Miscellaneous

Halaal, Haraam et Moushtabihaat

Halaal li bien clair et haraam (aussi) li bien clair. Et entre ça deux-là ena boucou kitchoses ambiguës ki boucou dimoune pas conne zotte (position légale). Celui ki évite banne kitchoses ambiguës, veut dire ki li fine protége so Deen et so l'honneur et celui ki tombe dans banne kitchoses ki ena doute, li couma dire ene berger ki faire (ene troupeau zanimau) brouter autour de ene réserve en sorte ki ena tout possibilité li capave tombe là-dans. Tout le roi ena ene réserve.

Suicide? - pas ene solution!

Ki faire to pense pou suicidé? Si to pé pense pou faire ça acoze ki to pé souffert ki fine vine insupportable pou toi, li ene gaspillage parceki ça pas pou diminué narien. Au contraire li pou augmente to souffrance. D'après hadice, ene dimoune ki commette suicide pou continué souffert souffrance suicide ziska Qiyaamat. Donc commette suicide avec l'intention pou résoudre problème, li couma dire sappe depi dans caraille tombe dans difeu. Pas zordi pas demain, to bizin trouve ene lizour Insha Allah. Pas tout le temps ki le temps reste mauvais.

Yameen

Attention! Li pas Yemen. C'est Yameen ki signifié la force. La main droite aussi appelle Yameen parceki en principe ene dimoune li ena pli boucou la force dans so la main droite.

Serment aussi appelle Yameen parceki ça li renforci la volonté ene dimoune pou faire ou pas faire ene kitchose. Longtemps dimoune ti ena l'habitude lève la main droite quand zote ti pé faire serment. Peut être par ça rapport-là aussi appelle li Yameen.

Vieux livres

Banne vieux livres lors Deen ou bien banne vieux Qour'aan ki pas capave servi, capave soit coule li dans la rivière ou dans la mer ou bien enterre li dans ene l'endroit propre cote normalement dimoune pas marché. Quand enterre li, li pli bon mette li dans ene conteneur du bois ou fer blanc ou plastic etc. avant jette la terre afin ki la terre pas tombe directement lors ça banne livres-là.

[Extrait de Al Jamiat Vol.3 No.11]

Plume en or ou en argent

Pas gagne droit servi ene plume en or ou en argent. Ça li applique pou missié et madame tous les deux. Coumsa même pas gagne droit servi cuillère, l'assiette et plat en or ou en argent. Ça aussi li applique pou missié et madame tous les deux.

[Extrait de Al Jamiat Vol.3 No.11]

Ki faire ???

  • Ki faire mo quitte-quitte namaz quand mo conné ki namaz li obligatoire et ena grand péché dans quitte li?
  • Ki faire mo blâme dimoune pou kitchose ki li pas fine faire quand mo conné ki ça li ene kitchose bien grave et ena ene grand punition pou ça?
  • Ki faire mo pé agir comme ene dépotoir de saleté cotte dimoune pé jette zotte saleté pou mo fanne ça partout quand mo conné ki d'après Qour'aan ena ene punition bien pénible

L'engagement

Quand ou promette ene dimoune ki ou pou faire tel kitchose ou bien ou pas pou faire tel kitchose, par cela ou fine prend ene l'engagement.

L'engagement c'est ene kitchose ki bizin respecté li. Perna aukene religion ki autorise pas respecté l'engagement. C'est ene kitchose tellement clair et évident ki dimoune pas conne lire aussi li d'accord avec ça.

Syndicate content