Belle-mère/ Belle-fille

Ou bizin agir avec ou belle-fille couma ou ti a content ou zanne agir avec ou tifi. La façon ki ou pas apprécié ki ou zanne ou so belle-mère faire avec ou tifi, li pas ene façon ki ou servi li avec ou belle-fille. Si ou continué avec la manière ki ou pé traite ou belle-fille, alors pas vine dire ki ou tifi pé gagne maltraité parceki si laba-là pas bon, bé ici là aussi li pas correcte. Pena aukene différence apart ki laba-là c’est ou tifi ki enba couteau et ici ou belle-fille ki dans ou griffe.

C’est la meilleur façon pou juge manière ki ou traite ou belle-fille si li bon ou mauvais. Nom de dire ki nou appelle belle-fille, belle-fille. Sinon traitement ki nou donne belle-fille, li couma dire fine ramasse li depi dans poubelle.

Banne belle-fille aussi zotte ena zotte part. Zotte oulé à tout prix sépare zotte missié de zotte mama. Eski li ene kitchose pou faire ça ! Couma ou pou senti si kikene envi sépare ou zenfant de ou? Li vraiment pénible. Alors ki faire ou envi mette ou belle-mère dans ene aussi grand la peine ?

Quand ou traite ou belle-mère, ou bizin pensé ki dans ene morceau jours ou aussi ou pou bizin amène ça rôle-là. Lerla ou pou comprend ceki ou fine faire quand ou belle-fille faire avec ou ceki ou fine faire avec ou belle-mère. Tôt ou tard chakene ena pou récolté ceki li fine semé. Faudré pas nou croire ki ceki nou fine faire, li alle dans vide. Chakene ena pou gagne récompense de tout bon ki li fine faire. Coumsa même li ena ene prix à payé pou le mal ou ditort ki li fine capave commette.

[Extrait de Al Jamiat Vol.8 No.3]