Aadil, adaalah, faasiq et fisq

Aadil c’est ene celui ki ena adaalah. Et adaalah c’est ene faculté, ene potentiel ou ene habilité ki faire ene dimoune exécute banne commandements Allah Ta’ala, abstenir de banne kitchose ki Allah Ta’ala fine interdit et ki faire li évite banne comportements et pratiques indignes.

Dans ene seul mot, aadil veut dire Deendaar. Souvent Deendaar fine mal compris et mal interprété. De nos jours, ene deendaar c’est ene kikene ki ena l’attachement avec Deen et banne ‘Ulama et ki actif dans banne activités islamiques mais ki en même temps capave ena banne bavures aussi couma néglige namaz, assisté toute sorte cérémonies et pratiques. Et ki capave pas pé observe pardah ou bien ki pé observe li mais ki pas attache l’importance ki bizin. Tout ça là nou reconnaite comme Deendaar dans nou société mais pourtant Deendaar li ene lot kitchose apart ça. Sanla nou capave appelle li ene ki supporte Deen et sympathise avec banne Deendaar. Li capave ena Deeni Mizaaj (penchant pou Deen) mais li capave aussi pas ene Deendaar dans le vrai sens du mot.

Entre parenthèse, li bon nou faire ressortir ki li pas le but ici pou discrédite ou dénigré kit catégorie du public. C’est necque pou présente ene miroir ki pou permette chakene positionne li et amène correction ki bizin et nécessaire dans li.

Donc aadil veut dire ene kikene ki observe Shariah convenablement. C'est-à-dire c’est ene ki applique banne commandements, ki abstenir de banne kitchose ki interdit et ki reste loin de banne kitchose ki pas faisable et ki conte le respect et la dignité. En passant li bon conné ki ene vrai Deendaar à jamais li pou considère li parfait ni li pou satisfait avec le niveau ki li été ki conséquemment faire li arrête pense pou amélioré. Parceki ena toujours l’espace pou amélioration malgré ou fine capave atteine ene degré bien avancé de la piété. Le moment ki ene dimoune pense ça, li commence rétrogradé et dessane depi le niveau ki li été. Le pire c’est quand li considère li supérieur à kikene parceki le complexe de supériorité li ene produit de ene rooh et nafs ki encore malade et ki infecté de ça virus ki appelle l’orgueil. Et ça infection-là li en conflit et le contraire de ceki nou appelle taqwa ou la piété. Or ene mouttaqui ou ene Deendaar c’est ene kikene ki pena ça maladie-là.

Pou le besoin de témoignage, c’est necque ene aadil so témoignage ki valable et acceptable. Parceki ene dimoune li bizin ene personne ki digne de foi pou so témoignage accepté. Islamiquement parlant, c’est ene Deendaar même ki ene dimoune ki capave faire li confiance. Ça pas veut dire ki ene ki pas Deendaar li pas cause vrai. Li capave pé cause vrai couma li capave pé faire le contraire. Le critère ki distingue la vérité de la fausseté c’est adaalah. Donc ene témoignage ki vine de la part de ene ki pas aadil, li considéré comme étant pas vrai de par procédure. Li pareil couma ene jeune lauréat de moins de 18 ans ki capave ene génie aussi mais li pena droit de vote. Par contre ene laboureur ki pas conne lire ni écrire pou ena droit voté acoze ki li majeur. Le critère principal c’est la maturité et ça li définir par la majorité parceki ene dimoune majeur li reconnaite comme ene celui ki ena la maturité. Donc li ena droit de vote. Et ene ki li moins de 18 ans pas pou ena ça droit-là. C’est ene question de procédure ki pas nécessairement reflècte la réalité.

En opposition de ça, nou ena le mot faasiq ki désigne ene personne ki ena fisq. C’est le contraire de aadil. Si aadil signifié ene personne ki sérieux dans Deen, faasiq veut dire ene personne ki négligent dans pratique Deen ou bien ene dimoune ki pas prend Deen au sérieux. Acoze so négligence, li pas faire ceki li bizin faire et li faire ceki li bizin pas faire. Ça li ene l’attitude ki qualifié de fisq et la personne ki ena ça dans li, appelle li faasiq.

Couma ene dimoune li qualifié de négligent dans Deen quand li néglige ene kitchose ki obligatoire ou bien quand li commette ene pratique ki interdit, coumsa même li qualifié de négligent quand li persisté et prend l’habitude commette banne péchés mineur. Ene péché li qualifié de mineur par rapport à ene péché majeur. Li ene kitchose relatif. Sinon péché en li même, de par so appellation, li ene kitchose détestable. Et celui ki commette li, li ranne li détestable. Mais Allah Ta’ala de par so Rahmat et so Grace, li tolère banne péchés ki relativement moins grave tanque ki li pas frappant et flagrant et tanque ki la personne abstenir de banne péchés graves et majeur. Et li vine dans ça stage-là c'est-à-dire flagrant quand la personne persisté lors ça et li prend ene l’habitude faire li. Li vine couma dire ene linge blanc rempli avec banne tipti tipti tache noir. Dans l’ensemble li faire li paraite bien vilain et dégoutant.

Donc ene aadil ou ene personne intègre c’est ene kikene ki sérieux dans Deen. Par contre ene faasiq c’est ene ki ranne li indigne acoze le manque de pudeur ki indiqué par néglige banne kitchose ki obligatoire ou par commette banne pratiques interdites ou par persisté lors banne péchés mineurs. Ene dimoune li ranne li digne, intègre et honorable à travers taqwa ou bien par prend Deen au sérieux.

[Extrait de Al Jamiat Vol.8 No.5]