Valeur et respect descendant de Nabi ‎(Sallalaahou Alaihi Wasallam)‎

Selon ene livre ki appelle Al-Mousaamaraat, ene personne fine décide pou alle faire hajj. Li fine prend 1000 dinar pou li faire préparation. En route ene madame fine zoine avec li et fine déclaré ki li ene descendant de Nabi ‎(Sallalaahou Alaihi Wasallam)‎ et ki li dans ene difficulté. Alors la personne fine dévide tout ceki li ti ena avec li et fine remette ça à ça madame-là. Plitard quand banne haji de so l’endroit fine retourné, chakene fine commence faire li compliment. Lors ça la personne fine bien étonné. Le soir li fine rêve Nabi ‎(Sallalaahou Alaihi Wasallam)‎ ki fine dire li : « To pé étonné acoze ki banla pé faire toi compliment. En réalité Allah Ta’ala fine crée ene farishta avec to ressemblance ki pou continué faire hajj de to part ziska Qiyaamat acoze ki to fine faire khidmat ene madame de mo la famille ki ti en détresse. »

Nou bizin toujours ena l’amitié avec ene ki li descendant de Nabi ‎(Sallalaahou Alaihi Wasallam)‎. Ça li montré l’amitié ki nou ena pou Nabi ‎(Sallalaahou Alaihi Wasallam)‎. Mais en même temps nou bizin conné ki nou suive la vérité. Et ça li capave trouve ailleurs aussi. Li pas nécessaire ki ça la vérité-là li trouve avec ene ki li descendant de Nabi ‎(Sallalaahou Alaihi Wasallam)‎. Mais à jamais nou bizin pas manque du respect pou la famille de Nabi ‎(Sallalaahou Alaihi Wasallam)‎.

Si nou bizin faire ça quantité concession-là à l’égard de la famille de Nabi ‎(Sallalaahou Alaihi Wasallam)‎, alors ça li capave donne ene ti l’idée de dimension de mouhabbat ki nou bizin ena pou nou Nabi ‎(Sallalaahou Alaihi Wasallam)‎. Ena aussi ça qualité personne-là ki fine préfère donne la vie au lieu ki ene ti piquant pique dans li pied mubaarak de Nabi ‎(Sallalaahou Alaihi Wasallam)‎. C’est ene repère ki banne Sahaba-e-Kiraam fine établi. C’est à nou pou guetté à ki point nou capave rapproche nou avec ça repère-là. Fodé pas nou embête nou avec ça l’amitié et ishq saisonnière et occasionnelle ki nou exprimé pou Nabi ‎(Sallalaahou Alaihi Wasallam)‎. Nou conné ki ene dernier musulman aussi li ena l’amitié pou Nabi ‎(Sallalaahou Alaihi Wasallam)‎. Mais ça aussi li vrai ki nou fine laisse ça l’amitié-là dormi enba ene tas l’insouciance, foupamalisme, négligence et nafsaniyyat ki nou réveille li brusquement dans certaine l’occasion. Après ça li retombe dans ene profond sommeil. Ummat bizin sorti depi dans ça léthargie-là. Bizin content Nabi ‎(Sallalaahou Alaihi Wasallam)‎ plis ki tout et tout les jours et 24/24. Nou bizin suive sounnat de Nabi ‎(Sallalaahou Alaihi Wasallam)‎ à tel point ki dimoune trouve ça dans nou sans nou dire ou tire ene mot depi dans nou la bouche. Sans introduire nou, nou laisse paraite ceki nou été. Eski ena succès sans ça l’amitié-là dans dounia et dans aakhirat ? La réponse c’est ene non catégorique !!!

Swallallaahu Alaihi Wa Aalihi Wa Sallam

[Extrait de Al Jamiat Vol.8 No.4]