort avec aakhirat, li bénéficié avec dounia sans laisse li implanté dans so le cœur. C'est-à-dire li navigué dans l’océan sans laisse delo rente dans so navire.

[Extrait de Al Jamiat Vol.8 No.3]