Akhlaaq-Tasawwuf

Z’animau dans forme dimoune

Quand nou abatte zanimau pou faire Qourbaani, ça li qualifié de cruauté par certains. Parfois tellement zotte faire sensible, sympathique et gentil ki zotte mette sur pied banne instances pou defanne droits banne zanimau. Mais quand zotte trouve zotte l’intérêt dans teigne zotte la soif avec du sang dimoune, zotte faire li sans kit pincé de hésitation.

Ikhlaas

Ikhlaas c’est la volonté pou faire ene travail seulement pou faire Allah Ta’ala plaisir. Quand ene dimoune ena Ikhlaas, li perna aukene but dans faire n’importe ki travail apart ene seul kitchose : Ziste li oulé ki Allah Ta’ala content. Apart ça li pas oulé narien. Ça c’est ene kitchose très très important. Parceki sans ça, aukene action pas compté. Et quand ena ça, ene ti travail aussi ena grand valeur dans liz’ié Allah Ta’ala. Avance ene  ti roche pou faire Allah Ta’ala plaisir, li boucou pli valeureux ki casse ene montagne sans Ikhlaas.

Controle depense

Avec ene ti rente, ene dimoune capave faire boucou kitchose dans so la vie - mais à condition ki li perna gros dépense à faire. Par contre si li ena gros dépense, ene belle rente aussi na pas suffit. Ena des fois li capave perna ene sous dans so poche dans au milieu mois. Li bizin rode prêté.

Difficulté dans vine bon

Tout kitchose ena so difficulté couma ena so facilité. Quand ene dimoune change so la vie, li capave faire face avec certaines obstacles et certaine difficultés. Mais faudré pas li découragé. Li bizin continué faire z’effort. Ene fois ki li fine adapté, tout pou vine facile. C’est manque d’adaptation ki faire ene dimoune senti difficulté. Quand nou pencore adapté avec ene travail ou bien avec ene mangé ou bien avec ene l’environnement, li tout à fait normal ki nou pou éprouve certaines difficultés.

Faire bon

Quand nou conné ki ene kitchose li bon, alors nou bizin faire z’effort pou faire li. Li pas bon pou ene dimoune faire mauvais. Dans faire mauvais perna l’avenir. L’avenir trouve dans faire bon. Faire bon veut dire vive dans le plaisir Allah Ta’ala. Nou gagne le plaisir d’Allah Ta’ala dans vive d’après so banne commandements en suivant le principe de nou bien-aimé Rassouloullah ‎(Sallallaahou A'laihi Wasallam)‎.

[Extrait de Al Jamiat Vol.2 No.3]

Pensée de coté shaitaan

Jamais li ti trop tard pou change la vie. Juska so dernière l’heure aussi, ene dimoune ena chance change so la vie. Faudré pas pensé ki astere-là ki pou changé quand autant bananés pas fine changé. Gaspillage changé. Laisse la vie allé couma li pé allé. Rassure ou ki ça façon pensée-là li vine de coté shaitaan. Et quand shaitaan ti content ou pou donne ou ene bon conseil ! Jamais shaitaan ti sincère avec dimoune. Li ene l’ennemi ouvert et déclaré. Jamais li pou faire kit du bien pou dimoune. Donc pas laisse ou piégé par banne pensée pareil.

Bon maniere

Bon manière li pas ene kitchose ki vendé dans la boutique, dans bazaar ou quelque part. Li ene kitchose ki ene dimoune bizin inculqué dans li. Bon manière li inculqué et développé par reste en compagnie ene ki ena bon manière. Pas ziste ça. La personne bizin ena la volonté pou dresse so caractère et corrige so manière. Lerla capave gagne bon manière.

Syndicate content