Péché

Selon ene hadice ki trouve dans Sahih Boukhari et Sahih Mouslim, Nabi ‎(Sallallaahou A'laihi Wasallam)‎ fine dire ki banne anges (farishta) pas rente dans ene la caze cote ena li chien ou bien photo.

Dimoune dire ki li ti vine fou de colère. Li pas conné ceki li fine faire dans colère. Mais tout ça-là menti. C'est l'esprit dominere et l'arrogance ki ene dimoune ena dans li ki faire li déclaré ki li fine vine fou de colère. Si dans ça moment-là ene gros li chien sorte avec li ou bien ene ki ena gros le bras vine devant li, tout so colère pou monte lors pied. Bé ki manière so la folie fine capave monte lors pied? Li paraite ki so colère li pas fou. Li bien malin et bien rusé. Li conné avec ki sanla li bizin ramasse la queue.

Principalement ena deux façons de gaspillage. La première façon cote ene dimoune li bizin dépensé mais li dépense plis ki bizin. Ça en plis-là c'est ene gaspillage. Et ça qualité gaspillage-là appelle li Is-raaf ki li haraam.

Ena ene deuxième qualité gaspillage. C'est-à-dire ene dimoune dépense so la monnaie cote pas gagne droit même dépensé.

Casse l'ordre Allah Ta'ala li ene péché. Et tout kitchose ki implique désobéissance Allah Ta'ala li ene péché. Ça li dégrade ene dimoune dans lizié Allah Ta'ala. Aukene maquillage l'honneur pas prend lors ene dimoune quand li fine dégradé dans lizié Allah Ta'ala. Li capave ena titre par tonne mais li pas pou ena ene grain dignité aussi si li dans péché. Pli ene dimoune li dans l'obéissance, pli li vine honorable. Et pli l'honorable c'est celui ki pli dans obéissance.