Quraan-e-Kareem

Quraan-e-Kareem c’est Allah Ta’ala so kitaab. Ene kitaab sacré et authentique ki fine reste intact pendant plis ki 1400 bananés. Ene kitaab ki garanti hidaayat et prospérité en général pou tout banne ki accepté li et implémente li dans zotte la vie.

Récitation de Quraan-e-Kareem ki nou conne li par tilaawat-ul-Quraan, li renferme boucou sawaab. Chaque lettre li rapporte 10 récompense. Et pli ene personne lire li avec dévotion et sincérité, pli so récompense et so bienfait li continué augmenté. Récite Quraan-e-Kareem avec ikhlaas et sincérité veut dire lire li zisse pou faire Allah Ta’ala plaisir. Lire pou l’honneur ou bien pou reconnaite comme ene grand Qari li conte ikhlaas. Non seulement pena sawaab là dans mais la personne concerné li ena ene punition pénible et ene dénigrement à subir dans aakhirat. Ça appelle vanne Allah Ta’ala so kitaab pou banne bénéfices mondain ki pas vaut narien. Dimoune digne et l’honorable pas dessane dans ene bassesse pareil. Bizin lire Quraan-e-Kareem zisse pou le plaisir Allah Ta’ala.

Prend casse pou lire Quraan-e-Kareem dans la caze dimoune aussi li inclure dans lire Quraan-e-Kareem pou gain mondaine. Banne Ulama-e-Kiraam fine qualifié ça de haraam. Donc fodé pas servi tilaawat-ul-Quraan comme ene marchandise de commerce. Ça pratique paye kikene pou lire Quraan-e-Kareem et transmette so sawaab à ene personne ki fine mort, li ene pratique dans vide. La personne ki payé-là li pena narien à gagné et ni la personne ki fine mort gagne kitchose. Et la personne ki prend casse pou lire Quraan-e-Kareem, li pou encore dans pli problème. Si nou oulé faire kikene bénéficié avec nou tilaawat, alors nou bizin faire li gratuite et volontaire.

Similairement pas gagne droit réclame aukene somme d’argent pou faire Khatmul-Quraan dans taraweeh. Plitot faire kikene lire banne ti sourah au lieu faire Khatmul-Quraan par kikene ki prend casse. Dimoune capave dire ki zotte pas réclame narien mais réclamé pas veut dire dimane avec la bouche. Ena lezot façon aussi pou conné ki ena ça facteur la monnaie-là dans faire taraweeh. Par exemple zotte choisir banne place et masjid ki paye pli bien ou bien zotte préfère faire taraweeh dans ene l’autre l’endroit ou à l’extérieur et pourtant zotte ti capave faire li dans zotte l’endroit cote zotte l’endroit bizin zotte. Malgré ça zotte préfère faire li dans ene l’autre place. Li vrai ki dans certaine cas li pas coumsa mais la majorité cas de nos jours li ena ça facteur la monnaie-là. Allah protège nou banne hafiz et nou banne Ulama de ça. Quand nou choisir masjid ki paye pli bien, alors li assez clair ki ça galoup par ici et par là li ena quelque chose à faire avec la monnaie.

Banne livres ki nou ena dans fiqh zotte bien nette et clair lors ça point-là ki pas gagne droit ni prend ni donné lors récitation Quraan-e-Kareem. Zotte qualifié ça de servi Quraan-e-Kareem comme ene moyen de revenu et ene moyen pou accumule dounia. Ena banne Ulama ki fine essaye tire ene chemin sorti pou banne ki faire taraweeh. C'est-à-dire zotte recommane pou donne li la responsabilité faire imamat dans ene deux namaz zisse pou zotte gagne ene chemin pou capave paye ça hafiz-là. Mais quand ou guette le montant ki hafiz sahab gagné pou ene deux namaz ki li faire, ou trouve clairement ki fine tire ene prétexte zisse pou capave paye li. Fine tanne dire ki ena ki gagne ziska Rs 400,000/- quand tandis ki nou banne imam ki faire imam toute longue l’année bizin travaille comme imam tous les jours pendant 2 à 3 ans pou arrive ça somme-là. Alors li clair ki pas pé paye li pou imamat mais pé paye li pou taraweeh. Sinon kifer ou pas paye ou imam régulier ki servi ou pendant toute longue l’année ene salaire pareil?

La lecture Quraan-e-Kareem li pas ene marchandise ou ene service ki ou rane dimoune. C’est ene ibaadat ki nou faire pou gagne sawaab. Donc ou pas capave lire li et réclame ene l’argent en retour. Quant à l’enseignement de Quraan-e-Kareem, li ene kitchose bien nécessaire et essentiel. Conne lire Quraan-e-Kareem et comprend Quraan-e-Kareem li dépanne lors l’enseignement.

Banne Ulama fine observé ki dimoune nepli ena l’intérêt de Deen. Et dimoune de jour en jour nepli ena la volonté pou faire travail de Deen. Acoze ça li paraite ki l’enseignement de Deen en général et particulièrement l’enseignement de Quraan-e-Kareem pou alle négligé par manque de volonté et l’insouciance de la part de l’Oummah. Acoze ça zotte fine trouve li sage pou autorise payé lors l’enseignement de Deen et de Quraan-e-Kareem parceki sans l’enseignement li paraite bien difficile pou dire ki l’Oummah capave conne Deen. Plitard imamat et donne azaan aussi fine inclure ladans quand fine trouve la nécessité. Mais prend casse lors lecture Quraan-e-Kareem fine toujours reste pareil. C'est-à-dire pas gagne droit ni donné, ni prend, ni dimandé ou réclame quelque chose. Tous ça-là li haraam. Chaque dimoune li faire so propre lecture pou so bien être personnel. Li pas ene nécessité pou alle lire cote kikene ou lire pou kikene. Si ene dimoune envi faire li, alors li faire li gratuite et volontaire sans réclame kitchose.

[Extrait de Al Jamiat Vol.8 No.5]