Khatmul-Quraan dans le mois de Ramadhan

Al Hakim Abou Abdullah rapporté ki Imam Boukhari R dans namaz ki li ti pé faire à soir avec so banne compagnons dans le mois de Ramadhan li ti pé récite 20 versets dans chaque rakaat. Et coumsa même li ti pé faire ziska ki li ti pé termine Quraan. En sus de ça li ti pé récite ene tiers à la moitié Quraan dans l’heure de sehri. Ceki li ti pé récité dans ça l’heure-là ti pé permette li faire ene khatmul Quraan dans chaque trois jours à l’heure de sehri. Apart ça li ti pé faire ene Khatmul Quraan tous les jours ki li ti pé terminé à l’heure de iftaar. (Hadyussaari Mouqaddamah Fathul Baari)

D’après le Al-Itqaan de Allamah Jalaluddeen As-Souyouti R, pli boucou Khatmul-Quraan ki fine être pratiqué par Salaf-e-Saliheen c’est huit khatam dans ene jour c'est-à-dire 4 dans la journée et 4 le soir. Faire 2 ou 3 ou 4 khatam ti assez normal. Mais la plupart Sahaba-e-Kiraam ti pé faire ene Khatmul-Quraan dans 7 jours.

Selon le Al-Azkaar de Allamah An-Nawawi, Hazrat Mansoor Bin Zaazaan ti ena l’habitude faire ene khatm entre Zohar et Assar et li ti pé faire ene l’autre entre Maghrib et Esha.

Ça li assez clair pou démontré l’importance ki nou Salaf-e-Saaliheen ti attaché avec le mois de Ramadhan. Tilaawat-ul-Quraan en li même li ene très grand ibadat ki amène Noor (lumière) et tranquillité dans le cœur. C’est ene ibaadat ki nou capave faire li facilement dans nou la caze ou dans masjid ou bien même dans travail aussi. Ena dimoune zotte organise banne activités dans le mois de Ramadhan. Au lieu organise banne activités, li pli bon reste engagé dans ibaadat couma doua, istighfaar, zikr et surtout Tilaawat-ul-Quraan. Pli boucou le temps capave consacré dans Tilawat-ul-Quraan ki capave permette nou termine plizir fois Quraan-e-Kareem dans ça mois-là. Ça li pou permette nou passe nou Ramadhan efficacement et facilement.

Barakat dans le temps

Faire ene quantité travail dans ene bien tigite le temps li vine par barakat dans le temps. C’est ene question ki parfois nou même nou capave remarque ça dans nou la vie. Parfois nou remarqué ki ene quantité travail fine réussi faire li dans bien tigite le temps. Et parfois li prend nou boucou le temps pou termine ene travail ki bien facile. Nou Salaf-e-Saliheen fine faire ene quantité travail dans bien tigite le temps. Et pourtant zotte pas fine gagne long la vie. Ena fine vive 50 ans à 60 ans mais nou reste hébété quand nou guette le volume de travail ki zotte fine réalisé. Donc c’est ça même barakat dans le temps ki fine permette zotte faire ziska huit Khatmul-Quraan dans ene jour.

[Extrait de Al Jamiat Vol.8 No.5]