Akhlaaq-Tasawwuf

Ceki bien pas bon avec nou

Nou nepli intéressé avec Deen. Nou plutôt guette pli boucou de coté dounia. Acoze ça bien tigite considération nou donne nou Deen. Nou façon mangé, boire, habillé et nou comportement en général li pas reflecte narien ki dire ki nou ena Deen. Nou copié tout avec lezot couma dire nou Deen pena narien pou donne nou. Nou pas hésité cause menti, embette dimoune et mal agir avec nou prochain.

Valeur dounia

Banne ki pé galoupe derrière dounia, zotte pou conne valeur zotte la caze, zotte l'auto, zotte campement, zotte travail et zotte du bien en général quand pou déshabille zotte pou donne zotte ghoussal et pou mette kafan lors zotte. C'est ene moment quand tout la vérité pou dehors. Tout maquillage pou tombé. Dans ça l'heure-là, nou pou conné ki narien pas pou servi nou. C'est necque nou banne action ki pou accompagne nou. Ça dounia ki fine vine fou derrière li, pou trahir nou ça jour-là.

Contact avec Allah Ta'ala

Ene pays li capave bien strict. So banne la loi capave bien sévère. Capave ena ene quantité problème là-bas. So banne procédure bien long et bien difficile. Mais si ou ena contact avec dimoune ki bizin, ou problème capave résoudre ene ti mama et avec boucou facilité. Quand ou bien avec banne ki à haute niveau, tout kitchose vine facile pou ou. Coumsa même quand ou ena ene bon contact avec Allah Ta'ala, tout vine facile dans ça le monde ki rempli avec boucou problèmes.

Ki faire musulman fine vine couma ene zouzou dans la main lezot?

Si musulman pé faire face à ene quantité problèmes dans le monde, li pas acoze ki li pena moyen pou combatte so adversaire. Parceki jamais dans l'histoire musulman fine porte la victoire par so la force matérielle. Tout le temps li fine gagne la victoire par l'aide de coté Allah Ta'ala. Allah Ta'ala so l'aide li dessane lors banne ki pratique Deen et reste dans so l'obéissance. Allah Ta'ala content banne ki suive so Nabi ‎(Sallallaahou A'laihi Wasallam)‎. Sans suive Nabi ‎(Sallallaahou A'laihi Wasallam)‎, pena Deen ni aide de coté Allah Ta'ala.

L'amour pou Rassouloullah ‎(Sallallaahou A'laihi Wasallam)‎

L'amour pou Rassouloullah ‎(Sallallaahou A'laihi Wasallam)‎ li ene kitchose très essentiel pou Imaan. Imaan pas existé sans ça l'amour-là. Au contraire ene dimoune bizin ena ça l'amour-là plis ki tout kitchose pou li capave vine ene bon musulman.

Be conscious

Be aware and be conscious

As it is very very serious

You won't get anything delicious

Without losing something precious

So why are you anxious

When your Rabb is very gracious!

[Extrait de Al Jamiat Vol.3 No.13]

Couma rapproché avec Allah Ta'ala?

Rapprochement avec Allah Ta'ala li réalisé par faire Allah Ta'ala so ibaadat. Ena banne ibaadat ki obligé faire ki nou appelle zotte banne Faraa-iz couma ena ki pas obligatoire. C'est banne ibaadat supplémentaire ki appelle نوافل. Banne Faraa-iz li inclure banne pratiques ki obligé faire et aussi banne kitchose ki bizin pas faire.

Syndicate content