Akhlaaq-Tasawwuf

Conne valeur ou la vie

Conne garde valeur ça la vie ki Allah Ta’ala fine donne ou. Ene dimoune ki conne valeur ene kitchose, li pou conne servi ça kitchose-là d’après ça kitchose-là so valeur. Jamais ou pou trouve kikene mette ene joli linge pou faire nettoyage dans so jardin ou bien dans so la caze. Eski ou fine déjà trouve ene mécanicien mette ene joli linge couleur blanc couma dilait et pé répare ene moteur plein ek disuif ?

La glace là li divant ou

Ou hésité pou déplaire kikene ki fine ranne ou service mais ou pas honté pou désobéir celui ki fine créé et fine accorde ou tout ceki ou bizin ? Eski ou trouve ena logique dans vine esclave pou ene kikene ki fine faire ou certaine faveur dans ou la vie mais ou vine couma ene rebelle envers celui ki pé verse so faveur lors ou incessamment.

Couma vine ene bon musulman

Masjid c’est ene place ki fine faire pou faire Allah Ta’ala so ibaadat en forme namaz, tilaawat-ul-Qour’aan, zikrullah etc. Mais ene dimoune li bizin reste dans l’obéissance Allah Ta’ala partout à cote li été. Pas zisse dans masjid. Li bizin reste dans l’obéissance Allah Ta’ala tout le temps. Pas zisse dans le mois de ramadhan. Parceki Allah Ta’ala li nou Rabb partout et pou tout le temps.

Pose ou même question

Eski vrai même ou content ou ?

Ou capave dire oui mais sans conné ki ou pas content ou. Parceki si ou ti content ou, ou pas ti pou mette dans ou le corps kitchose ki pou nuire ou et ou pas ti pou faire kitchose ki pou faire ou brûlé dans l’enfer. Pose ou même question. Ki sanla ki ou vrai l’ennemi ? Astere si ou même ou pas content ou, ki manière ou capave attane ki dimoune pou content ou ? Apprane content ou par vive d’après ceki ou Créateur fine ordonne ou.

Difficulté et problèmes

Dimoune pas capave reste sans problème lors ça la terre-là. Chaque dimoune bizin ena kit problème. Mais chakene so problème li dans so façon. Ena ki so problème li bien grave et ena ki so problème li pas sa grave-là. Mais chaque dimoune li considère so problème pou ene grand problème. C’est parceki ene ti problème capave vine ene grand problème si fine laisse li coumsa même sans remédié li.

Ene défi ki bizin relevé

Ene dimoune li capave vine ceki li envi par so banne zeffort. Et ça li facile. Par exemple li facile pou vine ene Hafiz ou bien ene Aalim ou bien ene Mufti ou bien ene islamologue ou n'importe ki logue ou envi. Coumsa même li pas difficile pou vine ene médecin ou ene ingénieur ou n'importe ceki ou oulé. Mais ceki difficile et bien difficile, c'est ki ene dimoune vine ene dimoune dans le vrai sens du mot.

Collé avec la crache

Zordi jour ou trouve dimoune ene général ki zotte l’amitié li couma dire ene kitchose ki collé avec la crache. C'est-à-dire li ene l’amitié ki pas duré longtemps. Zotte capave mort pou ene kitchose ki bien simple et ki capave paraite bien banale. Couma zotte capave vine ou l’ennemi pou narien ditout ou bien zisse acoze ou bon cozé pas fine satisfaire zotte tendance malsaine et perverse.

Syndicate content