Akhlaaq-Tasawwuf

Muttaqui et Faassiq

Ene faassiq c’est ene personne ki commette ene péché. Dans la même façon, ene personne ki persisté lors ene péché mineur aussi li vine ene faassiq. Ene dimoune li dénigré li même par commette péché et li ranne li indigne. Li montré li ki li sans pudeur. Acoze ça, ene dimoune semblable so témoignage li pas acceptable. Li bien chagrinant ki ene dimoune ki capave être ene l’honorable dans lizié dimoune mais le pena valeur dans lizié Allah Ta’ala.

Deendaar et douniadaar

Douniadaar c’est ene ki garde dounia dans so le cœur. Ene le cœur ki rempli avec dounia li couma ene bateau ki rempli avec delo ki faire li coulé.

Ene dimoune ki content et galoupe derrière dounia, li sacrifié tout ceki vine ene obstacle dans so chemin. Arrive ene point cot li capave tourne le dos avec so Khaliq (créateur) aussi. Finalement li perdi partout parceki quand li quitte dounia, li alle la main vide. Et aakhirat-là ti déjà pas dans so compte.

Ene concept de réussite de ene matérialiste

Presque tout dimoune même content ki li ena so la caze et ene l'auto. Ena dimoune li permette li faire transaction ki pas bizin pou réalise ça banne projets-là. Riba et l'intérêt ki li bien grave d'après shariah aussi pas dire zotte narien. Sans aukene pincement dans le cœur, zotte rente dans l'intérêt et avec prétexte ki zotte dans la nécessité ki autorise zotte faire ceki pas bizin faire. Nou tout conné ki porc li impure et haraam. Et nou conné aussi ki malgré ça, li autorisé consommé pou ene dimoune ki pé mort de faim ki pena narien apart ça pou mangé.

Shirk déguisé

Tahajjud pendant ene nuit capave rayé acoze ene négligence de moins ki ene minute. Ça arrivé quand ene dimoune li intéresse pou faire dimoune conné ceki li fine faire pendant la nuit. Ça désir-là li émane apartir ene maladie ki appelle « Riya ». C’est ene mauvais poison ça. C’est ene genre de shirk ki hadice qualifié li de shirk khafi. Normalement ene dimoune bizin faire tous ibaadat pou faire Allah Ta’ala plaisir. C’est ça même ki nou appelle ikhlaas ou bien la sincérité.

Le loup

Nou content ki tous dimoune conne nou. Nou content ki tous dimoune flatte nou. Nou content grandeur. Nou ena désir pou gagne popularité. C’est ça même ki appelle Houbbul-Jaah ou bien la folie grandeur. D’après diagnostique banne ki dans le domaine, ça signifié ki ena ene le loup dans nou. Ene le loup bien féroce ki capave dévasté nou par détruire nou Deen. Kitchose pli précieux dans ene dimoune c’est so Deen. C’est ene le loup ki pou détruire ça kitchose aussi précieux-là. Ki pou resté avec ene dimoune si so Deen même fine fini détruire.

Loyauté et fidélité

Tout dimoune ki ena l’équilibre mental et moral, li pou apprécié sans doute ça kitchose ki appelle loyauté ou bien fidélité. Mais ça aussi li ene vérité ki bien tigite dans tigite ki oulé inculqué ça dans zotte. Ena des fois zotte capave agir avec loyauté mais sans ene but spirituel derrière ça. Zotte faire li plitot pou banne l’avantage mondaine. Jour ki zotte trouve li ene obstacle pou atteine ene but, alors couma narien ditout zotte capave cédé et agir dans ene façon malhonnête. Donc zotte visé principal c’est bénéfice mondaine.

Quitte Sounnat

Quitte ene sounnat de Nabi ‎(Sallallaahou A'laihi Wasallam)‎ li ene kitchose bien bien pas bon. Dimoune capave dire ceki li envie mais ene dimoune ki ena vrai l'amour pou Nabi ‎(Sallallaahou A'laihi Wasallam)‎ li pas quitte sounnat de Nabi ‎(Sallallaahou A'laihi Wasallam)‎. Ou déclare content Nabi ‎(Sallallaahou A'laihi Wasallam)‎ mais ou battage li ene battage ki ou fine copié avec banne kaafir ! Ki logique capave ena derrière ene l'attitude pareille ? Apart nou dire ki ou pas paraite sincère dans ceki ou pé dire.

Syndicate content