Akhlaaq-Tasawwuf

La jalousie li vine par manque de l'amitié. Necque ena pou développe l'amitié pou combatte la jalousie. Nabi ‎(Sallallaahou A'laihi Wasallam)‎ fine recommane nou prend l'habitude faire salaam pou développe l'amitié. Coumsa même ça capave combatte li par prend l'habitude donne banne cadeau et banne présents à ça dimoune ki ou éprouve la jalousie pou li. La jalousie c'est ene di feu ki ou reste brûlé toute longue la vie avec ça. Et si ou pas garde li sous contrôle ou bien si ou pas teigne li, ça capave nuire toute ene société à tout niveau.

"O Allah! Si mo pé gagne l'occasion vive dans to plaisir et pou donne la vie pou faire toi content, c'est necque ene faveur de to part ki to fine verse lors moi".

(Aarif Billah Hazrat Sheikh Moulana Hakeem Akhtar Sahab)

[Extrait de Al Jamiat Vol.3 No.7]

Mounajaat c'est ene conversation ki déroulé entre deux personne dans ene façon tellement discrète ki ene troisième pas conné. Quand ene personne ki pé cause avec so bien-aimée, li pas oulé kikene dérange li. Li oulé la solitude totale avec ene l'atmosphère calme et tranquille. Parfois causé-là li tellement bon et agréable ki ene nuit entier capave traversé couma narien ditout. Li ti à content ki le temps faire ene ti escale pou permette zotte cause ene ti pé encore.

Si kikene so la religion li ene zaffaire secondaire dans so la vie, li pas coumsa pou ene musulman. Pou ene musulman, so Deen vine avant tous. C'est en fonction de so Deen ki li réglé so la vie. Li adapté so banne activités avec Deen dans tout domaine de la vie. Ça Deen-là li contrôle ziska même so relation pli intime avec so madame et so banne sentiments le plus interne et pli sensible. Pou ene musulman le verdict li "clear-cut".