Akhlaaq-Tasawwuf

Oui ou non

 Ena so Oui couma ena so Non dans la vie. Li pas seulement Oui ni li seulement Non. Ena tout les deux. Ene dimoune bizin conné quand pou dire Oui et quand bizin dire Non. Si ou dire Oui à tout ceki ou madame dire ou, ou pou vine ene bon complice et ene bon soutireur. Coumsa même si ou dire Non dans tout kitchose, ou vine ene dimoune négatif et bien difficile. Avec manque d'expérience et l’age enbas l’age et surtout avec banne l'étalages dans la vie, li difficile pou ou même conné par ou, cote bizin dire Oui et cote bizin dire Non.

Ene façon pou arrête faire péché

Si ene dimoune prend l’habitude reste avec wazou, ça dans ene certaine mesure capave aide li pou reste loin avec péché. Parceki quand li pou ena wazou lors li, li pou ena la volonté et le désir pou reste dans zikrullah. Couma nou conné, zikrullah li protége ene dimoune contre shaitaan ki oulé à tout prix détruire li. Alors zikrullah pou servi comme ene protection contre shaitaan et ça pou garde li loin de banne péchés. Dans ene hadice, Rassouloullah ‎(Sallallaahou A'laihi Wasallam)‎ fine faire nou conné ki shaitaan reste assizé lors le cœur ene dimoune.

V.A.T - Value Allah’s Time! (le temps)

Le temps li ene faveur bien bien valeureux. Mais ça li depanne couma ou servi li afin pou augmente so valeur ou bien diminué so valeur. Si ou dépense ou le temps dans rode charbon, li pou vine charbon; si ou engage ou le temps pou tire l’or, alors ou le temps pou vine l’or. Et si ou engage ou le temps dans extraire banne perles, alors ou le temps pou vine perle.

Insaan so le temps gagne so vrai valeur quand li engage li pou gagne l’amour Allah Ta’ala; et c’est ça même l’amour ki faire tout kitchose gagne valeur.

Dounia et Aakhirat

Dounia c’est tout ceki éloigne ou avec Allah Ta’ala quand même li capave en forme Deen aussi. Par exemple ene dimoune li faire travail Deen pou lizié dimoune mais derrière ça so but c’est pou gagne l’honneur et popularité. Avec ene l’intention et ene but malsain pareil, ene dimoune coumsa pou trouve li lors la paille jour Qiyaamat, même si li fine arrivé donne so la vie aussi. Par contre si ene dimoune pé travail pou gagne so la vie honnêtement d’après Deen, ça travail-là c’est Aakhirat quand même li pé faire li dans bazar et li perna aukene forme de Deen.

Taqwa

Taqwa c’est la volonté pou vive dans plaisir Allah Ta’ala. C’est ene gloire et pli grand gloire pou insaan. Allah Ta’ala dire dans Qour’aan :

“… Certainement personne pli honorable parmi ou, c’est ene ki pli ena Taqwa (la volonté).” (S49/V13)

La tolérance

Ene dimoune fine prend la monnaie prêté avec ou. Li pas fine réussi respecté le délai ki ou ti accorde li pou remboursé. Ou fine prolonge so délai sans maltraite li. C'est ene tolérance ki ou fine montré. En faisant cela, ou fine montré ou bon manière et bon qualité ki ena dans ou. Allah Ta'ala dire dans Qour'aan-e-Kareem :

Jouir et subir

Quand ou jouir dans dounya, ou bizin attane pou subir dans aakhirat. Et celui ki fine accepté pou subir dans l’obéissance Allah Ta’ala, alors li bizin garde l’espoir ki li pou jouir dans aakhirat. C’est à nou pou choisir cote nou oulé jouir et cote nou oulé subir. Et parfois ceki nou subir li vine goûteux et délicieux dans l’amitié et dans mouhabbat pou Allah Ta’ala. Mais li prend ene ti peu le temps avant arrive ça stage-là. Li pas ene kitchose ki arrivé du jour au lendemain.

Syndicate content