Vive couma Insaan

Ou ene dimoune. Ou bizin mangé boire pou ou vive. Parfois ou malade aussi. Ou bizin médicament pou traite ou. Ou ena ene salle de bain et ene toilette ki ou servi pou banne raison ki tous dimoune conné. Ou pas parfait. Ou ena ou banne défauts ki ou conné pli bien ki lezot. Ou au courant de ou banne manquements pli bien ki ou conne pou lezot dimoune.

Apres tout ça-là, ou encore croire ki ou ena droit sous-estime ou prochain ? C’est Allah Ta’ala ki parfait. C’est Allah Ta’ala ki au delà de tout manquements. Nou tous bizin tourne envers li. Nou tous bizin content ene à l’autre et nou vive ensam dans l’harmonie pou l’amour ki nou ena pou Allah Ta’ala. Ça même la vie ki appelle la vie douce.

Ene l’amitié ki amène l’harmonie dans la société c’est ene l’amitié ki basé lors l’amitié ki nou ena pou Allah Ta’ala. Ene l’amitié ki pena Allah Ta’ala au fond et à la base de ça, c’est ene l’amitié ki faire acoze banne l’avantages personnel. Ça genre de l’amitié-là li faire dimoune vine plitôt égoïste. Dimoune sympathise avec dimoune acoze l’intérêt personnel. Quand ene dimoune vive pou so l’intérêt personnel, ça faire li brise banne frontières ki finalement dessane li dans ene degré ki pas digne à ene humain.

Tous ça-là capave être remédié quand dimoune commence vive pou Allah Ta’ala. Vive pou Allah Ta’ala c’est vive d’après Deen. Donc vive d’après Deen li faire insaan vive couma insaan.

[Extrait de Al Jamiat Vol.8 No.3]