Akhlaaq-Tasawwuf

Le temps

Le temps li ene grand cadeau Allah Ta’ala. Bizin conne servi li. Pena aukene meilleur façon ki servi li dans l’obéissance Allah Ta’ala. Chaque fraction de ça le temps-là capave servi li pou bâtir ou détruire nou aakhirat cote nou ena pou vive pou tout le temps. Ene-ene tasbeeh ki nou faire, li servi pou faire ene zarbre poussé dans jannat. A nou profite avec le temps ki Allah Ta’ala fine accorde nou.

[Extrait de Al Jamiat Vol.8 No.1]

Rêve-là fine cassé

Tous banne ki fine galoupe derrière dounia fine déçu. Parceki dounia jamais ti sincère avec kikene. Li couma ene objet ki passe dans la main tous dimoune sans ki li vine pou kikene. Banne ki fine senti ki zotte fine gagne dounia, c’est plito ene illusion ou ene mirage ou bien ene rêve. Et ça rêve-là li cassé quand zotte ferme lizié pou tout le temps. Zotte allé depi ça dounia-là la main vide necque avec quelque mètres la toile blanc lors zotte le corps. Et ça aussi pou vine la terre avec zotte le corps dans qabar.

Ene pas justifié l’autre

Li tout à fait normal pou ene dimoune rode défaut de ene ki tire défaut avec li. Mais eski ça l’attitude ki nou considère li normal-là li normal d’après shariah ? Avant repone ça question-là li bon nou prend note de ene principe.

Accusé No 1

Avant nou tire défaut avec kikene, nou bizin d’abord guette nou même dans la glace. C’est ene cozé ki tout dimoune même pou d’accord. Ki conné ça défaut ki ou pé tiré dans ou camarade li capave trouve dans ou même pli bien. Ou pé fatigue ou la tète avec ene joli signe de beauté lors figure ou camarade mais sans conné ki ou ena ene gros tache noire lors ou visage. Aster si ou oulé, ou capave appelle li « ene gros tache de beauté ». Mais tout dimoune conné ceki li été.

Relation apart

Ene musulman bizin ena ene relation apart avec Allah Ta’ala. Ça relation apart-là li concrétisé par vive dans plaisir Allah Ta’ala. Li capave ena l’amitié ou considération pou lezot mais à aukene moment li pas laisse ça faire li désobéir Allah Ta’ala. Li ena toujours ene considération apart pou Allah Ta’ala. So priorité c’est faire plaisir Allah Ta’ala. 

« Ene tigite ‘amal d’après sounnat li boucou pli bon ki boucou amal dans bid’ah. »

Le moyen pli efficace

Le moyen pli efficace pou gagne l’aide avec Allah Ta’ala c’est pas faire péché et pas désobéir Allah Ta’ala. Ene dimoune ki désobéir Allah Ta’ala li éloigne li avec Allah Ta’ala. Par contre ene ki reste dans l’obéissance Allah Ta’ala li rapproche li avec Allah Ta’ala.

Maqsood-e-Haqeeqi

 Quand nou bizin ene kitchose, alors li très normal ki bizin alle rode li dans place ki capave gagne li. Ou pas la chasse poisson dans la foret. Ou alle la pêche li dans la mer ou dans la rivière. Ou pas alle traite ou la main cassé cote ene forgeron. Ena so place approprié cote bizin alle faire li.

Syndicate content