Péché

Deux problèmes

Nou ena 2 qualités problèmes. Ene problème dans dounia et ene 2eme dans aakhirat. Fodé pas nou essaye résoudre nou problème dans dounia par crée ene problème dans aakhirat. Li couma dire résoudre ene ti problème par crée 1 gros problème. Ou croire eski li ene bon l’idée pou nettoye la crache avec l’urine ! Mais dimoune li guette zis pou aster-là. Li pas calcule l’avenir. Li guette zis l’avantage temporaire quand même ça capave faire li souffert pou tout le temps. Ene dimoune ki fréquente banne ki ena la sagesse pas pou faire ene erreur pareil.

Shaitaan l’ennemi insaan

Shaitaan jamais ti content insaan. Li ene l’ennemi déclaré pou insaan. Li fine même déclaré sous serment ki li pou attaque insaan à tout niveau. Li induire dimoune dans l’erreur par risse li dans la boisson, le course, casino, adultère et dans toute sorte bêtise. Donc pena doute ki li ene l’ennemi insaan. Nou capave gagne extra même plaisir dans faire ça péché-là. Eski ou pou content faire kitchose ki faire ou l’ennemi plaisir et ou bien aimé en colère ? Nou pli grand l’ennemi shaitaan li bien content. Et ça faire nou véritable bien-aimé Allah en colère.

Ki l’avenir …

Deen c’est ça mode de vie ki Allah Ta’ala fine choisir pou insaan vive so la vie d’après ça. C’est Allah Ta’ala ki fine crée la terre et tout ceki ena lors la terre. Et c’est Allah Ta’ala ki fine crée tout ceki existé. Ena ene seul Créateur. Donc pena aukene créateur apart Allah Ta’ala ni ena kit créature ki fine crée par kikene apart Allah Ta’ala. Donc insaan bizin suive ça mode de vie ki Allah Ta’ala fine choisir pou li. Insaan pena droit vive dans ene l’autre façon apart ça façon-là.

Mama/Papa

Pena personne ki capave content ou plis ki ou mama papa. Mama papa zotte colère li pli bon ki ene étranger so sourire parceki mama papa pé capave montré colère mais zotte le cœur li rempli avec l’amour. Par conte ene étranger so sourire li capave être ene poison mielleux.

Coupe relation

Coupe relation avec ene musulman et arrête coze avec li par rancune li pas ene pratique islamique. Nabi ‎(Sallallaahou A'laihi Wasallam)‎ fine lance banne avertissement assez sévère concernant ene dimoune ki fer ça. Selon ene hadice rapporté par Hazrat Abou Hourairah ‎(Radiyallahou anhou‎)‎, Rasouloullah ‎(Sallallaahou A'laihi Wasallam)‎ fine dire ki li pas permette pou ene musulman ki li arrête coze avec so frère pendant plis ki 3 jours parceki celui ki arrête cozé pendant plis ki 3 jours et li arrivé mort, alors li fine rente dans l’enfer.

Imite lezot

Selon ene hadice, celui ki imite kit communauté, li pou être considéré ene parmi banne-là même. Ça signifié si ene musulman suive ene principe de ene l’autre religion, alors li ena chance levé avec banne dimoune de ça religion-là même jour qiyaamat. Coumsa même si ene dimoune li suive la mode et principe de banne ki pas dans Deen, alors li pou levé avec ça banne qualité dimoune-là même jour qiyaamat.

Faasiq

Ene faasiq c’est ene personne ki commette ene péché majeur ou bien ene ki persisté lors ene péché mineur. Ene dimoune li dénigré li même par commette péché et li ranne li indigne. Li montré ki li sans pudeur. Acoze ça ene dimoune semblable so témoignage pas acceptable. Li bien chagrinant ki ene dimoune li capave l’honorable mais pena valeur dans lizié Allah Ta’ala. Vrai l’honneur c’est ça l’honneur ki ene dimoune ena dans lizié Allah Ta’ala. C’est ene l’honneur ki resté et li dans sur.

Syndicate content